2020ވަނަ އަހަރުގެ ފެބްރުއަަރީމަހުގެ ނިޔަލަށް މަގުހެދުމުގެ 8 މަޝްރޫޢެއް މުޅިން ނިންމާލެވޭނެކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީން ވިދާޅުވެއްޖެއެވެ.
އެމްޓީސީސީ މިވަގުތު އަންނަނީ ރާއްޖޭގެ 8 ރަށެއްގައި މަގުހެދުމުގެ މަޝްރުޢޫތައް ކުރިއަށްގެންދަމުންނެވެ. އެ 8 ރަށަކީ ހދ.ހަނިމާދޫ، ރ.އުނގޫފާރު، ރ.ދުވާފަރު، ބ.އޭދަފުށި، ލ.ފޮނަދޫ، ފުވައްމުލައް ސިޓީ ލިންކްރޯޑާއި އެތެރޭގެ މަގުތައް، އަދި އައްޑޫސިޓީ ހުޅުމީދޫއެވެ. މި 8 ރަށުގެ ތެރެއިން ފުވައްމުލައް ސިޓީއާއި އައްޑޫސިޓީ ފިޔަވާ ބާކީހުރި ކޮންމެ ރަށެއްގައިވެސް އެވަރެޖްކޮށް 3 ކިލޯމީޓަރުގެ ސަރަޙައްދެއްގެ މަގު ހެދުމުގެ މަސައްކަތް އެމްޓީސީސީއިން ދަނީ ކުރަމުންނެވެ.
ޕީއެސްއެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅުދައްކަވަމުން އެމްޓީސީސީގެ ޖެނެރަލް މެނޭޖަރ ކޮންސްޓްރަކްޝަން އެންޑް ޕްރޮޖެކްޓް މެނޭޖްމަންޓް އަޙްމަދު ލަޠީފު ވިދާޅުވީ، މި 8 ރަށުގެ މަގުހެދުމުގެ މަސައްކަތްތައް ވަރަށް ބާރުދުވެލީގައި ކުރިއަށްދާކަމަށެވެ. އަދި 2020ވަނަ އަހަރުގެ ފެބްރުއަރީމަހުގެ ނިޔަލަށް މި ހުރިހާ މަޝްރޫޢެއްވެސް މުޅިން ނިންމާލެވޭނެކަމަށް އޭނާ ވިދާޅުވިއެވެ.
ލަޠީފު ވިދާޅުވީ މަގުހެދުމުގެ މަޝްރޫޢުތައް ކުރިއަށްގެންދިއުމުގެ ކެޕޭސިޓީ އެކުންފުނީގެ އެބަހުރިކަމަށާ، އެކަމަށް ބޭނުންވާ މެޝިނަރީޒްވެސް އެބަހުރިކަމަށެވެ. ނަމަވެސް އެމަޝްރޫޢުތައް އެންމެ އެދެވޭ ދުވެއްޔެއްގައި ކުރިއަށްގެންދިއުމަށް ދިމާވާ އެންމެ ބޮޑު ގޮންޖެހުމަކީ މަގުހެދުމަށް ބޭނުންވާ ހުރިހާ މެޓީރައަލެއް ރާއްޖެއިން ލިބެން ނެތުންކަމަށެވެ. އަދި އެތަކެތި ގިނަ ފަހަރަށް ރާއްޖެ އެތެރެކުރަންޖެހެނީ މެދުއިރުމަތީގެ ޤައުމުތަކުންކަމުން، ބޭނުންވާ މުއްދަތުގެ ތެރޭގައި އެތަކެތި ސައިޓުތަކަށް ގެންދިއުމަށް ދަތިތަކާކުރިމަތިވާކަން އޭނާ ފާހަގަކުރެއްވިއެވެ.
މަގު ހެދުމާއި، ބަނދަރު ހެދުމާއި، ބިން ހިއްކުމާއި އެއަރޕޯޓުތައް ތަރައްޤީކުރުމުގެ މަޝްރޫޢުތައް ހިމެނޭހެން އެމްޓީސީސީން އަންނަނީ ރާއްޖޭގެ އެކި ސަރަޙައްދުތަކުގައި ޖުމްލަ 34 މަޝްރޫޢެއް މިހާރުވެސް ހިންގަމުންނެވެ.