މުޅި ރާއްޖެ ހައިސްޕީޑް ފެރީ ނިޒާމަކުން ގުޅާލުމަށް ސަރުކާރުން ހިންގާ މަޝްރޫޢުގެ ދަށުން ތަޢާރަފުކޮށްފައިވާ "ރާއްޖެ ޓްރާންސްޕޯޓް ލިންކް"ގެ ޚިދުމަތް ރަސްމީކޮށް ދޭން ފަށައިފިއެވެ.
މި ޚިދުމަތް އެންމެ ފުރަތަމަ ފަށާފައިވަނީ ޒޯން 1ގައި ހިމެނޭ 3 އަތޮޅުގެ ތެރެއިން ހދ.އަތޮޅުގެ ރަށްތަކުގައެވެ. މި ޚިދުމަތް ރަސްމީކޮށް ފެށުމުން، ދެން ދަތުރުތައް ކުރާނީ ކަނޑައަޅާފައިވާ އަގުތަކުގައި ޓިކެޓް ވިއްކައިގެންކަމަށް މި ޚިދުމަތް ފޯރުކޮށްދޭ އެމް.ޓީ.ސީ.ސީން ވިދާޅުވެއެވެ.
ހދ. އަތޮޅުގައި މީހުން ދިރިއުޅޭ 13 ރަށް އޮންނައިރު، އާރް.ޓީ.އެލްގެ ޚިދުމަތް ފޯރުކޮށްދިނުމަށްޓަކާ ހދ. އަތޮޅުގައި 4 ހައި ސްޕީޑް ފެރީއެއް ބޭނުންކުރުމަށް ވަނީ ހަމަޖެހިފައެވެ. ޒޯން 1 ގައި ޖުމްލަ 19 ރޫޓެއް ހިމެނޭއިރު، ހދ. އަތޮޅުގައި ފެރީ ދަތުރުކުރާނީ 4 ރޫޓަކުންނެވެ. މި ސަރަޙައްދުގައި މައި ސްޓޭޝަނެއްގެގޮތުގައި ބޭނުންކުރާނީ ކުޅުދުއްފުށި ސިޓީއެވެ.
އާރް.ޓީ.އެލްގެ ޚިދުމަތަށް ރައްޔިތުން އަހުލުވެރިކުރުވުމުގެގޮތުން ހދ. އަތޮޅުގެ ރަށްތަކަށް 2 މެއި 2022 ވަނަ ދުވަހުން ފެށިގެން އެމް.ޓީ.ސީ.ސީން ވަނީ ހިލޭ ދަތުރުތަކެއް ކުރިއަށްގެންގޮސްފައެވެ. މިކަމުގެ ބޭނުމަކީ ރައްޔިތުންނަށް މި ޚިދުމަތް ތަޖުރިބާކޮށްލުމުގެ ފުރުޞަތު ވީހާވެސް ބޮޑަށް ފަހިކޮށްދިނުމެވެ. އަދި މި ދަތުރުތަކަށް އާއްމުންގެ ފަރާތުން ބޮޑު ތަރުޚީބެއް ލިބިފައިވާކަން ސަރުކާރުން ފާހަގަކުރައްވައެވެ.
އާރް.ޓީ.އެލް ފެރީ ޚިދުމަތް ހަފްތާގެ 7 ދުވަހު ތާވަލުކޮށްފައިވާ ޝެޑިއުލާއެއްގޮތަށް ލިބޭނެކަމަށް އެމް.ޓީ.ސީ.ސީން ވިދާޅުވެއެވެ. އަދި ދަތުރުތަކުގެ ޝެޑިއުލް ރާވާފައިވަނީ އަތޮޅުތެރޭގައި ޚިދުމަތް ހޯދުމަށް އާއްމުކޮށް ދަތުރުކޮށްއުޅޭ ރަށްތަކަށް ހެނދުނުގޮސް ހަވީރު އެނބުރި ރަށަށް އާދެވޭނެހެންކަމަށް އެކުންފުނިން ވިދާޅުވެއެވެ.
ފެރީގެ ޚިދުމަތަށް އަގުތައް ހަމަޖައްސާފައިވަނީ ސަރުކާރުން ކަނޑަޅާފައިވާ މިންގަނޑަށް ކުޑަކުރެވޭނެ އެންމެ ކުޑަކޮށްކަމަށް އެމް.ޓީ.ސީ.ސީން ވިދާޅުވެއެވެ. މި ޚިދުމަތް ހޯދާ ފަރާތްތަކަށް ފަސޭހަކަމާއެކު ޓިކެޓް ނެގޭނެގޮތް ހެދުމަށްޓަކާ އޮންލައިންކޮށް ވެބްސައިޓް އަދި އެޕްލިކޭޝަން މެދުވެރިކޮށް ޓިކެޓް ނެގެން ހުންނާނެކަމަށާއި، ޒޯނުގައި ހިމެނޭ ޓަރމިނަލްތަކާއި ފެރީތަކުންވެސް ޓިކެޓް ގަނެވެން ހުންނާނެކަމަށް އެމް.ޓީ.ސީ.ސީން ވިދާޅުވެއެވެ.
އާރް.ޓީ.އެލްގެ ޚިދުމަތުގައި އެމް.ޓީ.ސީ.ސީން ބޭނުންކުރަނީ 50 މީހުންގެ ޖާގައިގެ ފެރީތަކެކެވެ. މި ފެރީތަކަކީ މިހާރު ބޭނުންކުރާ ފެރީތަކަށްވުރެ ހިތްގައިމު ފެރީތަކެކެވެ. އެގޮތުން މި ސްޕީޑް ފެރީތަކަކީ ދަތުރުވެރިންނަށް ހިތްފަސޭހަކަމާއެކު ދަތުރުކުރެވޭނެގޮތަށް އެއަރކޯން ކޮށްފައިވާ ފެރީތަކެކެވެ. ފެރީގައި ފާޚާނާކުރެވެން ހުންނާނެއެވެ. އަދި ލަގެޖް ބެހެއްޓުމަށްވެސް ޖާގަ ޚާއްސަކުރެވިފައިވެއެވެ. މިއިން ކޮންމެ ފެރީއެއްގައި ފުރޮޅުލީ ގޮނޑިއާއި ސްޓްރެޗަރ ބެހެއްޓުމަށް ވަކި ތަނެއް ޚާއްސަކުރެވިފައިވެއެވެ. މި ފެރީތަކުން ޚިދުމަތް ހޯދާ ކޮންމެ ދަތުރުވެރިއަކަށްވެސް އެއް ލަގެޖްގެ އިތުރުން ކެރީއޮން ލަގެޖެއް ގެންދެވޭނެއެވެ.
ރާއްޖެ ޓްރާންސްޕޯޓް ލިންކުގެ ޚިދުމަތް ޓިކެޓް ނަގައިގެން ކުރުމަށް ރަސްމީކޮށް ފެށިނަމަވެސް، ތިން އަހަރުން ދަށުގެ ކުޑަކުދިންނަށާއި، އެންސްޕާގައި ރަޖިސްޓްރީވެފައިވާ ޚާއްސަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެއެވެ.