ބޮޑެތި އިންވެސްޓްމެންޓުތަކަށް ރާއްޖޭގައި އޮތީ ފަހި މާހައުލެއް: އައިލާގެ ސީއީއޯ

ސަރުކާރާއެކު ގުޅިގެން ކުރެވުނު މަސައްކަތުން ރާއްޖެއަކީ ބޮޑެތި އިންވެސްޓްމެންޓުތަކަށް ފަހި މާހައުލެއް އޮތް ތަނެއްކަން އެނގިގެން ހިންގައްޖެ ކަމަށާއި ރާއްޖޭގެ އިންވެސްޓްމެންޓް މާހައުލަށް އިތުރުބާރު އުފެދިފައިވާ ކަމަށް އައިލާ މޯލްޑިވްސް މަޝްރޫޢު ސީއީއޯ ޕެޓަރ ކަރސްޓިޗް ވިދާޅުވެއްޖެއެވެ.

ނ. އަތޮޅުގެ ދެކެނަންފަރު، ދިގުފަރު އަދި ކުރަމާދޫ ހިމެނޭހެން ކުރިއަށް ގެންދާ އައިލާ މޯލްޑިވްސް މަޝްރޫޢުއަކީ ބޭރުގެ އަމިއްލަ ފަރާތަކުން މިހާތަނަށް ރާއްޖޭގައި ކުރިއަށް ގެންދާ އެންމެ ބޮޑު އިންވެސްޓްމެންޓް މަޝްރޫޢުއެވެ. މިމަޝްރޫޢުގެ އަގު ގާތްގަނޑަކަށް 800 މިލިޔަން ޑޮލަރަށް އަރައެވެ. ކްރިސްޓަލް ހޯލްޑިންގ ޕްރައިވެޓް ލިމިޓެޑް ކިޔާ ކުންފުންޏަކުން ކުރިއަށް ގެންދާ މިމަޝްރޫޢުގެ ޢަމަލީ މަސައްކަތް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ރަސްމީކޮށް ފަށްޓަވައިދެއްވާފައެވެ.

ޢަމަލީ މަސައްކަތް ފެށުމަށް، ނ. އަތޮޅުގައި ބޭއްވި ރަސްމިއްޔާތުގައި ވާހަކަ ދައްކަވަމުން މިމަޝްރޫޢުގަައި އެންމެ އިސްކޮށް ހަރަކާތްތެރިވާ ޕްރޮޖެކްޓް ސީއީއޯ ޕެޓަރ ކަރސްޓިޗް ވަނީ މިމަޝްރޫޢަކީ އަމިއްލަ ފަރާތަކުން ކުރިއަށް ގެންދާ މަޝްރޫޢުއެއް ނަމަވެސް ޤައުމީ މަސައްކަތެއް ކަމަށް ވިދާޅުވެފައެވެ. އަދި ސަރުކާރު އެންމެ އިސްފަރާތްތަކުން ރަސްމިއްޔާތުގައި ބައިވެރިވުމަކީ މިކަމަށް ސަރުކާރު ދެއްވާ އިސްކަން ހާމަވެގެންދާ ކަމެއްކަމަށް އޭނާ ވިދާޅުވިއެވެ.

ސީއީއޯ ކަރސްޓިޗް ވަނީ ސަސްޓެއިނަބަލް ޓައުންޝިޕްތަކަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަޞައްވުރެއްކަމަށް ވިދާޅުވެފައެވެ. އަދި މިފަދަ މަޝްރޫޢުއެއް ކުރިއަށް ގެންދަން ފުރުޞަތު ފަހިކޮށްދެއްވުމުން ރާއްޖޭގެ ތަރައްޤީގެ މިސްރާބު ވިސްނުންތެރިކަމާއެކު ބަދަލުކޮށްލުމުގެ ހިތްވަރު އެމަނިކުފާނުގެ ހުންނެވިކަން ހާމަވާކަމަށް ވިދާޅުވިއެވެ.

އޭނާ ވަނީ މިމަޝްރޫޢު ފެށުމަށް ބޭނުންވާ މަރުހަލާތައް ފުރިހަމަ ކުރުމަށް ސަރުކާރުގެ ބޯޑް އިންވެސްޓްމެންޓުން ދިން އެއްބާރުލުމަށް ޝުކުރު އަދާކުރައްވާފައެވެ. އަދި މިއީ އުނދަގޫ ނަމަވެސް ދެފުށް ފެންނަ މަރުހަލާއެއްކަން ފާހަގަކުރައްވާ އޭނާ ވަނީ މިކަމުން ރާއްޖޭގެ އިންވެސްޓްމެންޓް މާހައުލަށް އިންވެސްޓަރެއްގެ ހައިސިއްޔަތުން ވަރަށް ބޮޑު އިތުބާރެއް އުފެދިއްޖެ ކަމަށެވެ.

"ރާއްޖޭގެ ތާރީޚުގައިވެސް ބޭރުގެ އަމިއްލަ ފަރާތްތަކުން ކުރާ އެންމެ ބޮޑު އިންވެސްޓްމެންޓު ކުރިއަށްގެންދާ ފަރާތުގެ ހައިސީއްޔަތުން، ގާތްގަނޑަކަށް 800 މިލިޔަން ޑޮލަރު. އަޅުގަނޑަށް ބުނެވޭނެ ރާއްޖޭގެ އިންވެސްޓްމެންޓް މާހައުލު ވަރަށް ބޮޑަށް ފަހިކަމަށް. ރާއްޖޭގެ ފަންނީ ފަރާތްތަކާއި މަޝްވަރާކުރުމަށް ހުރި ޝައުޤުވެރިކަމާއި އަދި ސަރުކާރުގެ ދުރުރާސްތާ ވިސްނުމުގެ ތެރެއިން ރާއްޖެއަކީ ޒިންމާދާރުކަމާއެކު ބޮޑު އިންވެސްޓެއް ކުރެވޭނެ އިންވެސްޓްކުރެވޭނެ ތަނެއް ކަމަށް ދައްކައިދޭ." އައިލާ މޯލްޑިވް ޕްރޮޖެކްޓް ސީއީއޯ ވިދާޅުވިއެވެ.

މި މަޝްރޫޢުގެ ތެރެއިން ގިނަ ކަންކަން ފަހިވެގެންދާކަމަށް ސީއީއޯ ވިދާޅުވިއެވެ. މަޝްރޫޢު ނިމިގެންދާއިރު ބައިނަލްއަޤްވާމީ ފެންވަރުގެ ހޮޓެލް ސްކޫލަކާއި ސިއްޚީ ޚިދުމަތްދޭ ތަންތަން ޤާއިމް ކުރެވި ބައިނަލްއަޤްވާމީ ގޮތުން އެކި ދާއިރާތަކުން ފާހަގަކޮށްލެވޭ މަންޒިލަކަށް ހެދޭނެ ކަމަށެވެ. ހޮޓަލް ސްކޫލު ބައިނަލްއަޤްވާމީ ގޮތުން ބަލައިގަނެފައިވާ ތަޢުލީމު ދޭ ފަރާތްތަކާއި ހިންގާއިރު މިތަނުން ރާއްޖޭގެ ކުރިމަގުގެ ހޮޓަލިއަރުން ނެރެވޭނެ ކަމަށް ވިދާޅުވިއެވެ.

މިއީ އަމިއްލަ ފަރާތެއްގެ މަޝްރޫޢުއެއް ނަމަވެސް މީގެ އަސަރު މުޅި މުޖްތަމަޢަށް ކުރާނެކަން ފާހަގަކުރައްވާ އޭނާ ވިދާޅުވީ އެ މަޝްރޫޢުއަކާއެކު ބޭނުންވަނީ ހަމައެކަނި، ބައިނަލްއަޤްވާމީ ފެންވަރުގެ މަންޒިލެއް ބިނާކުރުމަށް ނޫން ކަމަށާއި އޭގެ ބަދަލުގައި ރާއްޖޭގެ ބައިވެރިއެއްގެ ގޮތުގައި ކުރިއަށް ދިއުމަށް ކަމާށެވެ.

އައިލާ މޯލްޑިވްސް މަޝްރޫޢު ނިންމުމަށް އަމާޒު ހިފާފައިވަނީ 2028 ވަނަ އަހަރުއެވެ. ސަރުކާރުން ވަނީ މިމަޝްރޫޢުގެ ސަބަބުން ފަތުރުވެރިކަމުގެ އައު ބާބެއް ފެށި ރާއްޖޭގެ އިޤްތިޞާދު ސިންދަފާތުކުރުމަށް ފުރުޞަތު ލިބިގެންދާނެ ކަމަށް ވިދާޅުވެފައެވެ.