ތުޅާދޫއަށް އުފާވެރި ދުވަހެއް، އެއަރޕޯޓު އެޅުމަށް ބޭނުންވާ ބިން ހިއްކަން ފަށައިފި

ބ. ތުޅާދޫގައި އެއަރޕޯޓު ތަރައްޤީކުރުމަށް ބޭނުންވާ ބިން ހިއްކުމުގެ އަމަލީ މަސައްކަތް ފަށައިފިއެވެ.

ތުޅާދޫ އެއާޕޯޓްގެ ބިން ހިއްކުމުގެ އަމަލީ މަސައްކަތް ފައްޓަވައިދެއްވީ ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސައިންއެވެ. މި މަޝްރޫޢު ކުރިއަށް ގެންދަނީ ކެޕިޓަލް މެރިން އެންޑް ކޮންސްޓްރަކްޝަން ކުންފުންޏާ ހަވާާލުކޮށްގެންނެވެ.

ޕްލޭނިން މިނިސްޓްރީން ކެޕިޓަލް މެރިން އެންޑް ސިވިލް ކޮންސްޓްރަކްޝަނާއި ތުޅާދޫގެ އިތުރުން ތ. ވިލުފުއްޓާއި، ށ. ބިލެއްފަހީގެ ބިން ހިއްކުގެ މަސައްކަތްވެސް ވަނީ ހަވާލުކޮށްފައެވެ. މި 3 މަޝްރޫޢު މި ކުންފުންޏާއި ހަވާލުކޮށްފައިވަނި 280 ދުވަސް ތެރޭ ނިންމާގޮތައް 42.4 މިލިޔަން ޑޮލަރަށެއެވެ.

ތުޅާދޫ ބިން ހިއްކުމުގެ މަޝްރޫޢުގެ ދަށުން 44.70 ހެކްޓަރުގެ ބިން ހިއްކާނެއެވެ.

ޕީއެސްއެމް ނިއުސްއާއި ވާހަކަދައްކަމުން ތުޅާދޫ ކައުންސިލްގެ ރައީސް އިބްރިމް އާދިލް ވިދާޅުވީ، އެރަށުގައި އެއާޕޯޓެއް އެޅުމަކީ އެ ރަށު ރައްޔިތުން ޒަމާނުންސުރެއް ދެކެމުން އައި ހުވަފެނެއްކަމަށެއެވެ. އެގޮތުން މިހާރު ތުޅާދޫގައި އެއަރޕޯޓެއް އެޅުމަށްޓަކައި ބިން ހިއްކަން ފެއްޓުމުން ރައްޔިތުން އެކަމާއި ވަރަށް ހިންހަމަ ޖެހި، މޫނުމަތިން އުފާވެރިކަން ފެންނަމުންދާކަމަށް އާދިލް ވިދާޅުވިއެވެ.

"މިއީ ތުޅާދޫ ރައްޔިތުން ޒަމާނުންސުރެއް ވަރަށް ބޭނުންވެފައި ތިބަކަމެއް ޙަޤީޤަތުގައި. ދެން މިހާރު މަސައްކަތުގެ އަމަލީ މަސައްކަތް ފެށިގެން ދިޔާމައި ރައްޔިތުން ތިބީ ވަރަށް ހިންހަމަޖެހިފައި" އާދިލް ވިދާޅުވިއެވެ.

އާދިލް ވިދާޅުވީ، އެއަރޕޯޓު އެޅިގެންް ދިޔުމާއެކު ތުޅާދޫއަށް އިޤްތިޞާދީގޮތުން ބޮޑެތި ކުރިއެރުންތަކެއް ލިބިގެން ދާނެކަމަށެއެވެ. އަދި ރައްޔިތުންނަށް އެތައް ގޮތަކުން ލުއި ފަސޭހަވެގެން ދާނެކަމަށް އާދިލް ވިދާޅުވިއެވެ.

ރާއްޖޭގެ މީހުން ދިރިއުޅޭ ކޮންމެ ރަށަކުން ފުރައިގެން 30 އަކަށް މިނެޓުން ދެވޭހާ ކައިރީގައި އެއަރޕޯޓެއް ތަރަޢްޤީކުރުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ މުހިންމު ސިޔާސަތެވެ. މިކަން ޙަޤީޤަތަކަށް ހެދުމަށްޓަކާ ބައެއް ޑޮމެސްޓިކް އެއަރޕޯޓުތަކުގެ މަސައްކަތް ނިންމާ މި ދައުރުގެ ތެރޭގައި ވަނީ ބޭނުންކުރަން ފަށާފައެވެ. އަދި އިތުރު އެއަރޕޯޓުތަކެއް ތަރައްޤީކުރުމުގެ މަސައްކަތްވެސް އެކި މަރުޙަލާގައި މިވަގުތުވެސް ކުރިއަށް އެބަދެއެވެ.

މީގެ އިތުރުން ރާއްޖޭގެ އެންމެ އުތުރުން ހަނިމާދޫ އިންޓަރނޭޝަނަލް އެއަރޕޯޓާއި އެންމެ ދެކުނުން ގަން އިންޓަރނޭޝަނަލް އެއަރޕޯޓު ޒަމާނީ ފެންވަރަށް ތަރައްޤީކުރުމުގެ ބިޔަ މަޝްރޫޢުވެސް ކޮންޓްރެކްޓަރުންނާއި ޙަވާލުކޮށް ޢަމަލީ މަސައްކަތް މިހާރު ވަނީ ފަށާފައެވެ.