މިދިޔަ ހަފްތާގައި އައްޑޫ ސިޓީއަށް ކުރި ވިއްސާރައިގައި ލިބުނު ގެއްލުމުގެ އަގު 4 މިލިއަން ރުފިޔާއަށްވުރެ މައްޗަށް އަރާނެ ކަމަށް ލަފާކުރެއްވޭ ކަމަށް ހައުސިންގ މިނިސްޓްރީން ވިދާޅުވެއްޖެއެވެ.އައްޑުއަށް ކުރި ވިއްސާރައިގައި 400 ގެއަށް ފެން ވަދެފައިވާއިރު، އޭގެ ތެރެއިން 50 ގެއަކަށް ބޮޑެތި ގެއްލުންތައް ލިބިފައިވާ ކަމަށް ހައުސިންގ މިނިސްޓްރީން ވިދާޅުވެއެވެ.ހުސްވި ނޮވެމްބަރ މަހުގެ ފަހުކޮޅު އައްޑޫ ސިޓީއަށް ވެހުނު ވާރޭއަކީ، ރާއްޖޭގައި މޫސުމާއިބެހޭ ރެކޯޑް ބަލަހައްޓަންފެށިފަހުން ރާއްޖޭގެ ތާރީޚްގައި 24 ގަޑިއިރުގެ ތެރޭގައި އެންމެ ގިނަ ޢަދަދަކަށް ވާރޭ ވެހުނު ދުވަސްކަމަށް މޫސުމާބެހޭ އިދާރާއިންވަނީ ހާމަކޮށްފައެވެ.މި ވިއްސާރައިގައި ފެންބޮޑުވެ، އެ ސިޓީގެ ފޭދޫ އަދި މަރަދޫފޭދުއަށް ވަނީ ބޮޑެތި ގެއްލުންތަކެއް ލިބިފައެވެ.ވިއްސާރައިގައި ލިބުނު ގެއްލުންތައް ބައްލަވާލެއްވުމަށް ރައީސުލްޖުމްހޫރިއްޔާގެ ޚާއްޞަ މަންދޫބެއްގެ ގޮތުން ފިނޭންސް މިނިސްޓަރ ޢަބްދުﷲ ޖިހާދު ވަނީ މިދިޔަ މަހުގެ ހަތާވީހުން ތިރީހުގެ ނިޔަލަށް އެ ސިޓީއަށް ދަތުރުފުޅެއް ކުރައްވާފައެވެ. އަދި މި ދަތުރުފުޅުގައި އެމަނިކުފާނު ވަނީ ގެއްލުން ލިބުނު ގެތަކަށް ޒިޔާރަތްކުރައްވައި، ރައްޔިތުންގެ ޙާލު އަހުވާލު ބައްލަވާލައްވާފައެވެ.އައްޑޫ ސިޓީއަށް ލިބުނު ގެއްލުންތަކުގެ ކަންކަން ބައްލަވައި ޙައްލު ހޯއްދަވައިދެއްވުމަށް ހައުސިންގ މިނިސްޓްރީގެ ފަރާތުން ގެންދަވަނީ ގިނަ މަސައްކަތްތަކެއް ކުރައްވަމުންނެވެ.ޕީ.އެސް.އެމްއަށް މަޢުލޫމާތުދެއްވަމުން، ހައުސިންގ މިނިސްޓްރީގެ ފަރާތުން އައްޑޫ ސިޓީއަށް ވަޑައިގެން އެކަމުގައި އިސްކޮށް ހަރަކާތްތެރިވެވަޑައިގެންނެވި، މިނިސްޓަރުގެ ނައިބު ޢަބްދުﷲ ޒިޔާދު ވިދާޅުވީ، ބޮޑަށް ގެއްލުން ލިބިފައިހުރީ ގޭގޭގެ ފަރުނީޗަރަށް ކަމަށެވެ.މިގޮތުން ފޭދޫ އަދި މަރަދޫން 133 އެނދާއި، 130 އަލަމާރި ހަލާކުވެފައިވާ ކަމަށް ޒިޔާދު ވިދާޅުވިއެވެ. އަދި ގެއްލުމުގެ ޖުމްލަ އަގު 4 މިލިއަނަށްވުރެ މައްޗަށް އަރާނެ ކަމަށް ލަފާކުރެއްވޭ ކަމަށްވެސް އޭނާ ވިދާޅުވިއެވެ.އައްޑޫ ސިޓީގެ އަވަށްތަކުގައި ފެން ހިންދާ ނިޒާމްތައް ޤާއިމްކުރުމަކީ މިހާރުން މިހާރަށް ބޭނުން ވެފައިވާ ކަމެއް ކަމަށް ޒިޔާދު ވިދާޅުވިއެވެ. އަދި ފޭދޫ އަދި މަރަދޫފޭދޫގައި ފެން ހިންދާ ނިޒާމް ހެދުމަށް ހަދަންޖެހޭ ސާރވޭތަކާއި، އެކަމަށްދާނެ ޚަރަދުތައް ބައްލަވަމުންދާ ކަމަށްވެސް ޒިޔާދު ވިދާޅުވިއެވެ.އައްޑޫ ސިޓީއަށް ކުރި ވިއްސާރައާ ގުޅިގެން ސަރުކާރުން ވަނީ ގެއްލުން ލިބުނު ފަރާތްތަކަށާއި، ފެނުގެ ސަބަބުން ކުރިމަތިވެދާނެ ބަލިމަޑުކަމަކުން އަރައިގަތުމަށް ޚާއްޞަ ފިޔަވަޅުތަކެއް އަޅުއްވާފައެވެ. އެގޮތުން އައްޑޫގައި ހުރި ސަރުކާރުގެ އިދާރާތައް ގުޅިގެން ފެން ހިންދުމުގެ މަސައްކަތްތައް ކުރައްވާފައިވާއިރު، 581 ވަޅަކަށް ކްލޮރިން އަޅުއްވާފައިވެއެވެ.