ފެރީ ކޮންޑަކްޓަރުންނާއި ސްޕީޑް ބޯޓް ކެޕްޓަނުންގެ ގޮތުގައި މަސައްކަތް ކުރާނެ ދިވެހި މުވައްޒަފުން ހޯދުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީން އިޢުލާންކޮށްފިއެވެ.
އެމް.ޓީ،ސީ.ސީން ވަނީ އެކުންފުނީގެ ޓްރާންސްޕޯޓް ސަރވިސަސް ޑިވިޜަނަށް ބޭނުންވާ 36 ފެރީ ކޮންޑަކްޓަރުންނާއި، 34 ސްޕީޑް ބޯޓް ކެޕްޓަނުން ހޯދުމަށް އިޢުލާންކޮށްފައެވެ.
ސަރުކާރުން ކުރިއަށްގެންދާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވަރކް" މަޝްރޫޢުގެ ދަށުން ރާއްޖޭގެ އެންމެ އުތުރުން، ހއ. ހދ އަދި ށ އަތޮޅަށް ފެރީގެ ޚިދުމަތްދޭން ފެށުމަށް އެމް.ޓީ.ސީ.ސީން މިހާރު އަންނަނީ ތައްޔާރުވަމުންނެވެ. އެގޮތުން ފެރީގެ ޚިދުމަތް ދިނުމަށްޓަކާ ފެރީ ކޮންޑަކްޓަރުންނާއި، ސްޕީޑް ބޯޓް ކެޕްޓަނުން ހޯދުމަށް އެމް.ޓީ.ސީ.ސީން އިޢުލާންކޮށްފައިވަނީ ހއ. އަތޮޅުގެ 4 ރަށަކަށާއި، ހދ. އަތޮޅުގެ 4 ރަށެއްގެ އިތުރުން، ށ އަތޮޅުގެ 4 ރަށަކަށެވެ.
މި ދެ މަޤަމާށްވެސް ކުރިމަތިލުމަށް ހުޅުވާލާފައިވަނީ އުމުރުން 18 އަހަރާއި 35 އަހަރާއި ދެމެދުގެ ދިވެހިންނަށް އެކަންޏެވެ. މަޤާމުގެ ޝަރުތުތަކުގެ ގޮތުގައި ކަނޑައަޅާފައިވަނީ ސާނަވީ ތަޢުލީމު ޙާޞިލުކޮށްފައިވުމާއި، ކަސްޓަމަރުންނަށް އިޙްތިރާމާއެކު މުޢާމަލާތު ކުރުމުގެ ހުނަރު ލިބިފައިވުމާއި، ޝިފްޓް ޑިއުޓީގައި މަސައްކަތްކުރެވޭނެ ފަރާތެއްކަމުގައިވުމެވެ. އަދި ސްޕީޑް ބޯޓް ކެޕްޓަނުންނަށްވުމަށް ކުރިމަތިލާ ފަރާތަކީ ދޯނި ދުއްވުމުގެ ލައިސަންސް އޮތުމާއެކު ލޯންޗް ދުއްވުމުގެ ތަޖުރިބާ ހުރި ފަރާތެއްކަމުގައިވެސް ވާންޖެހޭނެކަމަށް އެމް.ޓީ.ސީ.ސީން ވިދާޅުވެއެވެ.
ސްޕީޑް ބޯޓް ކެޕްޓަނުންނާއި، ފެރީ ކޮންޑަކްޓަރުންގެ ގޮތުގައި މަސައްކަތް ކުރާ ފަރާތްތަކަށް މުސާރައާއި ޢިނާޔަތްތަކުގެ ގޮތުގައި މަހަކު 10،000 ރުފިޔާއާއި، އިތުރުގަޑީގެ އެލަވެންސްއާއި، ސްޓާފް މެޑިކަލް އިންޝުއަރެންސް ދިނުމަށް އެކުންފުނިިން ވަނީ ނިންމާފައެވެ. މި ދެ މަޤާމަށް ޝައުގުވެރިވާ ފަރާތްތަކަށް އެމް.ޓީ.ސީ.ސީގެ އޮންލައިން ޖޮބް އެޕްލިކޭޝަން ޕޯޓަލް މެދުވެރިކޮށް އަންނަ މެއިމަހުގެ 31ގެ ނިޔަލަށް އެޕްލިކޭޝަން ހުށަހެޅޭނެކަމަށް އެމް.ޓީ.ސީ.ސީން ވިދާޅުވެއެވެ.
ރާއްޖޭގެ އެންމެ އުތުރުން ޒޯން 1 ގައި ފެރީ ނިޒާމުގެ ޚިދުމަތް ފެށުމަށްޓަކާ، ބޭނުންވާ ފެރީތައް ބަނުމުގެ މަސައްކަތްވެސް އެމް.ޓީ.ސީ.ސީން މިހާރުދަނީ ކުރަމުންނެވެ. މި މަސައްކަތް އެކުންފުނިން ކުރަމުންދަނީ، ޔޫ.އޭ.އީގެ މަޝްހޫރު ކުންފުންޏެއްކަމަށްވާ ގަލްފް ކްރާފްޓާއި ހަވާލުކޮށްގެންނެވެ.
ގަލްފް ކްރާފްޓާ ހަވާލުކޮށްފައިވަނީ ޒޯން 1 ގެ ޚިދުމަތް ފެށުމަށް ބޭނުންވާ 17 ފެރީ ބަނުމުގެ މަސައްކަތެވެ. ސަރުކާރުގެ އަމާޒަކީ ޒޯން 1 ގެ ޚިދުމަތް އަހަރުގެ ފަހު ކުއާޓަރުގައި ފެށުމެވެ. އެމްޓީސީސީން ބަނުމަށް ހަވާލުކުރި ފެރީތަކަކީ 50 މީހުންގެ ޖާގައިގެ ފެރީތަކެކެވެ. އަދި ފެރީތަކަކީ 30 ނޮޓްގެ ބާރުމިނުގައި ދުވާ ފެރީތަކެކެވެ. މި ފެރީތައް އެމްޓީސީސީން މިހާރު ބޭނުންކުރާ ފެރީތަކުގެ ސްޕީޑަށްވުރެ ތިން ގުނަ އަވަސްވާނެކަމަށް އެމްޓީސީސީން ވިދާޅުވެއެވެ.