މެރިކަލްޗަރ ޓްރެއިނިން ޕްރޮގްރާމުގެ މިއަހަރުގެ 3ވަނަ ބުރު ފަށައިފި

މެރިން ހެޗަރީ ސްކިލްސް ޑިވެލޮޕްމަންޓް ޕްރޮގްރާމްގެ ދަށުން ކުރިއަށްގެންދާ "ބޭސިކް މެރިކަލްޗަރ ޓްރެއިނިންގ ޕްރޮގްރާމް" ގެ މި އަހަރުގެ ތިންވަނަ ބުރު ފަށައިފިއެވެ. މި ޕްރޮގްރާމް ކުރިއަށްގެންދަނީ މަނިޔަފުށީ ރިސާޗް އެންޑް ޓްރެއިނިންގ ފެސިލިޓީގައެވެ.

މިފަހަރުގެ ތަމްރީން ޕްރޮގްރާމްގައި ޖުމްލަ 15 މީހުން ބައިވެރިވެފައިވެއެވެ. މީގެ ތެރޭގައި އަންހެން ބައިވެރިއަކުވެސް ހިމެނެއެވެ.

މި ޕްރޮގްރާމް ކުރިއަށްގެންދަނީ 14 ދުވަހުގެ މުއްދަތަކަށެވެ. މި ޕްރޮގްރާމުގައި، އެކުއަކަލްޗަރގެ ނިޒާމުތަކާއި، ދިރޭ ކާނާ އާލާކުރުމާއި، ފާނަޔާއި ހުއިފިލަނޑަޔާއި ދިވެހި މާގަނޑުމަސް، އިތާމުތް އަދި ސީވީޑް އާލާކުރުމާއި، އާލާކުރާ ބާވަތްތަކަށް ޖެހޭ ބަލިތައް ދެނެގަނެ ބަލިތަކުން ރައްކާތެރިކުރުމާއި ގުޅޭ މައުލޫމާތު ފޯރުކޮށްދޭނެއެވެ. އަދި މެރިކަލްޗަރ މަސައްކަތްތައް ކުރުމުގައި ތިމާވެށްޓަށް ގެއްލުން ކުޑަވާގޮތަށް މަސައްކަތް ކުރުމާއި ގުޅޭގޮތުން މައުލޫމާތު ދިނުމުގެ އިތުރުން، ފާނަޔާއި ހުއިފިލަނޑާ އަދި މާގަނޑުމަސް އާލާކުރުމުގެ އަމަލީ ތަޖުރިބާ ކޯހުގެ ބައިވެރިންނަށް ކިޔާދޭނެއެވެ.

The third batch of the Basic Mariculture Training Programme for 2026, conducted under the Marine Hatchery Skills Development Programme, officially commenced today at the Maniyafushi Research and Training Facility, with a total of 15 participants, including one female participant.

Over the next 14 days, participants will gain essential knowledge and hands-on experience in mariculture techniques, disease prevention and management, live feed production, and environmental protection practices. The programme aims to strengthen local capacity in mariculture and promote the sustainable development of the aquaculture sector in the Maldives.

— Min of Fisheries, Agriculture and Ocean Resources (@MFAORmv) October 10, 2026

މި ޕްރޮގްރާމްގެ މައިގަނޑު މަގުސަދަކީ މެރިކަލްޗަރ ދާއިރާއިން ދިވެހިންގެ ގާބިލުކަން އިތުރުކުރުމާއި، ރާއްޖޭގެ އެކުއާކަލްޗަރ ސިނާއަތް ދެމެހެއްޓެނިވި ގޮތެއްގައި ކުރިއެރުވުމެވެ. މި ދާއިރާއިން މީހުން ބިނާކުރުމަށް މީގެކުރިން ކޮންމެ އަހަރަކު 2 ޕްރޮގްރާމް ހިންގިނަމަވެސް މި އަހަރުން ފެށިގެން 4 ޕްރޮގްރާމް ހިންގުމަށް ސަރުކާރުން ވަނީ ނިންމާފައެވެ.

މިހާރު ކުރިއަށްމިދަނީ މީގެ 7 ވަނަ ޕްރޮގްރާމެވެ. މިހާތަނަށް މީގެ ދަށުން 76 މީހުން ތަމްރީން ކުރެވިފައިވާކަމަށް މަސްވެރިކަމާ ބެހޭ ވަޒީރު އަޙްމަދު ޝިޔާމް ވަނީ ވިދާޅުވެފައެވެ.