ބޯހިޔާވަހި ކަމުގެ މަޝްރޫއުގެ ދަށުން، ބ.އަތޮޅު ތުޅާދޫގައި އިމާރާތްކުރާ 100 ހައުސިންގ ޔުނިޓްގެ ތެރެއިން މިހާރު އިމާރާތްކޮށް ނިމިފައިވާ 50 ހައުސިން ޔުނިޓް ލިބޭ ފަރާތްތައް ހޮވައިފިއެވެ.
ހައުސިންގ ޔުނިޓަށް އެދި ފޯމް ހުށަހެޅި ފަރާތްތަކުގެ ތެރެއިން އޭ ކެޓަގަރީގައި ހިމެނިގެން ރަށުގެ ރަށްޔިތުންނަށް 21 ހައުސިންގ ޔުނިޓް ލިބިފައެވެ. އަދި ހަމަ މިކެޓަގަރީގައި ހިމެނިގެން ރަށުން ބޭރުގެ 5 ފަރާތަކަށް ހައުސިންގ ޔުނިޓް ލިބިފައެވެ. މި ހައުސިން ޔުނިޓް ހޯދުމަށް އެދި 314 ފަރާތަކުން ވަނީ ފޯމް ހުށައަޅާފައެވެ. ޕޮއިންޓް ހަމަވެގެން ބީ ކެޓަގަރީގެ ނަންތައް ހޮވާފައިވަނީ ގުރުއަތު ނަގައިގެންނެވެ. ބީ ކެޓަގަރީގައި ޕޮއިންޓް ހަމަވެގެން 137 ފަރާތެއްވަނީ ހޮވިފައެވެ. މީގެތެރެއިން 24 ފަރާތުގެ މެދުގައި ނެގުނު ގުރުއަތުލުން ނަގާފައިވަނީ ބ.އަތޮޅު ކައުންސިލްގެ ރައީސް މަބްރޫކް ނަސީރުއެވެ. މި 50 ހައުސިންގ ޔުނިޓުގެ ތެރެއިން ދެމަފިރިންނަށް ހައުސިންގ ޔުނިޓް ލިބުނު ދެ ފަރާތެއްވަނީ ދޫކޮށްލާފައެވެ. އަދި މި ދެ ގެ ދޫކޮށްލުމުން ގުރުއަތު ނަގައިގެން އެ ދެ ހައުސިންގ ޔުނިޓް ލިބޭ ފަރާތްތައްވެސް ވަނީ ހޮވާފައެވެ.
ތުޅާދޫއިން ދޫކުރުމަށް ހަމަޖެހިފައިވާ، 50 ހައުސިން ޔުނިޓަށް ޖުމްލަ 314 ފަރާތަކުން ވަނީ ފޯމް ހުށައަޅާފައެވެ. އަދި ތުޅާދޫއިން ދޫކުރުމަށް ހަމަޖެހިފައިވާ 88 ގޯޗައް އެދި 510 ފަރާތަކުން ވަނީ ފޯމް ހުށައަޅާފައެވެ.