ގދ. މާވަރުލުގައި ތަރައްޤީކުރާ އެއަރޕޯޓުގެ ރަންވޭގެ މަސައްކަތް ނިންމާ، ކުރިއަށް އޮތް ދެމަސް ތެރޭ ޓެސްޓް ފްލައިޓް ޖައްސާނެކަމަށް އެ މަޝްރޫޢުގެ ކޮންޓްރެކްޓަރ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑް، އެމްޓީސީސީން ބުނެފިއެވެ.
ޕީ.އެސް.އެމް ނިއުސްއަށް މަޢުލޫމާތުދެއްވަމުން އެމްޓީސީސީގެ ޕަބްލިކް ރިލޭޝަންސް އޮފިސަރ ޢަލީ ޒައިން ވިދާޅުވީ، މާވަރުލު އެއަރޕޯޓުގެ މަސައްކަތުގެ 90 އިންސައްތަ މިހާރު ނިމިފައިވާކަމަށެވެ. އެގޮތުން އެއަރޕޯޓުގެ ރަންވޭގައި ތާރުއެޅުމުގެ މަސައްކަތް ނިންމާ، ރަންވޭ ކަމިޝަން ކުރުމަށްޓަކާ ވާންޖެހޭ ތައްޔާރީތައް މިހާރު ވަމުންދާކަމަށް ޒަޢީން ވިދާޅުވިއެވެ. އަދި އަމާޒަކީ ކުރިއަށްއޮތް ދެ މަސް ތެރޭ މާވަރުލު އެއަރޕޯޓަށް ޓެސްޓް ފްލައިޓް ޖެއްސުންކަމަށްވެސް އޭނާ ވިދާޅުވިއެވެ.
ގދ. އަތޮޅުގައި ތަރައްޤީކުރާ ދެވަނަ އެއަރޕޯޓުކަމަށްވާ މާވަރުލު އެއަރޕޯޓުގެ މަސައްކަތް ސަރުކާރުން އެންމެ ފުރަތަމަ ފަށާފައިވަނީ 2011 ވަނަ އަހަރުގެ ތެރޭގައެވެ. ނަމަވެސް ތަފާތު ސަބަބުތަކާހުރެ އެއަރޕޯޓުގެ މަސައްކަތް މަޑުޖެހިފައި އޮތުމަށްފަހު އަލުން އެ މަސައްކަތް ސަރުކާރުން އެމްޓީސީސީއާއި ހަވާލުކޮށްފައިވަނީ 2018 ވަނަ އަހަރުގެ މެއިމަހުގެ ތެރޭގައެވެ.
ބާރަ ސަތޭކަ މީޓަރުގެ ދިގު ރަންވޭއަކާއެކު ތަރައްޤީކުރާ މާވަރުލު އެއަރޕޯޓަކީ އެތެރޭގެ އުދުހުންތަކަށް ޙާއްސަކޮށްގެން ތަރައްޤީކުރާ އެއަރޕޯޓެކެވެ. 57 މިލިއަން ރުފިޔާ ޚަރަދުކޮށްގެން ތަރައްޤީކުރާ މި އެއަރޕޯޓުގެ ރަންވޭގެ އިތުރުން، ޓެކްސީވޭއާއި ފްލައިޓްތައް ޕާކުކުރާ އޭޕްރޮން ހެދުމަށްވެސް ހަވާލުކޮށްފައިވަނީ އެމްޓީސީސީއާއެވެ. ރަންވޭގެ މަސައްކަތް މިހާރު ނިމިފައިވާއިރު، އެރަށުގައި ކުރިން އިމާރާތްކުރަން ފަށާފައިވާ ޓަރމިނަލްގެ ޢިމާރާތާއި އެހެނިހެން ޢިމާރާތްތައް ނިންމުމުގެ މަސައްކަތްވެސް ކުރަމުންދާކަމަށް އެމްޓީސީސީން ބުނެއެވެ.