ވިޔަފާރި ބަނދަރުގެ ކެޕޭސިޓީއަށްވުރެ އިތުރަށް ޚިދުމަތްދޭތާ 10 އަހަރު!

ރާއްޖޭގެ މައި ވިޔަފާރި ބަނދަރުގެ ޚިދުމަތް ފަށާފައިވަނީ 1986 ވަނަ އަހަރުއެވެ. މިދިޔަ 40 އަހަރުގެ ތެރޭގައި ވިޔަފާރި ބަނދަރުގެ ކަންކަން ކުރިއެރުވުމަށް މަސައްކަތްތަކެއް ކުރެވިފައިވީ ނަމަވެސް މިއަދުވެސް ބޯޓުތައް ކައިރިކޮށް މުދާ އަރުވާ ބާލަނީ، 30 އަހަރާ ގާތްވެފައިވާ އެ ކީވޯލްއިންނެވެ. މިހާރު ބޭނުންކުރަމުންދާ ކީވޯލްއަކީ، 1997 ވަނަ އަހަރު ތަރައްޤީކޮށް ބޭނުންކުރަން ފެށި 100 މީޓަރުގެ ކީވޯލްއެކެވެ.

ރާއްޖޭގައި ވިޔަފާރިތައް އިތުރުވެ އިޤުތިޞާދު އެތަށް ގުނައަކަށް ފުޅާވަމުންދާއިރު، އިކޮނޮމިކް ޗެއިންގެ އެންމެ މުހިންމު އެއް ޚިދުމަތަށް އޮތީ އެއާ އެއްވަރުގެ ކުރިއެރުމެއް ނުލިބިއެވެ.

2015ވަނަ އަހަރު ވަނީ، ރާއްޖޭގެ މައި ވިޔަފާރި ބަނދަރުން ޚިދުމަތްދެވޭނެ އެންމެ މަތީ ކެޕޭސިޓީއަށް އަރާފައެވެ. އޭގެފަހުން މިހާތަނަށް ޚިދުމަތް ދެމުން އަންނަނީ، ބަނދަރަށް ކަތާވަރަށްވުރެ އެތަށް ގުނައެއް އިތުރަށެވެ.

މާލެ ވިޔަފާރި ބަނދަރު ތިލަފުއްޓަށް ބަދަލުކުރުމަށް ފަށާފައިވާ މަޝްރޫޢަކީ، މުޅި މި ޚިދުމަތުގެ އެންމެ ބޮޑު ޙައްލެވެ. މިހާރު ހިންގަމުންދާ 5 ހެކްޓަރުގެ ބަނދަރު، 60 ހެކްޓަރުގެ ވިޔަފާރި ބަނދަރަކަށް ބަދަލުވެގެންދާނެއެވެ.

މި މަސައްކަތަށް ބޭނުންވާ ޑޮމެސްޓިކް ކީވޯލް ނުވަތަ މަގަތު ފާލަން ތަރައްޤީ ކުރުމުގެ މަސައްކަތް މިހާރު ދަނީ، ކުރަމުންނެވެ. އެމްޕީއެލްގެ ބިއުރޯ މެނޭޖަރ ޙަސަން ޝިފާން ވިދާޅުވީ، އެ މަސައްކަތް މި އޮކްޓޯބަރު މަހުގެ ތެރޭގައި ނިމޭނެ ކަމަށާއި އެއާއިއެކު ބައެއް ޚިދުމަތްތައް ތިލަފުއްޓަށް ބަދަލުކުރާނެ ކަމަށެވެ.

"އެ މަސައްކަތް ނިމުމާއެކު މާލޭ ކޮމާޝަލް ހާބަރުގައި ކުރިއަށްދާ ދޯނި ކްލިއަރެންސް ޚިދުމަތްތައް ތިލަފުއްޓަށް ބަދަލުކުރާނެ. ޖާގައިގެ ވަރަށް ބޮޑު ދަތިކަމަކާއެކު މިހާރު އެ ޚިދުމަތް ދެނީ. ތިލަފުއްޓަށް ބަދަލުކުރީމަ ބޮޑު ލުޔެއް ލިބޭނެ." ޝިފާން ވިދާޅުވިއެވެ.

ބޭރުން މުދާ ގެންނަ ބޯޓުތައް ކައިރިކުރުމަށް އިންޓަރނޭޝަނަލް ކީވޯލްގެ މަސައްކަތް ކުރުމަށް ޗައިނާގެ ހާބަރ އިންޖިނިއަރިން ކުންފުންޏާ ވަނީ ހަވާލުކޮށްފައެވެ. މި މަސައްކަތުގެ ދަށުން 375 މީޓަރުގެ މުދާ ބާލާ ބަނދަރެއް ތަރައްޤީކުރާނެއެވެ. ބަނދަރުގެ ފުންމިނުގައި 14.6 މީޓަރު ހުންނާނެއެވެ. އަދި މި ކީވޯލް 1.4 ކިލޯމީޓަރަށް ބޮޑުކުރުމުގެ ޖާގަ އޮންނާނެއެވެ.

ޑޮމެސްޓިކް ކީ ވޯލް އެއްކޮށް ނިމޭއިރު 2 ކިލޯމީޓަރަށް ޖާގަ ލިބޭނެއެވެ. މިހާރު ބޭނުންކުރަނީ، 100 މީޓަރުގެ ކީވޯލްއެކެވެ. އަދި ކޮންޓެއިނަރ ޔާރޑްގެ މަސައްކަތްވެސް ވަނީ ހަވާލުކޮށްފައެވެ.

"ޖާގަ ދަތިވީމަ މިހާރު ބޮޑެތި ބޯޓުފަހަރަށް މުދާ ބާލަން ކީވޯލްއާ ކައިރި ނުކުރެވޭ. ނަމަވެސް އައު ކީވޯލްއާއެކު ބޮޑެތި ބޯޓަށް ކައިރި ކުރެވޭނެ. އަދި އެއްފަހަރާ ދެ ބޯޓަށްވެސް ޚިދުމަތް ދެވޭނެ. މިހާރު މުދާ ބާލަނީ، ބޯޓުގައި އޮންނަ ކެރޭނުން. އައު ބަނދަރުގައި ޝީޕް ޓު ޝޯރ ކެރޭނު ހުންނާނެ." ޝިފާން ވިދާޅުވިއެވެ.

ޖާގައިގެ ދަތިކަމުގެ ސަބަބުން ޕީކް ބައެއް ދުވަސްވަރު، ބޯޓުން މުދާ ހުސްކުރަން ހަފުތާއެއްވެސް ނަގައެވެ. ނަމަވެސް އައު ބަނދަރާއެކު، މި ޚިދުމަތްތަކުގެ ސްޕީޑް ވަރަށް ބޮޑަށް އަވަސް ކުރެވޭނެއެވެ.

ސަރުކާރުގެ ޢަމާޒަކީ، އަންނަ އަހަރުގެ ނޮވެމްބަރު މަހުގެ ނިޔަލަށް ޕޯޓުގެ %80 މަސައްކަތް ތިލަފުއްޓަށް ބަދަލުކުރުމެވެ. ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެފައިވަނީ، އައު ވިޔަފާރި ބަނދަރު ވެގެންދާނީ ސްޓޭޓް އޮފް ދި އަރޓް ބަނދަރަކަށް ކަމަށެވެ.

ޕޯޓާ ގުޅޭ ބައެއް ޚިދުމަތްތައް މާލޭ އިންޑަސްޓްރިއަލް ޒޯނުގައިވެސް ޤާއިމުކުރާނެ ކަމަށް ރައީސް ވިދާޅުވެފައިވެއެވެ. މި މަޝްރޫޢު ވެގެންދާނީ، ރާއްޖޭގެ މުޅި އިޤްތިޞާދަށް ބޮޑު ފައިދާއެއް ކުރާނެ މަޝްރޫޢަކަށެވެ.