ފަލަސްޠީނުގެ ޣައްޒާގައި ޔަހޫދީން ހިންގަމުންދާ ލާއިންސާނީ ޢަމަލުތަކާ ދެކޮޅަށް ވާހަކަ ދެއްކި އދގެ ކާބޯތަކެތީގެ އަދި ދަނޑުވެރިކަމުގެ އިދާރާގެ (އެފްއޭއޯ) ގެ އިސް މުވައްޒަފަކު ވަޒީފާއިން ވަކިކޮށްފިއެވެ.
މިކަން ހިނގާފައިވަނީ އެ އިދާރާގެ ޑިރެކްޓަރަކު، ޣައްޒާގައި އިންސާނީ ޙައްގުތައް ހިމާޔަތްކުރުމުގެ ނަމުގައި "ކުޅިވަރު ކުޅޭ" ކަމަށް ތުހުމަތުކޮށެވެ.
އެފްއޭއޯގެ ޑައިރެކްޓަރ ބެން ޑޭވިސް އޭއެފްޕީ ނޫހަށް ވިދާޅުވީ، އދގެ ވަކިފަރާތަކަށް ނުޖެހުމުގެ އުޞޫލުތަކާ ޚިލާފުވި ކަމަށް ބުނެ، 26 އަހަރަށްފަހު އޭނާގެ ވަޒީފާގެ އެއްބަސްވުން އައުނުކުރާނެކަން މިދިޔަ ޖުލައި މަހު އަންގާފައިވާ ކަމަށެވެ.
އޭނާ ވިދާޅުވީ، އިޓަލީވިލާތުގެ ރޯމްގައި ހުންނަ އެ އިދާރާގެ ބައެއް މުވައްޒަފުން އެއްކޮށްގެން، ޣައްޒާގައި ކާބޯތަކެތި ނުލިބުމާއި ހައިހޫނުކަމުގެ ޙާލަތާ ގުޅުވައި، ކޮންމެ ހަފްތާއަކު ހިމޭންކަމުގެ ސުކޫތެއް އިންތިޒާމުކުރާކަމުގެ ތުހުމަތު އޭނާގެ މައްޗަށް ކޮށްފައިވާ ކަމަށެވެ.
މީގެ އިތުރުން، މިދިޔަ މެއި މަހު ޝާއިޢުކުރި، ޣައްޒާގައި ކާބޯތަކެތި ލިބެންހުރި މިންވަރާއި އިންސާނީ ޙައްޤުތަކާ ބެހޭ ޤާނޫނާ ގުޅޭގޮތުން ޑޭވިސް މަސައްކަތް ކުރެއްވި ރިޕޯޓަކަށްވެސް ފާޑުކިއުން އަމާޒުވިއެވެ. އޭނާ ވިދާޅުވީ، އެ ރިޕޯޓު އަނބުރާ ނަގައި، އިންސާނީ ޙައްޤުތަކާބެހޭ އެއްވެސް ޤާނޫނަކަށް އެ ރިޕޯޓުގައި ޙަވަލާ ނުދިނުމަށް އެންގި ކަމަށެވެ.
އެފްއޭއޯގެ ޑައިރެކްޓަރ ޖެނެރަލް ކިއު ޑޮންގްޔޫ ވަނީ އިންސާނީ ޙައްޤުތަކުގައި ނަމުގައި "ކުޅިވަރު ކުޅެން" ފުރުޞަތު ނުދޭނެކަމަށް ވިދާޅުވެ، އެފްއޭއޯގެ މުވައްޒަފުންނަށް ނުސީދާކޮށް އިންޒާރު ދެއްވައިފައެވެ. އޭނާ މިހެން ވިދާޅުވީ ޖަންގަލިތަކާ ބެހޭގޮތުން ބޭއްވި، ވީޑިއޯ ކުރެވެމުންދިޔަ ބައްދަލުވުމެއް ފެށުމުގެ ގޮތުން ދެއްކެވި ވާހަކައިގެ ތެރެއިންނެވެ.
އެގޮތުން، އިންސާނީ ޙައްޤުތަކަށް ވަކާލުކުރަން ބޭނުންވާނަމަ، ޖެނީވާގައި ހުންނަ އދގެ އިންސާނީ ޙައްޤުތަކާބެހޭ އިދާރާއަށް ބަދަލުވުމަށް އޭނާ މުވައްޒަފުން ގާތު ވިދާޅުވިކަމަށްވެއެވެ.
އަދި އެފްއޭއޯގެ އުޞޫލުތަކާ ޚިލާފުވާ އެހެން މުވައްޒަފުން ވަކިކުރަން ވެސް ފަސްނުޖެހޭނެކަމުގެ އިންޒާރު އޭނާ ވަނީ ދެއްވައިފައެވެ. އޭނާގެ މި އިންޒާރުގައި ޑޭވިސްގެ ނަމެއް ވަކިން ފާހަގަކޮށްފައެއް ނުވެއެވެ.
ނަމަވެސް، މިކަމާ ގުޅޭގޮތުން އެއްވެސް ވާހަކައެއް ދައްކަން އެފްއޭއޯއިން ވަނީ އިންކާރުކޮށްފައެވެ.
ޑައިރެކްޓަރ ޖެނެރަލްގެ ވާހަކަފުޅުތަކަކީ އޭނާއަށް އަމާޒުކޮށް ދެއްކެވި ވާހަކަތަކެއް ކަމަށް ޤަބޫލުކުރައްވަންތޯ ސުވާލުކުރުމުން ޑޭވިސް ވިދާޅުވީ އެކަމުގައި އެއްވެސް ޝައްކެއްނެތް ކަމަށެވެ.
މާބޮޑަށް ސިޔާސީވާ ކަމަށް ބުނެ، މީގެ ކުރިންވެސް އޭނާއަށް ބަހުގެ ހަމަލާތައް ރައްދުކޮށްފައިވާ ކަމަށާއި، އިތުރު މުވައްޒަފުން ވަކިކުރާނެ ކަމަށް ޑައިރެކްޓަރ ޖެނެރަލް ވިދާޅުވި ވިދާޅުވުމާމެދު "ކަންބޮޑުވާ" ކަމަށް ޑޭވިސް ވިދާޅުވިއެވެ.
ޑޭވިސް ވިދާޅުވީ، އެންމެ ގިނައިން މުވައްޒަފުން ބައިވެރިވި ދުވަސްވަރު އެތަކެއް ސަތޭކަ މުވައްޒަފުން ސުކޫތުގައި ބައިވެރިވާ ކަމަށާއި، ނަމަވެސް މިހާރު ކޮންމެ ހަފުތާއަކު އަންނަނީ 30-40 އާ ދެމެދުގެ ޢަދަދެއްގެ މުވައްޒަފުން ކަމަށެވެ.
2025 އޮކްޓޫބަރުގައި ގަތުލުއާންމުގެ ހަމަލާތައް ހުއްޓާލުމަށް ޔަހޫދީ ފައުޖުން އެއްބަސްވި ނަމަވެސް، އެއާ ޚިލާފަށް ދީފައިވާ ނިރުބަވެރި ހަމަލާތަކުގައި ފަލަސްޠީނުގެ 1،431 މީހުން ޝަހީދުކޮށް، 5،026 މީހުން ޒަޚަމްކޮށްލާފައިވާ ކަމުގައި ޣައްޒާގެ ޞިއްޙަތާބެހޭ ވުޒާރާއިން ހާމަކުރިއެވެ. 2023 އޮކްޓޫބަރުގައި ޣައްޒާގެ ރައްޔިތުންގެ ނަސްލުހޭދުކުރުމަށް ޔަހޫދީން ފެށި ޤަތުލުޢާންމުގައި މިހާތަނަށް ފަލަސްޠީނުގެ 74،000 އަށްވުރެ ގިނަ މީހުން ޝަހީދުކޮށްލައި، 175،000 އަށްވުރެ ގިނަ މީހުން ވަނީ ޒަޚަމްކޮށްލާފައެވެ.