"ޒުވާނުން ޒިންމާދާރުކުރުމުގެ މަސައްކަތް ބަލައިގަނެ ނަތީޖާ ދަނީ ފެންނަމުން"

ޒުވާނުން ޒިންމާދާރުކުރުމަށް ކުރި މަސައްކަތުގެ ނަތީޖާ ރަނގަޅުކަމަށް ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވެއްޖެއެވެ.

ވަޒީރު އެފަދައިން ވިދާޅުވީ ނޭޝަނަލް ސަރވިސް ސްކިލް ޓްރޭނިންގ 2ވަނަ ބެޗްގެ ދަސްވެނިވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަދައްކަވަމުންނެވެ.

ޒުވާނުންނަކީ ހުލްގުހެޔޮ ޒިންމާދާރުބަޔަކަށް ހެދުމަކީ ސަރުކާރުން ޚާއްސަ އިސްކަމެއް ދެއްވާކަމެއްކަމަށް ވަޒީރު ވިދާޅުވިއެވެ. އެގޮތުން މިދިޔަ އަހަރުގެ އޮކްޓޯބަރ 1ގައި ފެށި ވަޠަނީ ޚިދުމަތަށް މިދިޔަ ބުރާސްފަތި ދުވަހު އަހަރެއް ފުރިފައިވާކަމަށާއި، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު އެ ޕްރޮގްރާމާމެދު ކަނޑައެޅި ލަނޑުދަނޑިއަށް ވުރެ އިތުރަށް ޚާސިލްވެފައިވާކަމަށް ވަޒީރު ވިދާޅުވިއެވެ.

އެ އަމާޒަކީ ވަޠަނީ ޚިދުމަތުގެ ތެރެއިން، 1 އަހަރު ތެރޭގައި 1000 ދަރިވަރުން ތަމްރީންކުރުންކަމަށާ، 1 އަހަރު ދުވަސްތެރޭ 1028 ބައިވެރިން ތަމްރީނުކޮށްފައިވާކަމަށް ވަޒީރު ވިދަޅުވިއެވެ.

"ޒުވާނުން އެކި މަގުމަގުން ނޭދެވޭ މަގުތަކުން ދިއުމަށް ބާރު އަޅާ ބަޔަކު އެބަވޭ. އެހެންނަމަވެސް މިއަދު އެކަންކަމުން ޒުވާނުން ސަލާމަތްކުރަން ރައީސް ކަނޑައެޅުއްވި ޕްރޮގްރާމަކީ ދިވެހިން ބަލައިގަންނަ ކަމެއް" ދިފާޢީ އަދި ވަޠަނީ ޚިދުމަތާބެހޭ ވަޒީރު ޙަސަން ރަޝީދު ވިދާޅުވިއެވެ.

ވަޒީރު އިތުރަށް ވިދާޅުވީ ނޭޝަނަލް ސަރވިސް ސްކިލް ޓްރއިނިންގ ފުރިހަމަކުރާ ޒުވާނުންނަށް ދަސްވާ ކަންކަން ދިރިއުޅުމުގެ މާހައުލުގައިވެސް ބޭނުންކުރަންޖެހޭކަމަށެވެ. ކޮންމެ ކަމެއްގައި ވެސް ކާމިޔާބު ވާނީ ހިތްވަރާއެކު މަސައްކަތްކޮށްގެންކަމަށް ފާހަގަކުރައްވާ ވަޒީރު ވަނީ ކަންކަމާއި ކެރިގެން ކުރިމަތިލުމަސް އެ ޓްރެއިނިންގެ ބައިވެރިންނަށް ނަސޭހަތްތެރިވެ ވަޑައިގަންނަވާފައެވެ. އަދި ކޮންމެ ހާލަތެއްގައިވެސް ކެތްތެރިވާ ބަޔަކަށް ވާން ދަސްކުރަންޖެހޭކަމަށް ވަޒީރު ވިދާޅުވިއެވެ.