ޤަވާއިދާ ޚިލާފަށް ޕާކުކޮށްފައިވާ އުޅަނދުތައް ޓޯވ ކުރުމުގެ ޚާއްސަ ހަރަކާތެއް

ހުޅުމާލޭގައި ޤަވާޢިދާ ޚިލާފަށް ޕާކުކޮށްފައިވާ އުޅަނދުތައް ޓޯވ ކުރުމުގެ ޚާއްސަ ހަރަކާތެއް ކުރިއަށްގެންގޮސްފިއެވެ. މިއީ ހުޅުމާލެ ޕޮލިސް އަދި ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީން ގުޅިގެން ހުޅުމާލޭ 2ވަނަ ފިޔަވަހީގައި ކުރިއަށްގެންދިޔަ ހާއްސަ ހަރަކާތެކެވެ.

މި ހަރަކާތާއި ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން އެސިސްޓެންޓް ކޮމިޝަނަރ އޮފް ޕޮލިސް އަދި ހެޑް އޮފް ހުޅުމާލެ ޕޮލިސް އާސިމް ޢަބްދުﷲ ވިދާޅުވީ، ހުޅުމާލޭގެ މަގުތަކުގައި ހިނގާބިނގާވެ އުޅޭ މީހުންނަށް ޚާއްސަކޮށްފައިވާ ދުވާރުތަކުގައާއި، އާންމު ދަތުރުފަތުރަށް ދަތިވާގޮތަށް އުޅަނދު ޕާކުކުރުން އިތުރުވަމުންދާކަން ދިވެހި ފުލުހުންގެ ޚިދުމަތަށް ފާހަގަކުރެވިފައިވާ ކަމަށެވެ.

"އަޅުގަނޑުމެން މިއަދު މި ކުރިއަށްގެންދާ ހަރަކާތަކީ ހުޅުމާލޭގައި ދުވާރުތަކުގައި ޕާކުކޮށްފައިވާ އުޅަނދުތައް ޓޯވ ކުރުމުގެ ޚާއްސަ ހަރަކާތެއް. މިފަދަ ގޮތަކަށް ދުވާރުތަކުގައި އަދި މަގުމަތީގައި ދުއްވާ އުޅަނދުތަކަށް ދަތިވާގޮތަށް އަސްލު އުޅަނދުތައް ޕާކުކުރުމަކީ ހަގީގަތުގައި ވަރަށް ނުރައްކާތެރި ކަމެއް. އެހެންވީމަ މި ހަރަކާތަކީ ހުޅުމާލެއަކީ އަމާން ހިއްފަސޭހަ ތަނަކަށް ހެދުމަށް ކޮންމެހެން ބޭނުންތެރި ހަރަކާތެއް،" އޭސީޕޯ އާސިމް ޢަބްދުﷲ ވިދާޅުވިއެވެ.

މި ހަރަކާތާއި ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން ހައުސިންގ ޑިވެލޮޕްމެންޓް ކޯޕަރޭޝަން، އެޗްޑީސީގެ މެނޭޖިންގ ޑިރެކްޓަރ އަލީ ޒުހައިރު ވަނީ މިފަދަ ހަރަކާތެއް ހުޅުމާލޭގައި ކުރިއަށްގެންދިއުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އަދި މިފަދަ ހަރަކާތްތަކުގެ ސަބަބުން ހުޅުމާލެއަކީ އަމާން ރައްކާތެރި ސަހަރަކަށް ވެގެންދާނެ ކަމަށް ޒުހައިރު ފާހަގަކުރެއްވިއެެވެ.

"ހުޅުމާލޭގައި ނުގަވައިދުން އުޅަނދުތައް ޕާކުކޮށްފައި ހުރުމަކީ އޭގެ ޒާތުގައި ވަރަށް ނުރައްކާތެރި ކަމެއް. އަޅުގަނޑުމެން އެޗްޑީސީން ފުލުހުންނާ ގުޅިގެން އަބަދުވެސް މަސައްކަތް ކުރަމުންމިދަނީ ހުޅުމާލެއަކީ ރައްޔިތުންނަށް ހިތްފަސޭހަ އަދި އަމާން ތަނަކަށް ހެދުމަށް." އެޗްޑީސީގެ އެމްޑީ އަލީ ޒުހައިރު ވިދާޅުވިއެވެ.

ޕީއެސްއެމް ނިއުސްއާ ވާހަކަދެއްކި ބައެއް އާންމުން ވަނީ ދުވާރުތަކުގައި އުޅަނދުތައް ޕާކުކޮށްފައި ހުރުމުގެ ސަބަބުން ދިމާވާ އުނދަގޫތައް ހިއްސާކޮށްފައެވެ. އަދި ވަކިން ހާއްސަކޮށް އުޅަނދުތައް ޕާކުކޮށްފައި މަގުމަތީގައި ޕާކުކޮށްފައިހުރުމުގެ ސަބަބުން މަގުމަތީގައި ދުއްވަންވެސް އުނދަގޫ ކަމަށް އެ ފަރާތްތަކުން ފާހަގަކުރިއެވެ.

"އަސްލު ދުވާރުތަކުގައި އުޅަނދުތައް ޕާކުކުރުމަކީ ހަމަ ވަރަށް ބޮޑަށް ހިންގަންވެސް އުނދަގޫވާ ކަމެއް. އެގޮތަށް ޕާކުކޮށްފަ ހުންނާތީ ހަމަ ގިނަފަހަރަށް ދަރިން އަދި މަންމަމެން ގޮވައިގެން މި ޖެހެނީ މަގުމެދުން ހިންގަން. އެހެންވެ އަޅުގަނޑު ގަބޫލުކުރާ ގޮތުގައި މިއީ ވަރަށްވެސް މުހިންމު ކަމެއް ކުރަން،" ޕީއެސްއެމް ނިއުސްއާ ވާހަކަދެއްކި މީހަކު ބުންޏެވެ.

ނުގަވައިދުން އުޅަނދު ޕާކުކުރުމަކީ ނުރައްކާތެރި އެކްސިޑެންޓުތައް ހިނގަން މެދުވެރިވާ ކަމަކަށްވާތީ، އާންމު ރައްޔިތުންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުންނާއި މަގުމަތީގެ އަމާންކަން ދެމެހެއްޓުމަށްޓަކައި، އެފަދަ ސަރަހައްދުތަކުގައި އުޅަނދު ޕާކު ނުކުރުމަށް އެންމެހައި ފަރާތްތަކަށް ދިވެހި ފުލުހުންގެ ޚިދުމަތުން ވަނީ ޢިލްތިމާސް ކުރައްވާފައެވެ. އަދި މިގޮތަށް ޕާކުކޮށްފައި ހުންނަ އުޅަނދުތަކާމެދު ފިޔަވަޅު އަޅަމުންގެންދާނެ ކަމަށް ފުލުހުން ވިދާޅުވެއެވެ.

މަގުމަތީގެ އުސޫލުތަކާއި ޓްރެފިކް ޤާނޫނާއި ޤަވާއިދުތަކަށް ތަކުރާރުކޮށް ޚިލާފުވާ ފަރާތްތަކާމެދު ޚާއްސަ ފިޔަވަޅުތަކެއް އަޅަމުންދާނެކަމަށް ފުލުހުން ވިދާޅުވެއެވެ. އަދި ޓްރެފިކްގެ އާންމު އުސޫލުތަކަށާއި، އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ހައްޤުތައް ގެއްލި، ނުރައްކާތެރި އެކި ހާދިސާތައް ހިނގަމުންދާ ކަމަށްވެސް ދިވެހި ފުލުހުންގެ ޚިދުމަތުން ވަނީ ވިދާޅުވެއެވެ.