ފަތުރުވެރިކަމަށް 54 އަހަރު: ދުނިޔެއަށް ލާމަސީލު ނަމޫނާއެއް!

ކޮންމެ އަހަރެއްގެވެސް އޮކްޓޫބަރު މަހުގެ 3ވަނަ ދުވަސް ފާހަގަކުރަނީ، ދިވެހިރާއްޖޭގެ ފަތުރުވެރިކަމުގެ ދުވަހުގެ ގޮތުގައެވެ. ޤައުމީ ފަތުރުވެރިކަމުގެ ދުވަހުގެ ގޮތުގައި މިދުވަސް ފާހަގަކުރުމަށް ސަރުކާރުން ނިންމެވީ، 2021 ވަނަ އަހަރުއެވެ. މިދުވަސް ރާއްޖޭގެ ފަތުރުވެރިކަމުގެ ދުވަހުގެ ގޮތުގައި ފާހަގަކުރެއްވުމަށް ނިންމެވީ، އެއީ ރާއްޖޭގެ އެންމެ ފުރަތަމަ ރިސޯޓު ހުޅުވި ދުވަސްކަމަށްވާތީއެވެ.

ރާއްޖެ އުފެދިފައިވާގޮތުން ފަތުރުވެރިކަމަކީ، ރާއްޖޭގައި ކުރިއެރުވިދާނެ ކަމެއްކަމަކަށް ގިނަ ބަޔަކު ކުރިން ގަބޫލެއް ނުކުރެއެވެ. ރާއްޖޭގައި ފަތުރުވެރިންކަން ފެށީ، އިޓަލީވިލާތުގެ ރައްޔިތެއް ކަމަށްވާ ޖޯޖް ކޯބިން ރާއްޖެ އައި ހިސާބުންނެވެ.

ޖޯޖް ކޯބިން ރާއްޖެ އައިސް ދެއްވި ލަފާޔާއެކު މުހައްމަދު އުމަރު މަނިކާއި، ހުސައިން އަފީފް އަދި ކެރަފާ ނަސީމް ފަދަ ބޭފުޅުންގެ ބެއްލެވުމުގެ ދަށުން ރާއްޖެއަށް އެންމެ ފުރަތަމަ ފަތުރުވެރިންގެ ގްރޫޕެއް އައީ، 16 ފެބްރުއަރީ 1972 ގައެވެ. އެމީހުން ރާއްޖޭގައި ތިބީ، 12 ދުވަހަށެވެ.

ރާއްޖެ ޒިޔާރަތްކުރި ފަތުރުވެރިންގެ ފުރަތަމަ ގުރޫޕުގައި އިޓަލީވިލާތުގެ ބައެއް ނޫސްވެރިންވެސް ތިއްބެވެ. އެ ދަތުރުގައި އެމީހުންނަށް ކުރި ތަޖުރިބާ އަނބުރާ ޤައުމަށް ގޮސް އެމީހުން ވަނީ ނޫސްތަކުގައި ލިޔެފައެވެ. މިއީ، އެހެން މީހުންނަށް ރާއްޖެ އެނގެން މެދުވެރިވި އެއް ސަބަބެވެ. އަދި މި ދަތުރަށްފަހު ރާއްޖޭގައި ރިސޯޓެއް ހެދުމުގެ މަޝްވަރާވެސް ވަނީ ކޮށްފައެވެ.

ރާއްޖޭގެ އެންމެ ފުރަތަމަ ރިސޯޓު ހުޅުވީ، 1972 ވަނަ އަހަރުގެ އޮކްޓޫބަރު މަހުގެ 3 ވަނަ ދުވަހުއެވެ. އެއީ، މާލެ އަތޮޅުގެ ވިހަމަނާފުށި ނުވަތަ މިހާރުގެ ނަމުންނަމަ ކުރުނބާ މޯލްޑިވްސްއެވެ. ކުރުނބާ މޯލްޑިވްސް ރިސޯޓަކީ، 30 ކޮޓަރީގެ ރިސޯޓެކެވެ. އެއީ، މުޅި ޖުމްލަ 60 އެނދެވެ.

މިއަދު ރާއްޖޭގެ ފަތުރުވެރިކަމަށް ވަނީ ބޮޑެތި ކުރިއެރުންތަކެއް ހޯދާފައެވެ. މިއަދު ރާއްޖޭގައި އޮތީ، ދުނިޔޭގެ އެންމެ މަޝްހޫރު އަދި ލަގްޒަރީ ފަތުރުވެރިކަމެވެ. މި ވަގުތު ރާއްޖޭގައި ޖުމްލަ 1,280 ޓޫރިސްޓް ފެސިލިޓީގައި 67،869 އެނދު ހިންގައެވެ. މީގެ ތެރޭގައި 179 ރިސޯޓާއި، 920 ގެސްޓްހައުސްއާއި، 16 ހޮޓެލް އަދި 165 ސަފާރީ އުޅަނދު ހިމެނެއެވެ.

ރާއްޖެ އަންނަ ފަތުރުވެރިންގެ އަދަދުވެސް ދުވަހެއް ދުވަހަކަށް އިތުރުވަމުން އަންނައިރު މިދިޔަ އަހަރު ނިމުނުއިރު ރާއްޖެއަށް 2.2 މިލިޔަން ފަތުރުވެރިން ވަނީ ޒިޔާރަތްކޮށްފައެވެ. އަދި މި އަހަރުގެ މިހާތަނަށް ރާއްޖެއަށް 1.6 މިލިޔަން ފަތުރުވެރިން ޒިޔާރަތްކޮށްފައިވެއެވެ.

އިޤުތިޞާދީ ގޮތުން ބަލާއިރު، ރާއްޖޭގެ ޤައުމީ އުފެއްދުންތެރިކަމުގެ 28 އިންސައްތަ ހިއްސާ ކުރަނީ ފަތުރުވެރިކަމުންނެވެ. އަދި ރާއްޖެއަށް ލިބޭ ބޭރު ފައިސާގެ ބޮޑު އިންސައްތައެއް ފަތުރުވެރިކަން ހިއްސާކުރެއެވެ.

ރާއްޖޭގެ ފަތުރުވެރިކަމަކީ، މިއަދު އިތުރު ތަޢާރަފަކަށް ބޭނުންވާނެ މަންޒިލެއް ނޫނެވެ. ރާއްޖެއިން ވަނީ ވިދިވިދިގެން 7 އަހަރު ވޯލްޑް ލީޑިން ޑެސްޓިނޭޝަން ނުވަތަ އެންމެ މަޤުބޫލު މަންޒިލުގެ ޝަރަފްވެސް ހޯދާފައެވެ.

ފަތުރުވެރިކަމަށް 54 އަހަރު ފުރުނުއިރު ރާއްޖޭގެ ފަތުރުވެރިކަން މުޅި ރާއްޖެއަށް ފުޅާކުރުމަކީ، މި ސިނާއަތުގެ ކުރިމަގަށްޓަކައި މުހިންމު ކަމެކެވެ. ލާމަރުކަޒީ އުސޫލުން ފަތުރުވެރިކަން ކުރިއަރުވައި، ރާއްޖޭގެ ރަށްތަކުގެ ތަފާތު ސަޤާފަތާއި ރީތިކަން ދުނިޔެއަށް ދައްކުވައިދިނުމަކީ ކުރިއަށް އޮތްތަނުގައި އަހަރެމެންގެ އަމާޒުކަމުގައި ވާންޖެހެއެވެ. ސަރުކާރުން އަންނަނީ، ރާއްޖޭގެ ފަތުރުވެރިކަން އިތުރަށް ތަރައްޤީ ކުރުމަށް މުހިންމު އަދި ގިނަ މަޝްރޫޢުތަކެއް ކުރިއަށް ގެންދަވަމުންނެވެ..