އިންޑިއަން އޯޝަންސް ލީޑިން ޑެސްޓިނޭޝަންގެ މަޤާމު 7 ވަނަ ފަހަރަށް ރާއްޖެއަށް

އިންޑިއަން އޯޝަންސް ލީޑިން ޑެސްޓިނޭޝަންގެ މަޤާމު 7 ވަނަ ފަހަރަށް ރާއްޖެއަށް ލިބިއްޖެއެވެ. ރާއްޖެއަށް މީގެއިތުރުން 4 ދާއިރާއަކުން އެވޯޑު ލިބިފައިވާއިރު ވިޒިޓް މޯލްޑިވްސް ކޯޕަރޭޝަނަށް ވަނީ އިންޑިއަން އޯޝަންސް ލީޑިންގ ޓޫރިސްޓް ބޯޑުގެ ލަޤަބުވެސް ލިބިފައެވެ.

ދުނިޔޭގެ ފަތުރުވެރިކަމުގެ ދުވަހާ ގުޅުވައިގެން ކްރޮސް ރޯޑްސްގައިވަނީ "ވޯލްޑް ޓްރެވެލް އެވޯޑްސް އޭޝިއާ، އޯޝޭނިއާ އެންޑް އިންޑިއަން އޯޝަން ގާލާ 2026" ބާއްވާފައެވެ. މިހަފްލާގައި ރާއްޖެއިން 5 އެވޯޑެއްވަނީ ހޯދާފައެވެ.

އެންމެ ފާހަގަކޮށްލެވޭ އެވޯޑަކީ ޖެހިޖެހިގެން 7 ވަނަ ފަހަރު ރާއްޖެއިން އިންޑިއަން އޯޝަންސް ލީޑިން ޑެސްޓިނޭޝަންގެ މަޤާމު ހޯދުމެވެ. މީގެއިތުރުން ރާއްޖެއިން ވަނީ އިންޑިއަން އޯޝަންސް ލީޑިންގ ޑައިވް ޑެސްޓިނޭޝަން 2026އާއި އިންޑިއަން އޯޝަންސް ލީޑިން ގްރީން ޑެސްޓިނޭޝަން 2026، އަދި އިންޑިއަން އޯޝަންސް ލީޑިންގ ހަނީމޫން ޑެސްޓިނޭޝަން 2026 ލިބިފައެވެ. މީގެއިތުރުން އިންޑިއަން އޯޝަންސް ލީޑިންގ ޓޫރިސްޓް ބޯޑުގެ ލަޤަބުވަނީ ވިޒިޓް މޯލްޑިވްސް ކޯޕަރޭޝަނަށް ލިބިފައެވެ.

ވިޒިޓް މޯލްޑިވްސްއިން ވިދާޅުވީ، މިހަފްލާގެ ތެރެއިން ރާއްޖޭގެ 15އަށްވުރެ ގިނަ ފަތުރުވެރިކަމުގެ ބްރޭންޑްތަކުން އިންޑިއާ ކަނޑުގެ އެކި ދާއިރާތަކުން އެވޯޑު ހާސިލުކޮށްފައިކަމަށެވެ. އޭގެ ތެރޭގައި ރިސޯޓުތަކާއި، ލަގްޒަރީ ހޮސްޕިޓޭލިޓީއާއި އެވިއޭޝަންއާއި، ޑައިވިން، އާއިލީ އަދި ހަނީމޫން ދަތުރުތަކާއި، ޕްރައިވެޓް އައިލެންޑް ތަޖުރިބާތަކާއި، ސުޕަރ ޔޮޓް ފަތުރުވެރިކަމުގެ އިތުރުން ޒިންމާދާރު ފަތުރުވެރިކަމުގެ ދާއިރާތައް ހިމެނޭކަމަށް ވިޒިޓް މޯލްޑިވްސްއިން ވިދާޅުވެއެވެ.

ރާއްޖެއިންވަނީ 2020 ވަނަ އަހަރުން ފެށިގެން 2025 އާއި ހަމައަށް ޖެހިޖެހިގެން 6 އަހަރު ދުނިޔޭގެ އެންމެ ކުރިއަރާފައިވާ މަންޒިލްގެ މަޤާމު ހޯދާފައެވެ. މީގެއިތުރުންވެސް ވޯލްޑްސް ލީޑިންގ ޓޫރިސްޓް ބޯޑާއި ލީޑިންގ ގްރީން ޑެސްޓިނެޝަނާއި ލީޑިންގ ބީޗް ޑެސްޓިނޭޝަންގެ ފަދަ ދާއިރާތަކުންވެސް ރާއްޖެއިންވަނީ ކާމިޔާބުކޮށްފައިވެއެވެ.

މިއަހަރުގެ ގާލާ ހަރަކާތުގައި ދުނިޔޭގެ 40 އަށްވުރެ ގިނަ ޤައުމުން ފަތުރުވެރިކަމުގެ ދާއިރާގެ އިސްފަރާތްތަކުން ވަނީ ބައިވެރިވެފައެވެ. އޭގެތެރޭގައި ޓޫރިސްޓު ބޯޑާއި، ހޮޓާތަކާއި، ރިސޯޓުތަކުގެ އިތުރުން އެއަރލައިންތަކާއި ފަތުރުވެރިކަމުގެ މީޑިއާތައް ހިމެނެއެވެ.

މިހަފްލާ ޝަރަފުވެރިކޮށްދެއްވީ ފަތުރުވެރިކަމާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީންއެވެ.
ވޯލްޑް ޓްރެވެލް އެވޯޑްސްއަކީ 1993 ވަނަ އަހަރުން ފެށިގެން ސިލްސިލާކޮށް ބާއްވަމުން އަންނަ ދުނިޔޭގެ ފަތުރުވެރިކަމާއި ދަތުރުފަތުރުގެ ސިނާއާތުގައި ދެމުން އަންނަ އެންމެ ޝަރަފުވެރި އެވޯޑެވެ.