ރައީސް މާޅޮސްމަޑުލު އުތުރު ބުރިއަށް: ދެއްވީ ތަރައްޤީގައި ހަޤީޤީ ކުލަ ޖައްސައިދެއްވާނެކަމުގެ ޔަޤީންކަން

ސަރުކާރުގެ މަސައްކަތްތައް ބައްޓަންކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އެންމެ މުހިންމު އެއް ސިޔާސަތަކީ ރައްޔިތުންނާ ވީހާވެސް ގާތުން ޚިދުމަތްދީ، ރައްޔިތުން ބޭނުންވާގޮތަށް ތަރައްޤީގެ ކަންކަން ބައްޓަންކުރެއްވުމެވެ.

މި އަމާޒަށް ކަންކަން ބައްޓަންކުރެއްވުމަށްޓަކާ އެމަނިކުފާނު ގެންދަވަނީ ރަށްރަށަށް ސިލްސިލާ ދަތުރުފުޅުތައް ކުރައްވަމުންނެވެ. މިގޮތުން އެމަނިކުފާނު އެންމެފަހުން ވަޑައިގަތީ މާޅޮސްމަޑުލު އުތުރު ބުރީގެ 11 ރަށަކަށެވެ. ރ. އަތޮޅަށް ކުރެއްވި ދަތުރުފުޅުގެ ތެރެއިން އެ އަތޮޅުގެ ތަރައްޤީއަށް ބޭނުންވާ ކަންކަމުގައި ހަޤީޤީ ކުލަ ޖައްސައިދެއްވާނެކަމުގެ ޔަޤީންކަން ރައީސުލްޖުމްހޫރިއްޔާ ވަނީ ދެއްވާފައެވެ.

ރައީސުލްޖުމްހޫރިއްޔާ ރ. އަތޮޅަށް ކުރެއްވި ދަތުރުފުޅުގައި އެއަތޮޅު ވާދޫ، ރަސްގެތީމު، އަނގޮޅިތީމު، އުނގޫފާރު، ހުޅުދުއްފާރު، މަޑުއްވަރީ، ރަސްމާދޫ، އިންނަމާދޫ، ކިނޮޅަސް، ފައިނު އަދި މާކުރަތަށް ވަނީ ވަޑައިގެންފައެވެ. މި ދަތުރުފުޅުގެ ތެރެއިން ބައެއް ރަށްރަށުގައި ތަރައްޤީގެ ބައެއް މަޝްރޫޢުތައް އެމަނިކުފާނު ވަނީ އިފްތިތާޙްކޮށްދެއްވާފައެވެ.

އެގޮތުން ރަސްގެތީމު އައު އޮފީސް އިމާރާތާއި، އިންނަމާދޫ ވޮލީކޯޓުގެ އިތުރުން ރ. ފައިނުގެ ފެނާއި ނަރުދަމާ ނިޒާމުގެ ޚިދުމަތް މި ދަތުރުފުޅުގެ ތެރެއިން ވަނީ ރައީސުލްޖުމްހޫރިއްޔާ ވަނީ އިފްތިތާޙްކޮށްދެއްވާފައެވެ. ހަމައެހެންމެ އައީޑީ ކާޑާއި ޕާސްޕޯޓުގެ ޚިދުމަތް މުޅި ރާއްޖެއަށް ފުޅާކުރުމަށް ކުރައްވާ މަސައްކަތުގެ ދަށުން މި ދަތުރުފުޅުގެ ތެރެއިން ރ. އަތޮޅުގައި މި ޚިދުމަތް ރަސްމީކޮށް ވަނީ ފަށާފައެވެ.

މި ދަތުރުފުޅުގެ ތެރެއިން ރައީސުލްޖުމްހޫރިއްޔާ ވަޑައިގަތް 11 ރަށުގެ ތެރެއިން 9 ރަށެއްގައި ބީއެމްއެލްގެ އޭޓީއެމް ބެހެއްޓުމަށާއި، ދެ ރަށެއްގައި އިސްލާމިކް ބޭންކްގެ އޭޓީއެމް ބެހެއްޓުމަށް ކައުންސިލްތަކާއެކު ވަނީ އެއްބަސްވުމުގައި ސޮއިކޮށްފައެވެ. އަދި 6 ރަށެއްގައި ކައުންސިލްގެ އައު އިމާރާތުގެ ބިންގާ އެޅުމާއި، 2 ރަށެއްގެ ފުލުހުންގެ ޚިދުމަތް ފެށުމަށް އައު އިމާރާތުގެ ބިންގާވެސް ވަނީ އަޅާފައެވެ.

ކުޑަރަށެއް ބޮޑު ރަށެއް ތަފާތު ނުކުރައްވާ ތަރައްޤީކޮށްދެއްވާނެކަމަށް ވިދާޅުވި

ރައީސުލްޖުމްހޫރިއްޔާ ރ. އަތޮޅަށް ކުރެއްވި 3 ދުވަހުގެ ދަތުރުފުޅުގައި އެމަނިކުފާނު ވަނީ ވަޑައިގެންނެވި ރަށްރަށުގެ ކައުންސިލްތަކާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކާއި އެރަށްރަށުގެ މުއައްސަސާތަކުގެ ވެރިންނާ ބައްދަލުކުރައްވާފައެވެ.

އެންމެ ޚާއްސަކަމެއްގެ ގޮތުގައި އެމަނިކުފާނު ވަޑައިގެންނެވި 11 ރަށުގެވެސް ރައްޔިތުންނާ ބައްދަލުކުރައްވާ، އެރަށްރަށުގެ ތަރައްޤީއަށް ރައްޔިތުން އެންމެ ބޭނުންވެފައިވާ ކަންކަން ފުރިހަމަކޮށްދެއްވުމަށް ކުރައްވާ މަސައްކަތުގެ ތަފްޞީލު އެ ރަށްރަށުގެ ރައްޔިތުންނާ ވަނީ ހިއްސާކުރައްވާފައެވެ.

މި ދަތުރުފުޅުގެ ތެރެއިން ރ. އަތޮޅުގެ ރަށްރަށަށް ވަޑައިގެން ރައީސުލްޖުމްހޫރިއްޔާ ދެއްކެވި މުހިންމު ވާހަކަފުޅުތަކުގެ ތެރޭގައި ރ. އަތޮޅުގެ ތަރައްޤީއަށް އެމަނިކުފާނު ރިޔާސީ އިންތިޚާބުގެ ކެމްޕޭން ދުވަސްވަރު ވެވަޑައިގެންފައިވާ ވަޢުދުފުޅުތަކުގައި ޢަމަލީ ސިފަ މިއަހަރާއި އަންނަ އަހަރުގެ ތެރޭގައި ޖެހިގެންދާނެކަމުގެ ޔަޤީންކަން ވަނީ ދެއްވާފައެވެ.

އެގޮތުން ރަށްރަށަށް ކުރިމަތިވެފައިވާ ބަނދަރުގެ ޖާގައިގެ ދަތިކަމާއި، ބޯހިޔާވަހިކަމާއި، ތިމާވެއްޓާއި، ތަޢުލީމާއި ޞިއްޙަތާއި، ކުޅިވަރުގެ ރޮނގުން ހުރި މައްސަލަތަކަށް ހައްލު ގެނެސްދެއްވާނެކަމުގެ އުއްމީދު އެމަނިކުފާނު ވަނީ ދެއްވާފައެވެ. އަދި މިކަމުގައި ކުޑަ ރަށެއް ބޮޑު ރަށެއް ތަފާތު ނުކުރައްވާނެކަމަށާއި، މަޝްރޫޢުތައް ހިންގުމުގައި ރައްޔިތުން ބޭނުންވާގޮތަށް އިސްކަންދޭ ތަރުތީބުން ކުރިއަށްގެންގޮސްދެއްވާނެކަމަށް ރައީސް ވިދާޅުވިއެވެ.

ހަމައެހެންމެ އެމަނިކުފާނު އިޢުލާންކުރައްވާފައިވާ އައު މަޝްރޫޢުތަކުގެ އިތުރުން، ތަފާތު ސަބަބުތަކާހުރެ ރަށްރަށުގައި ހުއްޓިފައިވާ މަޝްރޫޢުތައް ވީހާވެސް އަވަހަށް ފުރިހަމަކޮށްދިނުމަށް ކުރަންޖެހޭ ކަންކަން ކުރައްވާނެކަމަށްވެސް ރައީސް ވިދާޅުވިއެވެ.

މި ދަތުރުފުޅުގެ ތެރެއިން އިޢުލާންކޮށްދެއްވި ބައެއް މުހިންމު ކަންކަން:

ރ. އަތޮޅަށް ރައީސް ކުރެއްވި ދަތުރުފުޅުގެ ތެރެއިން އިޢުލާންކުރެއްވި ބައެއް މުހިންމު ކަންކަމުގެ ތެރޭގައި އާރްޓީއެލް ފެރީގެ ޚިދުމަތް ދެން އެންމެ އަވަހަށް ފެށޭނެ އަތޮޅަކީ ރ. އަތޮޅުކަން ފާހަގަކުރައްވާ ޖުލައިމަހުގެ ކުރިން ރ އަދި ބ އަތޮޅުގައި މި ޚިދުމަތް ފެށިގެންދާނެކަން ވަނީ އިޢުލާންކުރައްވާފައެވެ.

އަރބަން ސެންޓަރުގެ ގޮތުގައި ތަރައްޤީ ކުރެއްވުމަށް ރައީސުލްޖުމްހޫރިއްޔާ ކަނޑައަޅުއްވާފައިވާ 7 ރަށުގެ ތެރޭގައި ހިމެނޭ އުނގޫފާރަކީ ހުރިހާ ޚިދުމަތެއް އެންމެ މަތީފަންތީގައި ލިބޭ ރަށަކަށް ހައްދަވައިދެއްވާނެކަމަށާއި، ރ. އުފުލަންދޫއަކީ މަޑުއްވަރީގެ ބައެއްގެ ގޮތުގައި ހަމަޖައްސަވައި، އެރަށަށް ދިމާވެފައިވާ ބިމުގެ ޖާގައިގެ މައްސަލައަށް ފުރިހަމަ ޙައްލެއް ގެނެސްދެއްވާނެކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ. އަދި އެމަނިކުފާނު ވަޢުދުވެވަޑައިގެންނެވިގޮތަށް ރ. އުނގޫފާރުގައި ފީފާ ފެންވަރުގެ ފުޓުބޯޅަ ދަނޑަކާއި، ރ. ފައިނުގައި ތަރައްޤީކުރުމަށް އިޢުލާންކުރައްވާފައިވާ އެއަރޕޯޓު މަޝްރޫޢު ހަޤީޤަތަކަށް ހައްދަވައިދެއްވާނެކަމުގެ ޔަޤީންކަން ރ. އަތޮޅުގެ ރައްޔިތުންނަށް ރައީސުލްޖުމްހޫރިއްޔާ ވަނީ ދެއްވާފައެވެ.

ރ. އަތޮޅަކީ ބޯޓު ބަނުމުގެ މަސައްކަތް ފުޅާ ދާއިރާއެއްގައި ކުރާ ސަރަޙައްދެއްކަމުން މި ސިނާޢަތް ތަރައްޤީކުރެއްވުމަށް ސަރުކާރުން ގެންގުޅުއްވާ ސިޔާސަތުތައްވެސް ރައީސުލްޖުމްހޫރިއްޔާ ވަނީ ހާމަކުރައްވާފައެވެ. އެގޮތުން މި ދަތުރުފުޅުގެ ތެރެއިން ރ. އިންނަމާދޫއަށް ވަޑައިގެން އެރަށުގެ އޮޑިވެރިންނާއި މާވަޑިންނާ ރައީސް ވަނީ ބައްދަލުކުރައްވާ، މި ސިނާޢަތުގައި ހުރި ކަންބޮޑުވުންތައް އަޑުއައްސަވާފައެވެ. އަދި އޮޑިދޯނިފަހަރު ބަނުމުގެ ދާއިރާގެ ވަޑިންނަށް ރަހުނަކާ ނުލައި ލޯނު ލިބޭނެ އިންތިޒާމު ހަމަޖައްސަވައި، މި ދާއިރާއަށް މީހުން ބިނާކުރުމަށްޓަކައި ޚާއްސަ މަރުކަޒެއް އިންނަމާދޫގައި ތަރައްޤީކޮށްދެއްވާނެކަމަށް މި ދަތުރުފުޅުގެ ތެރެއިން ރައީސުލްޖުމްހޫރިއްޔާ ވަނީ އިޢުލާންކޮށްދެއްވާފައެވެ.

ޕާކުތަކާއެކު ތުއްތުކުދިންނާއި އާއިލާތަކަށް ހިނިތުންވުން ގެނެސްދެއްވާނެކަމަށް ވިދާޅުވި

ރައީސުލްޖުމްހޫރިއްޔާ ރ. އަތޮޅަށް ކުރެއްވި ދަތުރުފުޅުގެ ތެރެއިން އެމަނިކުފާނު އެންމެ ގިނަ ވަގުތު ހުސްކުރެއްވީ ރައްޔިތުންގެ ޙާލަތު ވީހާވެސް ގާތުން ބެއްލެވުމަށާއި، ރައްޔިތުންގެ ހުރި ކަންބޮޑުވުންތައް އަޑުއައްސަވާ، އެކަންކަން ޙައްލުކޮށްދެއްވުމަށް ކަމާގުޅުންހުރި އިދާރާތައް މެދުވެރިކޮށް ކުރެވެންހުރި ކަންކަމާގުޅޭގޮތުން މަޝްވަރާކުރެއްވުމަށެވެ.

ރައްޔިތުންނާއެކު ބޭއްވެވި ބައްދަލުކުރެއްވުންތަކުގެ އިތުރުންވެސް އެކި އުމުރުފުރާގެ ރައްޔިތުންގެ ހުރި ކަންބޮޑުވުންތައް ސީދާ ރައީސުލްޖުމްހޫރިއްޔާއަށް ދެންނެވުމުގެ ފުރުޞަތު މި ދަތުރުފުޅުގެ ތެރެއިން އެމަނިކުފާނު ވަނީ ފަހިކޮށްދެއްވާފައެވެ. އަދި ރަށްރަށަށް ވަޑައިގެންނެވިއިރު، އެމަނިކުފާނާއި ސަލާމްކުރެއްވުމަށް އެއްވި ރައްޔިތުންގެ ތެރެއިން އެމަނިކުފާނަށް ލިބިވަޑައިގެންނެވި "ނޯޓުކޮޅު ކޮޅުކޮޅުގައި" ހުރި ކަންކަމަށް އިޝާރަތްކުރައްވާވެސް ރައީސް ވަނީ ވާހަކަފުޅުދައްކަވާފައެވެ.

ތަރައްޤީއަކީ ހަމައެކަނި އުސް އިމާރާތްތަކާއި ބޮޑެތި ބިޔަ މަޝްރޫޢުތައް އެކަނި ނޫންކަން ފާހަގަކުރައްވާ، ތުއްތުކުދިންނާއި އާއިލާތަކަށް ބޭނުންވާ އުފާވެރިކަމާއި ހިތްހަމަޖެހުން ހޯއްދަވައިދެއްވުމަށްވެސް ޚާއްސަ އިސްކަމެއްދެއްވާނެކަމަށް ރައީސް ވަނީ ވިދާޅުވެފައެވެ. އެގޮތުން ތުއްތުކުދިންނާއި އާއިލާތަކަށް އުފާވެރިކަމާއި ހިތްހަމަޖެހުމާއެކު ވަގުތު ހޭދަކުރުމަށް ބޭނުންވާ ޕާކުތަކާއި ފިނިމައިޒާންތައް ޤާއިމުކޮށްދެއްވާނެކަމަށް ރައީސް ވަނީ ވިދާޅުވެފައެވެ.

ރައީސުލްޖުމްހޫރިއްޔާ ރ. އަތޮޅަށް ކުރެއްވި ދަތުރުފުޅުގައި ރައްޔިތުންނާ މުޚާތަބުކުރައްވާ ދެއްކެވި ވާހަކަފުޅުތަކުގައި ދެއްވި ޔަޤީންކަމަކީ އެރަށްރަށުގެ ތަރައްޤީއާއި ކުރިއެރުމަށް ބޭނުންވާ ކަންކަން ބާރު ދުވެލީގައި ކުރިއަށްގެންގޮސްދެއްވާނެކަމަށެވެ. ރައްޔިތުންގެ އުއްމީދުތަކުގައި ހަޤީޤީ ކުލަ ޖައްސަވައިދެއްވާނެކަމަށެވެ. އަދި އެމަނިކުފާނު ދެން އެ ރަށްރަށަށް ވަޑައިގަންނަވާނީ ރައްޔިތުންގެ އުއްމީދުތައް ހާޞިލުކޮށްދީ، އެކަމުގެ އުފަލުގައި ބައިވެރިވެވަޑައިގަތުމަށްކަމަށެވެ.