ހަކަތަ މަދުންބޭނުންކުރާ ލޭބަލް އިތުރު ބާވަތްތަކުގައި ހަރުކުރަން ފަށަނީ

ސައުތް އޭޝިއާ ރީޖަނަލް އެނަރޖީ ޕަރޓްނަރޝިޕް، ސާރެޕް މަޝްރޫޢާއެކު ހަކަތަ މަދުން ބޭނުންކުރާ އިތުރު ބާވަތްތަކުގައި އެކަން އަންގައިދޭނެ ލޭބަލްކުރުމުގެ މަސައްކަތް ފެށޭނެކަމަށް މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހީމް ވިދާޅުވެއްޖެއެވެ.

ވަޒީރު ވިދާޅުވީ މިގޮތަށް ލޭބަލް ކުރެވި ރާއްޖޭގައި މިހާރު ލިބެން ހުންނަނީ 3 ބާވަތުގެ މުދަލުގައިކަމަށެވެ.

ސައުތް އޭޝިއާ ރީޖަނަލް އެނަރޖީ ޕަރޓްނަރޝިޕް އިފްތިތާޙްކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މޫސުމީ ބަދަލުތަކާއި ތިމާވެށްޓާއި ހަކަތައާ ބެހޭ ވަޒީރު ޠާރިޤް އިބްރާހީމްވަނީ ރާއްޖެއިން ހަކަތަ އުފެއްދުމަށް ކުރަމުންދާ މަސައްކަތްތަކާއި އޭގެ ސަބަބުން އިޤްތިޞާދަށާއި ތިމާވެށްޓަށް ކުރަމުންދާ ނޭދެވޭ އަސަރުގެ މައްޗަށް އަލިއަޅުއްވާލައްވާ ވާހަކަފުޅު ދައްކަވާފައެވެ. ވަޒީރު ވިދާޅުވީ، ކަރަންޓު އުފެއްދުމަށް ބޭނުންކުރާ ހަކަތައިގެ 33 އިންސައްތައަކީ އިޔާދަކުރަނިވި ހަކަތައަށް ހެދުމަށް ސަރުކާރުން މަސައްކަތްކުރަމުންދާއިރު، ސައުތް އޭޝިއާ ރީޖަނަލް އެނަރޖީ ޕަރޓްނަރޝިޕް (ސާރެޕް)އާއެކު ވެވުނު އެއްބަސްވުމާއެކު މިއަމާޒަށް ވާސިލުވުމުގައި އިތުރު ބާރަކަށް ވެގެންދާނެކަމަށެވެ.

މިމަޝްރޫޢުގެ މައްޗަށް އަލިއަޅުއްވާލައްވަމުން ހަކަތައާ ބެހޭ ވަޒީރު ޠާރިޤް ވިދާޅުވީ މިމަޝްރޫޢުގެ ދަށުން ކުރިއަށްއޮތްތަނުގައި ރާއްޖޭގައި ފެން ހޫނު ކުރަން ބޭނުންކުރާ އިލެކްޓްރޯނިކްސް އާލާތްތަކާއި، ފެން ޕަމްޕު އަދި ސީލިންގ ފަންކާގެ ތެރޭގައި ހަކަތަ މަދުން ބޭނުންކުރާ ބާވަތްތައް ރައްޔިތުންނަށް އެނގެން ހުންނާނެހެން ލޭބަލް ކުރުމުގެ މަސައްކަތް ފެށޭނެކަމަށެވެ.

"އިޔާދަކުރަނިވި ހަކަތައަށް ދިޔުމަށް ކުރާ މަސައްކަތުގައި ވަރަށް މުހިންމުކަމެއް މިއީ، ހަކަތަ މެނޭޖްކުރުމާއި ގުޅޭގޮތުން ހަކަތަ ބޭނުންކުރާ ފަރާތްތަކަށް ރަނގަޅު މަޢުލޫމާތު ލިބޭނެ މަގުފަހިކޮށްދިނުމަކީ. މިގޮތުން ރާއްޖޭގައި އެނަރޖީ އެފިޝިއަންސީ ސްޓޭންޑާޑްސް ލޯންޗްކޮށްގެން މިހާރުދަނީ އެމިސްރަބަށް މަސައްކަތްކުރަމުން. މިހާރުވެސް 3 ބާވަތެއްގެ މުދަލުގައި މިގޮތަށްވާނީ ލެބެލް ކުރެވިފައި. އަދި މިމަޝްރޫޢާއެކު އިތުރު ބަވަތްތަކުގައި ލެބަލްކުރުމުގެ މަސައްކަތް ކުރެވޭނެ." ވަޒީރު ވިދާޅުވިއެވެ.

ސައުތް އޭޝިއާ ރީޖަނަލް އެނަރޖީ ޕަރޓްނަރޝިޕް(ސާރެޕް)އަކީ ދެކުނު އޭޝިއާގެ ޤައުމުތަކުގައި އިޔާދަކުރަނިވި ހަކަތައިގެ ސިނާޢަތް ކުރިއެރުވުމަށް މަސައްކަތްކުރާ ޔުނައިޓެޑް ސްޓޭޓްސް އޭޖެންސީ ފޯރ އިންޓަރނޭޝަނަލް ޑިވެލޮޕްމަންޓް(ޔޫއެސްއައިޑީ)ގެ ޕްރޮގްރާމެކެވެ.

މިޕްރޮގްރާމްގެ ދަށުން ރާއްޖެއާއި ޔޫއެސްއައިޑީއާއި ދެމެދު މިހާރުވަނީ އެއްބަސްވުމެއްގައި ސޮއިކޮށްފައެވެ. މި އެއްބަސްވުމުގައި ރާއްޖޭގެ ފަރާތުން ސޮއކުރެއްވީ ހަކަތައާއި ބެހޭ ވަޒީރު ޠާރިޤް އިބްރާހީމެވެ. އަދި ޔޫއެސްއައިޑީގެ ފަރާތުން ސޮއިކުރެއްވީ ޔޫއެސްއައިޑީ، އިންޑިއާ އަދި ބޫޓާނަށް ކަނޑައަޅާފައި ހުންނަވާ އެކްޓިން މިޝަން ޑިރެކްޓަރ، ޑރ.އެލެގްޒެންޑްރިއާ ވަރްތާއާއި ޔޫއެސްއައިޑީ، ސްރީލަންކާ އަދި ދިވެހިރާއްޖެއަށް ކަނޑައަޅާފައިވާ މިޝަން ޑިރެކްޓަރ ގެބްރީއަލް ގާއުއެވެ.

މި ރަސްމިއްޔާތަށްފަހުވަނީ ސާރެޕްގެ ދަށުން ރާއްޖޭގައި ކުރިއަށްގެންދާނެ އެކި ހަރަކާތްތަކުގެ މަޢުލޫމާތުތައް ހިއްސާކުރުމަށް ޓެކްނިކަލް ސެޝަންތަކެއް ކުރިއަށްގެންގޮސްފައެވެ. އެގޮތުން އެނަރޖީ ރެގިއުލޭޓްކުރުމާއި، ހަކަތައިގެ ޑިމާންޑަށް އަންނަމުންދާ ބަދަލުތަކާއި، ސްމާޓް މީޓަރ ރޯލްއައުޓްގެ ރޯޑްމެޕާއި، އިލެކްޓްރީނިކް މުދާ ސްޓޭންޑަޑްސްއައި ލެބަލްކުރުމުގެ މަސައްކަތްފުޅާކުރުމާއި ގުޅޭގޮތުން މިސެޝަންތަކުގައިވަނީ މަޢުލޫމާތު ހިއްސާކޮށްފައެވެ.

މިރަސްމިއްޔާތުގައި ހަކަތައިގެ ސިނާޢަތުގައި މަސައްކަތްކުރާ އެކި އިދާރަތަކުންވަނީ ބައިވެރިވެފައެވެ. އެގޮތުން ޔޫޓިލިޓީ ރެގިއުލޭޓްރީ އޮތޯރިޓީއާއި، ސްޓެލްކޯއާއި، ފެނަކަ އަދި މޯލްޑިވްސް ކަސްޓަމްސް ސަރވިސްއާއި، އެޗްޑީސީއާއި މަސީއިންވަނީ ބައިވެރިވެފައެވެ.