ތެލެސީމިއާ ކުދިން ލޭ އެޅުމަށް އެއް ރަށުން އަނެއް ރަށަށް ކުރަންޖެހޭ ދަތުރުތައް ސަރުކާރުގެ އެހީގައި ހަމަޖައްސައިދިނުމަށް މަސައްކަތް ކުރަމުންދާކަމަށް ހެލްތު މިނިސްޓަރ އަޙްމަދު ނަސީމް ވިދާޅުވެއްޖެއެވެ.
ހެލްތު މިނިސްޓަރ މިހެން ވިދާޅުވީ، ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު ޙަސަން އަޙްމަދު ކުރެއްވި ސުވާލަކަށް ޖަވާބު ދެއްވަމުންނެވެ.
ރައްޔިތުންގެ މަޖިލީހުގައި އިނގުރައިދޫ ދާއިރާގެ މެންބަރު ޙަސަން އަޙްމަދު ވަނީ ރާއްޖޭގައި ލޭ އަޅާ ކުދިންގެ ޢަދަދުތައް އިތުރުވެ، އެފަދަ ކުދިންނާއި އެކުދިންގެ އާއިލާތަކުން ބޮޑެތި ތަކުލީފުތަކެއް އުފުލަންޖެހޭތީ، އެކަމުގެ ކަންބޮޑުވުން ފާޅުކުރައްވާފައެވެ. އަދި އެފަދަ ކުދިންނަށާއި އެކުދިންގެ އާއިލާތަކަށް ބަޖެޓުގެ ތެރެއިން އެހީއެއް ދިނުމުގެ ވިސްނުން ސަރުކާރުން ގެންގުޅުއްވާތޯ ހެލްތު މިނިސްޓަރ އަޙްމަދު ނަސީމާއި ސުވާލުކުރައްވާފައެވެ.
މި ސުވާލަށް ޖަވާބު ދެއްވަމުން ހެލްތު މިނިސްޓަރ ނަސީމް ވިދާޅުވީ، ތެލެސީމިއާ ކުދިން ލޭ އެޅުމަށް ކުރަންޖެހޭ ދެކޮޅު ދަތުރުތައް ހަމަޖައްސައިދިނުމާމެދު ނޭޝެނަލް ސޯޝަލް ޕްރޮޓެކްޝަން އޭޖެންސީ، އެންސްޕާއާއެކު މަޝްވަރާކޮށްފައިވާކަމަށެވެ. އެހެންނަމަވެސް ރާއްޖޭގެ އެކި ސަރަޙައްދުތަކުގައި ދަތުރުފަތުރުގެ ކަންކަން މިވަގުތު އޮތްގޮތުން މިކަން ކުރުމުގައި ދަތިތަކެއް ހުރިކަން މިނިސްޓަރ ފާހަގަކުރެއްވިއެވެ.
ހެލްތު މިނިސްޓަރ ނަސީމް ވިދާޅުވީ، ރާއްޖެ ޓްރާންސްޕޯޓް ލިންކު، އާރް.ޓީ.އެލްގެ ޚިދުމަތް ޤާއިމުވެފައިވާ ސަރަހައްދުތަކުގައި ދިރިއުޅޭ ކުދިންނަށް ކޮންމެވެސް ވަރެއްގެ ފަސޭހަތަކެއް މިހާރު ލިބިގެންދާނެކަމަށެވެ. އެހެންނަމަވެސް މިކަން މުޅި ރާއްޖެއަށް ފުޅާކުރުމަށް ޓްރާންސްޕޯޓް ނެޓްވޯކް ފުޅާކޮށް ހަރުދަނާކުރުމުގެ މުހިއްމުކަމާއި ބޭނުންތެރިކަން މިނިސްޓަރ ފާހަގަކުރެއްވިއެވެ.
"އަޅުގަނޑުމެންގެ ޓްރާންސްޕޯޓް ސިސްޓަމް މިހާރު ޤާއިމުވެފައި ތިބި ތަންތަނުގައި ތިބިކުދިންނަށް ދަތިތަކެއް ނާންނާނެ. އަޅުގަނޑަށް ހީވަނީ އަންނަ އަހަރުގެ މެދުތެރެއަށްދާއިރު މެދުރާއްޖެތެރެއަށްވެސް މިކަންތައްތައް ލިބޭނެހެން. އެހެންވީމަ ވަރަށް ބޮޑުތަން ފަސޭހަވެގެންދާނެ. މިކަހަލަ އިންތިޒާމްތައް ހަމަޖެހިގެންނޫނީ އަޅުގަނޑުމެން ބޭނުންވާ ފެންވަރަކަށް ޚިދުމަތްތައް ދެވޭކަށް ނޯންނާނެ. ޓްރާންސްޕޯޓް ނެޓްވޯކް ވީ އެންމެ އަވަހަކަށް ޤާއިމުވެގެންދިޔައީމަ ޞިއްޙީ ޚިދުމަތަށްވެސް ފަސޭހަތަކެއް ވެގެންދާނެ" މިނިސްޓަރ ނަސީމް ވިދާޅުވިއެވެ.
މޯލްޑިވިއަން ބްލަޑް ސަރވިސަސް، އެމް.ބީ.އެސްގެ ރެކޯޑްތައް ދައްކާގޮތުން ރާއްޖޭގައި ތެލެސީމިއާ ކުދިންނާއި މީހުންގެ ގޮތުގައި 930 އަށްވުރެ ގިނަ ފަރާތުން ވަނީ ރަޖިސްޓްރީކޮށްފައެވެ. އޭގެތެރެއިން މިވަގުތު ދުނިޔޭގައި ތިބީ 640 އެއްހާ ފަރާތްކަމަށާއި، މީގެތެރެއިން ދެބައިކުޅަ އެއްބައި ނިސްބަތް ވަނީ އަތޮޅުތަކަށްކަމަށް އެމް.ބީ.އެސްއިން ވިދާޅުވެއެވެ.
ރާއްޖޭގައި ތެލެސީމިއާ ކުދިންނަށާއި މީހުންނަށް ދިމާވާ ތަފާތު ދަތިތައް ހައްލުކޮށްދީ، ތެލެސީމިއާ ކުދިންގެ ބޭސްފަރުވާގެ ކަންކަން މިހާރަށްވުރެ ހަރުދަނާކުރުމަށް ސަރުކާރުން އަންނަނީ މަސައްކަތް ކުރަމުންނެވެ. އެގޮތުން ކޯވިޑް-19ގެ ތެރޭގައިވެސް ލޭ އަޅާކުދިންނަށް ދަތުރުފަތުރު ކުރުމުގައި އެންސްޕާ މެދުވެރިކޮށް ލުއިތަކެއް ހޯދައިދީފައިވެއެވެ. ތެލެސީމިއާ ކުދިންނަށް ފަރުވާ ދިނުމަށް 1994 ވަނަ އަހަރުން ފެށިގެން މާލޭގައި ބޭނުންކުރަމުންދާ ސެންޓަރަށް ދިމާވެފައިވާ ޖާގައިގެ ދަތިކަމާއެކު، އެކަން ހައްލުކުރުމުގެގޮތުން ހުޅުމާލޭގައި އައު ތެލެސީމިއާ ސެންޓަރެއް ޤާއިމުކުރުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ.