ވިނަރެސް މަޝްރޫޢުގެ ފްލެޓްތަކަކީ ސަރުކާރުގެ ބޯހިޔާވަހިކަމުގެ މަޝްރޫޢުތަކުގެ ތެރެއިން ދެން އެންމެއަވަހަށް މީހުން ދިރިއުޅެން ފަށާނެ ހައުސިން ޔުނިޓުތަކެވެ.
މިމަޝްރޫޢުގެ ކޮންސްޓަރަކްޝަން، ހުރިހާ މަސައްކަތްތައް ނިމި، ޓަވަރުތަކުގެ ފިނިޝިން މަސައްކަތައް މިހާރުދަނީ ކުރިއަށެވެ. 10 ޓަވަރު ހިމެނޭ މި މަޝްރޫޢުގައި 1344 ހައުސިން ޔުނިޓް ހިމެނެއެވެ.
މެދު ފަންތީގެ ބޯހިޔާވަހިކަމަށް ޚާއްސަ މިމަޝްރޫޢަކީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ޙަވާލުކޮށްގެން ފަށާފައިވާ މަޝްރޫޢެކެވެ. އެޗްޑީސީން މިހާރު ތައްޔާރުވެފައިވަނީ މިމަޝްރުޢުގެ ފްލެޓުތަކަށް ކުރިމަތިލުމުގެ ފުރުޞަތު މިމަހު ހުޅުވާލުމަށެވެ.
ފޯމުހުށަހެޅުމަށް ހުޅުވާލުމުގެކުރިން ޢާއްމުންނަށް ފެލްޓްތައް ބަލާލުމުގެ ފުރުޞަތު ވަނީ ހުޅުވާލާފައެވެ.
އެޗްޑީސީސީގެ ޕަބްލިކް ރިލޭޝަން އޮފިސަރު ޢަލީ މަޝާރު ވިދަޅުވީ، މިފުރުޞާތާއެކު ވިނަރެސްގެ ފްލެޓުތަކަށް ޢާއްމުންގެ ވަރަށްބޮޑު ޝައުޤުވެރިކަމެއް ލިބެމުންދާކަމަށެވެ. ފްލެޓްތައް ބަލާލުމަށް ހުޅުވާލި ފުރަތަމަ ދެ ދުވަހުވެސް ހާހެއްހައި މީހުން ފްލެޓްތައް ބަލާލުމަށް ޒިޔާރަތްކޮށްފައިވެއެވެ.
"ރަޖިސްޓްރޭޝަނަށް ހުޅުވާލި ފުރުޞަތުގައި ވަރަށްގިނަ ބަޔަކު ރަޖިސްޓަރ ކުރަމުން އެބަދޭ. ފްލެޓް ބަލާލުމުގެ ޓުއަރތައްވެސް ހަމަ ފުލްކޮށްދަނީ. ރެސްޖިޓްރީ ކުރަމުންދާވަރަކަށް ފްލެޓްތައް ދައްކާލަމުން މިދަނީ." މަޝާރު ވިދާޅުވިއެވެ.
ވިނަރެސް އެޕާޓްމަންޓްތައް ބަލާލުމަށާއި މަޢުލޫމާތު ސެޝަންތަކުގައި ބައިވެރިވުމަށް ހުޅުވާލުން
— HDC (@hdcmaldives) June 2, 2022
އެނައުންސްމަންޓް ލިންކު https://t.co/4rlpxgt59w
މައުލޫމާތު ސެޝަންގައި ރަޖިސްޓަރ ކުރެއްވުމަށްhttps://t.co/FUdxF6Rwlc
އެޕާރޓްމެންޓު ބައްލަވާލެއްވުމަށް https://t.co/YMHFUZRnKw pic.twitter.com/4O2obdpWvP
ވިނަރެސް ފްލެޓުތައް ބަލާލުމާއި މަޢުލޫމާތު ސާފުކުރުމަށް ބާއްވާ ސެޝަންތަކުގައި ބައިވެރިވުމަށް އޮންލައިންކޮށް ރަޖިސްޓްރީ ވެވޭގޮތަށްވަނީ ހުޅުވާލާފައެވެ.
ފްލެޓުތައް ދެއްކުމުގެ ކަންކަން ކުރިއަށްދާއިރު، ފްލެޓްތައް ހަވާލުކުރާއިރު މަސައްކަތް ނިންމާފައި ހުންނާނެގޮތުގެ ސާމްޕަލް އެޕަރޓްމަންޓްތައްވެސް ދައްކައެވެ. އަދި ފަރުނީޗަރު ވެއްދުމަށް ފަހުގައި އެޕަރޓްމަންޓް ހުންނާނެގޮތުގެ ސާމްޕަލް ފްލެޓެއްވެސް ދައްކައެވެ. ވިނަރެސް ފްލެޓްތައް ދޫކުރާއިރު ފްލެޓްތަކުގެ އެތެރޭގެ ފިނިޝިންގެ ހުރިހާ މަސައްކަތްތައް ހުންނާނީ ނިމިފަކަމަށް މަޝާރް ވިދާޅުވިއެވެ.
"ވިނަރެސް ފްލެޓްތައް ހަވާލުކުރާއިރު ހުންނާނީ މުށި ޖަހައި ފަންކާއާއި އޭސީއާއި ލައިޓްތައް ހަރުކޮށްފައި. އަދި ބަދިގެ ސެޓްވެސް ހުންނާނީ ބަހައްޓާފައި. ދޮރުފަތް ބަހައްޓާ ފާޚާނަތަކުގެ މަސައްކަތްތައްވެސް ހުންނާނީ ނިންމާފައި." މަޝާރު ވިދާޅުވިއެވެ.
މި މަޝްރޫޢުގައި ހިމެނެނީ 902 އަކަފޫޓުގެ އެޕަރޓްމަންޓްތަކާއި، 883 އަކަފޫޓުގެ އެޕަރޓްމަންޓްތަކެވެ. މިއީ މުޅިންވެސް 3 ކޮޓަރީގެ އެޕަޓްމަންޓްތަކެވެ. ނަމަވެސް މީގެ ފްލެޓްތައް އެކި ކެޓަގަރީތަކަށްވަނީ ބަހާފައެވެ. އަދި އަގުތައްވެސް އެކި ކެޓަގަރީތަކުގައި ތަފާތުވާނެއެވެ. ވިނަރެސް ފްލެޓްގެ އަގު އުޅެނީ 2.5 މިލިއަނާއި 3.047 މިލިއަން ރުފިޔާއާ ދެމެދުގައެވެ.
ފްލެޓްތައް ގަތުމާއި ފައިސާ ދެއްކުމުގައި އިޚްތިޔާރީ ގޮތްތައް އެޗްޑީސީންވަނީ ހަމަޖައްސަވާފައެވެ.
ސަރުކާރުންވަނީ ގުޅީފަޅުން ގޯތި ލިބުނު މީހުންނާއި ހިޔާ މަޝްރޫޢުގައި ލިބުނު ފްލެޓް ދޫކޮށްލާ، ވިނަރެސްއަށް ބަދަލުވާން ބޭނުންވި މީހުންނަށް އެ ފުރުޞަތު ދީފައެވެ. މި ފަރާތްތަކަށް ކަނޑައަޅާ ފްލެޓްގެ އިތުރުން ދެން ހިމެނޭ ފްލެޓްތަކަށް މީހުން ހޮވާނީ އާއްމުކޮށް ހުޅުވާލައިގެންނެވެ. މި ފުރުޞަތު މިމަހު ހުޅުވާލާނެއެވެ.