ލާމަރުކަޒީ ޤާނޫނާއި އެއްގޮތަށް ކައުންސިލްތައް ހިންގުމަށް ހުރި ގޮޖެހުންތައް ދެނެގަނެ، އެކަންކަން އިސްލާހުކުރުމަށް ކުރި މަސައްކަތްތަކުގެ ނަތީޖާ މިހާރުވެސް ފެންނަން ފަށާފައިވާކަމަށް ލޯކަލް ގަވަމަންޓް އޮތޯރިޓީގެ ސީއީއޯ ފާތުމަތު އަފްޝަން ލަތީފު ވިދާޅުވެއްޖެއެވެ. "ވިއަވަތި ކޮންފަރެންސް" ފެށުމުގެ ރަސްމިއްޔާތުގައި އަފްޝަން ވިދާޅުވީ ކައުންސިލްތަކުގެ ޙާލަތު ދެނެގަތުމަށް އެލްޖީއޭއިން ވަރަށް ގާތުން ގުޅިގެން މަސައްކަތް ކުރަމުންދާކަމަށެވެ.
އަފްޝަން ލަތީފް ވިދާޅުވީ އެލްޖީއޭގެ އެންމެ ބޮޑު މަސްޢޫލިއްޔަތަކީ ކައުންސިލްތަކުގެ ކަންބޮޑުވުން އަޑުއަހާ، ކަމާގުޅޭ މުވައްސަސާތަކާއި ގުޅިގެން މައްސަލަތަކަށް ޙައްލު ހޯދައިދިނުންކަމަށެވެ. ވޭތުވެދިޔަ އަހަރެއްހާ ދުވަހުގެ މުއްދަތުގައި 98 ކައުންސިލަކާއި ވަކިވަކިން ބައްދަލުކޮށްފައިވާކަމަށް އަފްޝަން ވިދާޅުވިއެވެ. އަދި އަތޮޅު ފެންވަރުގެ 6 ފޯރަމެއް ބާއްވާފައިވާކަމަށްވެސް އަފްޝަން ފާހަގަކުރެއްވިއެވެ.
އަފްޝަން ވިދާޅުވީ އެލްޖީއޭއިން އިސްނަގައިގެން 78 ތަމްރީން ޕްރޮގްރާމް ކައުންސިލްތަކަށް ހިންގާފައިވާކަމަށެވެ. މި ޕްރޮގްރާމްތަކުގައި ކައުންސިލަރުންނާއި، އަންހެނުން ތަރައްޤީއަށް މަސައްކަތް ކުރާ ކޮމިޓީގެ މެންބަރުންނާއި، ކައުންސިލްތަކުގެ އިދާރީ މުވައްޒަފުން ހިމެނޭހެން 14000އަށްވުރެ ގިނަ މުވައްޒަފުން ތަމްރީންކޮށްފައިވާކަމަށެވެ.
Session 1 of Fanoalla Dharubaaru on Fiscal Decentralisation pic.twitter.com/suPdZOt5HW
— Local Government Authority (@lgaMaldives) May 27, 2022
މި ބައްދަލުވުންތަކުގައި ކައުންސިލްތަކުން ހުށައަޅާ ކަންކަން ރައީސް އޮފީހާއި، ރައްޔިތުންގެ މަޖިލީހުގެ ބައްދަލުވުންތަކުގައިވެސް ޙިއްސާކޮށް، އަވަސް ޙާއްލުތަކެއް ހޯދުމަށް ގިނަ މަސައްކަތްތަކެއް ކޮށްފައިވާކަން އަފްޝަން ފާހަގަކުރެއްވިއެވެ. މި ބައްދަލުވުންތަކުން ހާސިލްވި ގިނަ ކަންތައްތަކެއް ވަރަށް އަވަހަށް ތަންފީޒުކުރަން ފެށިގެންދާނެކަމަށްވެސް ވެސް އަފްޝަން ވިދާޅުވިއެވެ.
" ލޯކަލް އޮތޯރިޓީ ކުންފުނި ރެޖިސްޓްރީ ކުރުމުގެ މަގު ވަނީ ފަހިވެފައި. މިކަންކަމަށް ވަރަށް އަވަހަށް ހުޅުވާލެވޭނެ. އަދި އެރަށެއްގެ ޓްރާންސްޕޯޓް ފީ ރަށު ކައުންސިލަށް ލިބޭނެ ގޮތް ހަމަޖައްސާ، އެކަން ފެށުމަށް އޮތީ މިހާރު ތައްޔާރުވެފަ." އެލްޖީއޭގެ ސީއީއޯ ފާތުމަތު އަފްޝަން ވިދާޅުވިއެވެ.
މިވަގުތު ގިނަ ކައުންސިލްތަކަށް އޮތް އެންމެ ބޮޑު ގޮންޖެހުމަކީ ރަށްރަށުގެ ބިންތައް ބޭނުންކުރާނެ ގޮތް ނިންމުމަށް ހަދާ ލޭންޑް ޔޫސް ޕްލޭންތައް ތައްޔާރުނުކުރެވުމުގެ މައްސަލައެވެ. ނަމަވެސް މިކަމަށް ބޭނުންވާ މާލީ އަދި ފަންނީ އެހީތެރިކަން ކައުންސިލްތަކަށް ހޯދައިދިނުމަށް އެލްޖީއޭއިން އަންނަނީ މަސައްކަތް ކުރަމުންނެވެ.
އަފްޝަން ވަނީ ދަޢުލަތުގެ މުވައްސަސާތައް ދަރަޖަ ކުރުމުގައި ކައުންސިލްތައް 4 ވަނަ ދަރަޖައިގައި އޮތުމުން، އެކަމުގެ ކަންބޮޑުވުން ކައުންސިލްތަކުން ފާޅުކުރާކަމަށް ވިދާޅުވެފައެވެ.
ލާމަރުކަޒީ ޤާނުނު އިސްލާހުކޮށް ބޮޑު ބަދަލެއް ގެނައީ 2019ވަނަ އަހަރުއެވެ. މިއާއެކު ކައުންސިލްތަކުގެ އިޙްތިސާސް ކަނޑައެޅުމާއި، މަޝްރޫއުތައް ހިންގުމާއި، އަދި މާލީ ގޮތުން ކައުންސިލްތައް ބާރުވެރިވުމުގެ މިނިވަންކަންވަނީ މި ޤާނޫނުން ކައުންސިލްތަކަށް ލިބިދީފައެވެ.