ކުޅުދުއްފުށީ ސިޓީގެ އިތުރު 24 މަގެއް ތާރު އަޅައިގެން ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފަށައިފިއެވެ. މި މަސައްކަތް ސަރުކާރުން ހަވާލުކޮށްފައިވަނީ ރޯޑް ޑިވެލޮޕްމަންޓް ކޯޕަރޭޝަން އާރްޑީސީއާއެވެ.
ކުޅުދުއްފުށީ މަގުހެދުމުގެ މަޝްރޫޢު ކުރިއަށްގެންދަނީ ދެ ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ ދަށުން ތާރު އަޅައިގެން ތަރައްޤީކުރި 18 މަގު ބޭނުންކުރަން ފެށިތާ 4 އަހަރުފަހުން، މި މަޝްރޫޢުގެ ދެވަނަ ފިޔަވަހީގެ މަސައްކަތް މިވަނީ ފަށާފައެވެ.
ރޯޑް ޑިވެލޮޕްމަންޓް ކޯޕަރޭޝަން އާރްޑީސީއާ ޙަވާލުކޮށްފައިވަނީ، ފުރަތަމަ ފިޔަވަހީގެ މަގުތަކާ ގުޅޭހެން އިތުރު 24 މަގު ތާރު އަޅައިގެން ޒަމާނީ ފެންވަރަށް ތަރައްޤީކުރުމަށެވެ. މީގެ ކާސްޓިންގް މަސައްކަތް ނިމި، މިހާރު މިވަނީ މަގު ހެދުމުގެ ދެވަނަ ދިޔަވަހީގެ ޢަމަލީ މަސައްކަތް ފަށާފައެވެ. ކުޅުދުއްފުށީގައި ބޭއްވި ރަސްމިއްޔާތެއްގައި މި މަސައްކަތް ފަށްޓަވައިދެއްވީ އާރްޑީސީގެ މެނޭޖިން ޑިރެކްޓަރ މޫސާ އަލީ މަނިކުއެވެ.
ކުޅުދުއްފުށި ސިޓީ މަގު ހެދުމުގެ މަޝްރޫއު ރަސްމީކޮށް ފެށުމަށްޓަކައި ބާއްވާ ޚާއްސަ ރަސްމިއްޔާތު މިހާރު ފެށިގެން ކުރިއަށް ދަނީ. pic.twitter.com/svtsQuCmXW
— Road Development Corporation Ltd (@rdcmaldives) March 8, 2022
ކުޅުދުއްފުއްޓަކީ އުތުރުގެ ރަށްތަކުގެ ތެރެއިން އެންމެ އާބާދީ ބޮޑު އަދި، އެކި ޚިދުމަތްތަކަށް އެންމެ ގިނަ ބަޔަކު އަރާ ފައިބާ ރަށެވެ. ރީޖަނަލް ހޮސްޕިޓަލާއި އެއަރޕޯޓާއި އަދި ސަރުކާރުގެ އޮފީސްތަކުގެ އެކި ޚިދުމަތްތަކަށް ގިނަ ބަޔަކު ދަތުރުކުރާ ރަށެކެވެ.
މަގުތައް އަޑިގުޑަންވުމުން ހިނގާބިނގާވެ އުޅުމާއި އަދި އުޅަނދުތައް ދުއްވުން އޮތީ އުނދަގުލަކަށް ވެފައެވެ. އެންމެ ބޮޑު ދަތިކަމަކީ މަގުތަކުގައި ފެން ބޮޑުވާ މައްސަލައެވެ. ތާރު އަޅައިގެން މިހާތަނަށް ތަރައްޤީކުރި މަގުތަކުގައިވެސް ފެން ބޮޑުވާ މައްސަލައާއި ގުޅިގެން ރައްޔިތުންދަނީ ޝަކުވާ ބޮޑެވެ.
އާރްޑީސީން ވިދާޅުވީ ދެވަނަ ފިޔަވަހީގައި މަގުހެދުމުގެ މަސައްކަތުގައި، ރަށުގައި ފެން ބޮޑުވާ މައްސަލައަށް ޚާއްސަ ސަމާލްކަމެއްދީ، ފެން ހިންދާ އެކަށީގެންވާ ރަނގަޅު ނިޒާމެއް ޤާއިމުކުރާނެކަމަށެވެ.
މަގުހެދުމުގެ މަސައްކަތްތަކުގެ ތެރެއިން މިވަގުތު ފަށާފައިވަނީ މަގުތަކަށް ޖަންކްޝަންތައް ފެއްތުމާއި، ޔުޓިލިޓީ ޚިދުމަތަށް އަޅާ ހޮޅި ލޭންތައް އެޅުމުގެ މައްސައްކެތެވެ.
ތާރު އަޅައިގެން މަގުތައް ތަރައްޤީކުރާނީ އެންމެ ޒަމާނީ މަގުތަކުގެ ގޮތުގައެވެ. އެގޮތުން މަގުގައި ފެން ހިންދާ ނިޒާމު ޤައިމުކުރުމުގެ އިތުރުން، މަގުބައްތި ޖެހުމާއި، ސްޕީޑް ބްރޭކަރު ހަރުކުރުމާއި މަގުމަތީގެ ނިޝާންތައް ޖެހުންވެސް ހިމެނެއެވެ.
މި މަސައްކަތް ނިންމުމަށް ހަވާލުކޮށްފައިވަނީ 1އަހަރާ 4 މަހުންނެވެ. މި ޕްރޮޖެކްޓަކީ 100މިލިއަން ރުފިޔާގެ މަޝްރޫޢުއެކެވެ.