ޔަހޫދީން އިސްތިޢުމާރުކޮށްފައިވާ ހުޅަނގު އައްސޭރީގެ ޖާލޫދު އަވަށަށް ޤަވާއިދާ ޚިލާފަށް ހުޅަނގު އައްސޭރީގައި ދިރިއުޅެމުންދާ ޔަހޫދީ ވަޒަންވެރިން ވަދެގަނެ އެ އަވަށުގެ ބައެއް ތަންތަނުގައި ހުޅުޖަަހައިފިއެވެ.
ޔަހޫދީ ވަޒަންވެރިން ގެތަކެއްކާއި އުޅަނދުތަކެއްގައި ރޯކޮށްލާފައިވާއިރު، އެ ގެތަކަކީ އެ އަވަށުގެ ތުބާސީ ކިޔާ ޢާއިލާއަކަށް ނިސްބަތްވާ ދެ ގެއެވެ. ޔަހޫދީ ވަޒަންވެރިންގެ ދުއްތުރާއާއި އަނިޔާވެރިކަމުގެ ސަބަބުން ތުބާސީ ޢާއިލާއަށް އެ މީހުންގެ ގެދޮރު ދޫކޮށް ދިޔުމަށް މިދިޔަ ޖުލައި މަހުގެ ތެރޭގައި މަޖުބޫރުވިއެވެ. ކޯޓު ޢަމުރެއްގެ ދަށުން އެ ޢާއިލާއިން އަލުން އެ ގެއަށް ދިޔައިރު އެ ގެތަކަށް ވެރިގަނެފައިވާ ވަޒަންވެރިން ވަނީ އެ ގެތަކަށް ބޮޑެތި ގެއްލުންތައް ދީފައެވެ. އެ ޢާއިލާއިން އެ ސަރަޙައްދަށް ދިޔުމާއެކު 100އަށްވުރެ ގިނަ ވަޒަންވެރިން ވަނީ އެ ގެތައް ދޮށަށް އެއްވެ ހަޅުތާލުކުރަން ފަށައިފައެވެ. އަދި އެ ޢާއިލާއިން އެ ގެތަކަށް ވަނުމަށް ވަނީ ހުރަސް އަޅައިފައެވެ.
އަވަށުގެ މީހުން ވަޒަންވެރިންނާ ކުރިމަތިލުމަށް މަސައްކަތް ކުރި ނަމަވެސް އިރުކޮޅެއްގެ ތެރޭގައި އެ ސަރަޙައްދަށް ޔަހޫދީ ފައުޖުތަކުން ވަނީ އައިސްފައެވެ. ޔަހޫދީ ފައުޖުތަކުން ވަނީ ވަޒަންވެރިންނަށް ރައްކާތެރިކަން ދީ، އިތުރު ސިފައިން އެ ސަރަޙައްދަށް ގެނެސްފައެވެ. އަދި ތުބާސީ ޢާއިލާގެ މެންބަރުން އެ މީހުންގެ ގެދޮރު ދޫކޮށް އަލުން ދިޔުމަށް ބަޑި ޖައްސައި މަޖުބޫރުކޮށްފައިވެއެވެ. އެއަށްފަހު ޔަހޫދީ ވަޒަންވެރިން ވަނީ އެ ގެތަކުގައި ހުޅުޖަހައިފައެވެ. އަލިފާނުގައި ގެތަކަށް ބޮޑެތި ގެއްލުންތައް ލިބިފައިވާއިރު، އެ ގެތައް މިހާރު ހުރީ މީހުންނަށް ދިރިނޫޅެވޭ ޙާލަތުގައެވެ.
2023ވަނަ އަހަރުގެ އޮކްޓޯބަރު މަހުގެ ތެރޭގައި ޔަހޫދީން ޣައްޒާއަށް ޢުދުވާނީ ހަމަލާތައް ދޭން ފެށުމާއެކު ހުޅަނގު އައްސޭރީގައި ދިރިއުޅޭ ފަލަސްޠީނުގެ ރައްޔިތުންނާ ދެކޮޅަށް ދެމުންދާ ހަމަލާތައް ވެސް ވަނީ އިތުރުވެފައެވެ. ޣައްޒާ ހަނގުރާމަ ފެށި ފަހުން ހުޅަނގު އައްސޭރީގައި ފަލަސްޠީނުގެ 1،206 ރައްޔިތުން ޝަހީދުކޮށްލާފައިވެއެވެ. އަދި 13،300އަށްވުރެ ގިނަ މީހުންނަށް ވަނީ ޒަޚަމްވެފައެވެ. އޭގެ އިތުރުން 26،000އަށްވުރެ ގިނަ ފަލަސްޠީނުގެ ރައްޔިތުން ހައްޔަރުކޮށްފައިވެއެވެ.
އދގެ އިންސާނީ އެހީތެރިކަން ވިލަރެސްކުރާ އިދާރާ، އޯސީއެޗްއޭއިން ބުނީ މި އަހަރުގެ ޖަނަވަރީ މަހުން ފެށިގެން ޖުލައި މަހުގެ ފަހުކޮޅާ ހަމައަށް ޔަހޫދީ ވަޒަންވެރިންނާ ގުޅުންހުރި 1،330 ހަމަލާއެއް ހުޅަނގު އައްސޭރީގައި ރެކޯޑުކޮށްފައިވާ ކަމަށެވެ. އެއީ ދުވާލަކު ގާތްގަނޑަކަށް ހަ ހަމަލާއެެވެ. މިއީ ފާއިތުވި 20 އަހަރު ދުވަހުގެ ތެރޭގައި ހުަޅަނގު އައްސޭރީގައި ދޭ ހަމަލާތަކުގެ ނިސްބަތް އެންމެ މަތިވި މިންވަރެވެ.