ސިޓީން ހޯދި ތަށިތައް އަތުލުމަކީ ބޭއިންސާފެއް- ރޫނީ

މެންޗެސްޓަރ ސިޓީން ހޯދި ތަށިތައް އަތުލުމަކީ ކުޅުންތެރިންނާއި އޮފިޝަލުންނަށް ވެވޭ ބޭއިންސާފެއް ކަމަށް އިންގްލެންޑްގެ ކުރީގެ ކެޕްޓަން ވޭން ރޫނީ ބުނެފިއެވެ.

މެންޗެސްޓަރ ޔުނައިޓެޑަޢށް ކުރިން ކުޅުނު ފޯވާޑް ސިޓީގެ ހާލަތާ ގުޅޭގޮތުން ވާހަކަދައްކަމުން ބުނީ ޕްރިމިއަރ ލީގު ހޯދަން ކުޅުންތެރިންނާއި އޮފިޝަލުން ބުރަ މަސައްކަތް ކުރި ކަމަށެވެ. އަދި ކުޅުންތެރިންނާއި އޮފިޝަލުން ތަށި ހޯދަން މަސައްކަތްކުރީ ފަރުދާގެ ފުރަގަހުގައި ހިނގާ ކަންކަން ނޭންގި ކަން ފާހަގަކުރަމުން ރޫނީ ބުނީ އެހެންކަމުން އެކުޅުންތެރިން ބުރަކޮށް ކުރި މަސައްކަތުން ހޯދި މެޑަލް އަތުލުމަކީ އިންސާފެއް ނޫންކަމަށެވެ.

ރޫނީ މިމޭރުމުން ވާހަކަދައްކާފައި މިވަނީ ސިޓީން ހޯދި ލީގު ތަށިތައް އަތުލައިފިނަމަ ރޫނީއަށްވެސް ލީގުގެ އިތުރު ޓްރޮފީއަކާއި މެޑަލްއެއް ލިބެން އޮއްވައެވެ. އެއީ 40 އަހަރުގެ ތެރޭގައި މެންޗެސްޓަރ ސިޓީން ފުރަތަމަ ޕްރިމިއަރ ލީގު ހޯދިއިރު ދެވަނަ ޓީމަކީ އޭރު ރޫނީ ކުޅުނު މެންޗެސްޓަރ ޔުނައިޓެޑަށް ވުމުންނެވެ. 2011-2012 ވަނަ އަހަރުގެ ސީޒަންގެ ލީގު ސިޓީން ހޯދީ މެންޗެސްޓަރ ޔުނައިޓެޑާ ޕޮއިންޓްގެ ގޮތުން އެއްވަރުވެ, ގޯލުގެ ތަފާތުންނެވެ. އެއީވެސް އިތުރު ވަގުތުގައި ފަހަތުން އަރާ ކުރި ހޯދައިގެންނެވެ.

އެކަމަކު ސިޓީއާދެކޮޅަށް މިހާރު ސާބިތުވެ, އިސްތިއުނާފް ކުރުމުގެ ފުރުޞަތު ދީފައިވާ މާލީ މުއާމަލާތްތައް އޮޅުވާލުމުގެ ދައުވާތަކުގައި ހަރުކަށި އަދަބު ދީފިނަމަ ސިޓީ އަތުން އެލީގު ތަށިވެސް އަތުލާނެއެވެ. އެހާލަތުގައި ލީގު ޗެމްޕިއަންކަން ދޭނީ ދެވަނަ ހޯދި މެންޗެސްޓަރ ޔުނައިޓެޑަށެވެ. އެކަމަކު ރޫނީ ބުނީ އެތަށި އޭނާ ބޭނުން ނޫންކަމަށެވެ.

މާލީ މުއާމަލާތްތައް އޮޅުވާލާ, މާލީ އުސޫލުތަކާ ހިލާފުވި 115 މައްސަލައެއްގެ ތެރެއިން 114 މައްސަލައެއް ސިޓީގެ މައްޗަށް ސާބިތުވާކަމަށް ޕްރިމިއަރ ލީގުން ވަނީ ކަނޑައަޅާފައެވެ. އެކަމަކު ރޫނީ ބުނީ އެފަދަ ހާލަތެއްގައި ސިޓީއަށްދޭ އަދަބެއްގެ ސަބަބުން ލިބޭ ޕްރިމިއަރ ލީގެއް ގަބޫލުކުރަން އޭނާގެ ޒަމީރު އެއްބަސްނުވާ ކަމަށެވެ. ރޫނީ ބުނީ އެލީގު ތަށި މެންޗެސްޓަރ ޔުނައިޓެޑަށް ހައްގު ނޫން ކަމަށެވެ. އޭގެ ބަދަލުގައި އެތަށި ހޯދަން ހުރިހާ މަސައްކަތެއްކުރި ސިޓީގެ ކުޅުންތެރިންނަށް އެކާމިޔާބީ ހައްގުކަމަށް ރޫނީ ދެކެއެވެ. ސިޓީއަށް އެދިމާވި ހާލަތުގައި އެޓީމްގެ ކުޅުންތެރިއެއްގެ ގޮތުގައި އޭނާ ހުރެ, އޭނާގެ އަތުން ތަށްޓާއި މެޑަލް އަތުލާނަމަ ވާނީ ކިހިނެއްތޯ ރޫނީ ވަނީ ސުވާލު އުފައްދާފައެވެ.

ރޫނީ ގަބޫލުކުރަނީ އަދަބެއްގެ ގޮތުން ސިޓީ ރެލިގޭޓް ކުރެވެން އޮތް އެންމެ ދަށް ޑިވިޝަނަކަށް ރެލިގޭޓް ކުރުމާއެކު ކުރިއަށް އޮތް ތިން ހަތަރު އަހަރު އެކްލަބަށް ޚަރަދު ކުރެވޭނެ މިންވަރު ދަށްކުރުމެވެ. ސިޓީއާ ދެކޮޅަށް ކުރާ ތުހުމަތުތަކާއި, ސާބިތުވާކަމަށް ނިންމާފައިވާ ނިންމުންތަކަށް ސިޓީގެ ވެރިން ދެކޮޅު ހަދައެވެ.