215 ކިލޯގެ މަސްތުވާތަކެއްޗާއެކު 2 މީހުން ހައްޔަރުކޮށްފިއެވެ.
މިކަން ހާމަކުރައްވައި ކޮމިޝަނަރ އޮފް ޕޮލިސް މުޙައްމަދު ޙަމީދު ކުރެއްވި ޓުވީޓެއްގައި ވިދާޅުވީ، މި މަސްތުވާތަކެތި އަތުލައިގެންފައިވަނީ މިދިޔަ ބުދަ ދުވަހުންފެށިގެން ފުލުހުން ހިންގި ޚާއްސަ އޮޕަރޭޝަނެއްގައި ކަމަށެވެ. މި އޮޕަރޭޝަން ކުރިއަށްގެންގޮސްފައިވަނީ ފުލުހުންގެ ޑްރަގް އެންފޯސްމަންޓް ޑިޕާޓްމަންޓާއި، މެރިން ޕޮލިހާއި، ފޮރެންސިކް ޑިޕާޓްމަންޓާއި، ރ. އަތޮޅު ޕޮލިސް އަދި އިންޓެލިޖެންސް ގުޅިގެންނެވެ.
In a second successful counter narcotics operation that began on Wednesday, DED, Marine Police, Forensics, Raa Atoll Police & Intelligence teams have arrested two individuals and seized approximately 215 kgs of heroin. We thank Govt. of #india & @MNDF_Official for the inputs. pic.twitter.com/OvtOfrWQYA
— Mohamed Hameed (@M_Hameedh) October 15, 2021
މި އޮޕަރޭޝަންގައި ފުލުހުން އަތުލައިގެންފައިވަނީ މަސްތުވާތަކެތީގެ ބާވަތެއްކަމަށްވާ ހެރޮއިނެވެ. 215 ކިލޯގެ ހެރޮއިންއާއެކު ދެ މީހަކު ފުލުހުން ހައްޔަރުކޮށްފައިވާއިރު، އެމީހުންނާ ބެހޭ އިތުރު މަޢުލޫމާތެއް އަދި ހާމަކޮށްފައެއްނުވެއެވެ. މި އޮޕަރޭޝަން ކާމިޔާބުކަމާއެކު ކުރިއަށްގެންދިއުމުގައި އެމް.އެން.ޑީ.އެފްގެ އިތުރުން އިންޑިއާ ސަރުކާރުން ފުލުހުންގެ މުއައްސަސާއަށް ފޯރުކޮށްދިން އެހީތެރިކަން ސީޕީ ހަމީދު ވަނީ ފާހަގަކުރައްވާފައެވެ.
ފުލުހުން ހިންގި ޚާއްސަ އޮޕަރޭޝަނެއްގައި މިމަހުގެ 13 ވަނަ ދުވަހުވެސް ވަނީ 100 ކިލޯގެ މަސްތުވާތަކެއްޗާއެކު 10 މީހުން ހައްޔަރުކޮށްފައެވެ. އެފަހަރުވެސް ފުލުހުން އަތުލައިގެންފައިވަނީ ހިރޮއިނެވެ. މިތަކެތި ހޯދާފައިވަނީ ފަޅުރަށަކުންނެވެ. މި މައްސަލައިގައި ފުލުހުން ހައްޔަރު ކުރި 10 މީހުންގެ ތެރެއިން 2 މީހަކު ދޫކޮށްލާފައިވާއިރު، 8 މީހެއްގެ ބަންދުގެ މުއްދަތު ވަނީ އިތުރުކޮށްފައެވެ.