ހއ.ދިއްދޫގެ ހުޅަނގު ފަރާތް ކަންބޮޑުވާ މިންވަރަކަށް ގިރަމުންދާއިރު، އެ ސަރަޙައްދުން ވޭތުވެދިޔަ 5 އަހަރުގެ ތެރޭގައި ތިން ސަތޭކައެއްހާ ރުއް ނެތި ގޮސްފައިވާ ކަމަށް ދިއްދޫ ކައުންސިލުން ވިދާޅުވެއްޖެއެވެ.ވޭތުވެދިޔަ ފަސް އަހަރުގެ ތެރޭގައި ހއ ދިއްދޫގެ ހުޅަނގު ފަރާތުން 15 ފޫޓަށްވުރެ ފުޅާ ސަރަހައްދެއް ގިރާފައިވާ ކަމަށް ދިއްދޫ ކައުންސިލުން ވިދާޅުވެއެވެ. ދިއްދޫ ކައުންސިލްގެ ރައީސް އިބްރާހީމް ޝިނާން ވިދާޅުވީ، މިހާތަނަށް ތިން ސަތޭކައެއްހާ ރުއް ނެތިގޮސްފައިވާއިރު، ރަށް ގިރުމުގެ މައްސަލަ މިހާ ބޮޑުވެފައިވަނީ 2010 ވަނަ އަހަރުން ފެށިގެން ކަމަށެވެ. ގިރަމުންދާ ސަރަޙައްދަކީ ރަށުގެ ދޯނި ބަނުމުގެ މަސައްކަތް ކުރިއަށްދާ ސަރަޙައްދަށްވެފައި، މޫދާއި ކައިރީގައިވާ ގެތައް ހުރުމުން އެކަމާއި ކަންބޮޑުވާ ކަމަށް އެ ރަށުގެ ބައެއް އާއްމުން ބުނެއެވެ.ދިއްދޫ ރައްޔިތުންގެ އަޑު އައްސަވާ، ގިރާ ސަރަޙައްދު ޙިމާޔަތްކުރެއްވުމަށް ރިވެޓްމެންޓެއް ޖެއްސެވުމަށް އަންނަ އަހަރަށް ލަފާކުރައްވާ ބަޖެޓްގައި 5 މިލިއަން ރުފިޔާ ސަރުކާރުން ވަނީ ހިމަނުއްވާފައެވެ. މި މަސައްކަތް ކުރެއްވުމަށް އަންނަ އަހަރުގެ ކުރީކޮޅު ބަޔަކާ ޙަވާލު ކުރައްވާނެ ކަމަށް އެންވަޔަރމަންޓް މިނިސްޓްރީން ވިދާޅުވެއެވެ.ދިއްދޫ ފަދައިން ރާއްޖޭގެ ގިނަ ރަށްތަކަކީ ރަށް ގިރުމުގެ މައްސަލަތައް ކުރިމަތިވެފައިވާ ރަށްތަކެކެވެ. މިއާއެކު މިހާރު ކުރިއަށްދާ ތިމާވެއްޓާ ބެހޭ ބައިނަލްއަގްވާމީ އެންމެ ބޮޑު ބައްދަލްވުން، ކޮޕް 21 ސަމިޓްގައި، ރާއްޖޭގެ ތިމާވެއްޓާބެހޭ ވަޒީރު ތާރިޤް އިބްރާހީމް ދަނީ މިކަންކަމަށް ވަކާލާތު ކުރައްވަމުންނެވެ. އެގޮތުން ރާއްޖެފަދަ ޖަޒީރާ ރަށްތަކަށް ކުރިމަތިވެފައިވާ ތިމާވެށީގެ މައްސަލަތަކަށް ޙައްލު ގެނައުމަށް ސޭފް އައިލެންޑް ކޮންސެޕްޓް ފުޅާކުރައްވަން ޖެހޭ ކަމަށް މިނިސްޓަރ ތާރިޤް އިބްރާހިމް ވިދާޅުވެފައިވެއެވެ.