އދ.ކުނބުރުދޫގެ ގޮނޑުދޮށް ޙިމާޔަތްކުރުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ)އާ ޙަވާލުކޮށްފިއެވެ. ކުނބުރުދޫގެ ގޮނޑުދޮށުން ބޮޑުބައެއް ގިރައި ރަށުގެ މީހުން ދިރިއުޅޭ ގެތަކާ ކައިރިއަށްވަނީ ގިރާފައެވެ.
5.6 ހެކްޓަރުގެ ކުނބުރުދުއަކީ ރާއްޖޭގެ ރަށްތަކުގެ ނިސްބަތުން، ކުޑަ ރަށެކެވެ. ރަށުގެ އާބާދީ އުޅެނީ 600އިން މަތީގައެވެ. ރަށް ކުޑަވުމުގެ ސަބަބުންނާއި ރަށުގެ ބޮޑުމިނާ އަޅާބަލާއިރު އާބާދީ އިތުރުވުމުގެ ސަބަބުން، ރަށުގެ ބިންވަނީ ވަރަށް ބޮޑަށް ފުރިފައެވެ. އަދި މީހުން ދިރިއުޅޭ ގެތަށް، ގޮނޑުދޮށާ ކައިރި ސަރަޙައްދުތަކުގައިވެސް އެބަހުއްޓެވެ.
ކުނބުރުދޫގެ ރަށްގިރުމުގެ މައްސަލައަކީ ރަށުގެ ބޯހިޔާވަހިކަމުގެ މައްސަލައާ ގުޅިގެން، އިތުރަށް ރައްޔިތުން ކަންބޮޑުވެފަވާ މައްސަލައެކެވެ. އެހެން ރަށްރަށާ ޚިލާފަށް ރަށުގެ ހުރިހާ ފަރާތަކުންވެސް އެރަށަށް ރަށްގިރުމުގެ މައްސަލަ ކުރިމަތިވެއެވެ. ޚާއްސަކޮށް ރަށުގެ ދެކުނާއި އިރުމަތިން ބޮޑު ބައެއް ގިރައި ޢާއްމު ދިރިއުޅުމަށް އޭގެ އަސަރު ކުރާ މިންވަރަށް މައްސަލަވަނީ ބޮޑުވެފައެވެ.
"ރަށުގެ ބަނދަރު ހެދުމަށްފަހު، ރަށްގިރުމުގެ މައްސަލަ ބޮޑުވީ. ރަށުގެ އުތުރުފަރާތުގެ ގެތަކާއި މޫދާ ދެމެދު ހުންނާނީ 10ވަރަކަށް ފޫޓު. އަދި މިސްކިތް ހުރި ސަރަޙައްދުގައި 5 ފޫޓު." ކުނބުރުދޫ ކައުންސިލްގެ ރައީސް މުޙައްމަދު އަޒްމީ، ޕީއެސްއެމްއަށް މަޢުލޫމާތުދެއްވަމުން ވިދާޅުވިއެވެ.
ކައުންސިލްގެ ރައީސް މުޙައްމަދު އަޒްމީ ވިދާޅުވީ ރަށްގިރުމުގެ މައްސަލައަކީ ކުނބުރުދުއަށް ކުރިމަތިވެފައިވާ ޒަމާންތަކެއްވީ މައްސަލައެއްކަމަށެވެ. ރަށްގިރުމުގެ މައްސަލަ ބޮޑުވެ، މީގެ ކުރިންވެސް ރަށުގެ ބައެއް ސަރަޙައްދު ޙިމާޔަތްކޮށްފަވެއެވެ.
މި މަސައްކަތުގެދަށުން ކުނބުރުދޫ ގިރާ ސަރަޙައްދުން 170މީޓަރުގެ ރިވެޓްމަންޓް ޖެހުމަށްވަނީ ހަމަޖެހިފައެވެ. އަދި ބަނދަރު ހިމެނޭ ސަރަޙައްދުގައި 50މީޓަރުގެ ކީވޯލަކާއި ރޭމްޕެއް ހެދުމުގެ މަސައްކަތް ހިމެނެއެވެ.
މި މަސައްކަތް ހަވާލުކޮށްފަވަނީ 9.6މިލިއަން ރުފިޔާއަށް 5މަސްދުވަހުން މަސައްކަތް ނިންމާގޮތަށެވެ.