ފެނާ ނަރުދަމާގެ މަސައްކަތްތަކުގެ ތެރެއިން މިވަގުތު މަސައްކަތް ކުރިއަށް ނުގެންދެވި ވަނީ 22 ރަށުގެ މަސައްކަތް އެކަނިކަމަށް މިނިސްޓަރ އޮފް ނެޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.
4 ރަށެއްގެ ފެނާއި ނަރުދަމާގެ މަސައްކަތް ކުރިއަށްދާ ގޮތާ ގުޅޭގޮތުން މިނިސްޓަރ އަސްލަމް މިއަދު ވަނީ މަޖިލީހަށް މައުލޫމާތު ދެއްވާފައެވެ.
ށ.ފޭދޫ، ށ.ބިލެއްފަހި، ށ.ގޮއިދޫ އަދި އެއަތޮޅު ނޫމަރާގަ ފެނާ ނަރުދަމާގެ މަސައްކަތްތައް ނުފެށިވާ މައްސަލައާ ގުޅޭގޮތުން ޕްލޭނިން މިނިސްޓަރ މުޙައްމަދު އަސްލަމްއާ ސުވާލުކުރެއްވުމަށް ހުށައަޅާފައި ވަނީ ކަނޑިތީމުގެ ދާއިރާގެ މެންބަރު އަބްދުﷲ ޝަހީމް އަބްދުލްހަކީމްއެވެ. މިއީ މިއަހަރުގެ ފެބްރުއަރީ 16ވަނަ ދުވަހު ކަނޑިތީމު ދާއިރާގެ މެންބަރު ހުށައެޅުއްވި ސުވާލެކެވެ.
މަޖިލީހަށް ހާޒިރުވެ ސުވާލަށް ޖަވާބުދެއްވަމުން ޕްލޭނިން މިނިސްޓަރ އަސްލަމް ވިދާޅުވީ ށ. ފޭދުއާ ގޮއިދޫގެ މަސައްކަތްތައް މިހާރު ކޮންޓްރެކްޓަރުންނާ ހަވާލުކޮށް އެކި މަރުޚަލާތަކުގައި މަސައްކަތް ކުރިއަށްދާކަމަށެވެ. އެގޮތުން ގޮއިދޫގެ ފެނާ ނަރުދަމާގެ ޢަމަލީ މަސައްކަތް ރަށުގައި ފަށާފައިވާއިރު، ފޭދޫގެ ފެނާ ނަރުދަމާއަށް ބޭނުންވާ އިމާރާތާ ޕަމްޕް ސްޓޭޝަންތައް ބަހައްޓާނެ ބިން ކަނޑައެޅުމުގެ މަސައްކަތް ކުރިއަށްދާކަމަށް މިނިސްޓަރ ވިދާޅުވިއެވެ.
މިހާތަނަށް އައިއިރު މަސައްކަތް ނުފެށިވަނީ ށ.ބިލެއްފައްސާއި ނޫމަރާގައިކަމަށާއި ދެ ރަށުގެ މަސައްކަތްވެސް ޓެންޑަރކުރުމަށް އެދި ފިނޭނެސް މިނިސްޓްރީއަށް ހުށައަޅާފައިވާކަމަށް މިނިސްޓަރ އަސްލަމް ވިދާޅުވިއެވެ. މިނިސްޓަރ ވިދާޅުވި ދެފަހަރެއްގެ މަތިން ހުށައެޅުމުންވެސް، ބިޑުގަ މައްސަލަތަކެއް ހުރުމުގެ ސަބަބުން މަސައްކަތް ކުރިއަށްގެންދެވޭގޮތް ވެފައި ނުވާކަމަށެވެ. އަދި ބިޑަށް ނުފޮނުވާ ޑައިރެކްޓް އެވޯޑް ނުވަތަ ސަރުކާރު ހީއްސާވާ ކުންފުންޏާކާ ހަވާލުކޮށްގެން ނަމަވެސް، ވީހާވެސް އަވަހަށް އެ މަސައްކަތްތައް ކުރިއަށްގެންދިއުމަށް މަސައްކަތް ކުރައްވާނެކަމަށްވެސް މިނިސްޓަރ ވިދާޅުވިއެވެ.
މިނިސްޓަރ އަސްލަމް ވިދާޅުވީ ފެނާއި ނަރުދަމާގެ މަސައްކަތަކީ ސަރުކާރުން ޚާއްސަ އިސްކަމެއްދީގެން ކުރަމުން އަންނަ މަސައްކަތެއްކަމަށާ، މިހާރު މަސައްކަތް ނުފެށި ހުރި ރަށްތަކުގެ މަސައްކަތްތައްވެސް ވީހާވެސް އަވަހަށް ފެށުމަށް މަސައްކަތްކުރަމުންދާކަމަށެވެ.
"ބިލެއްފައްދާ ނަރުދޫ ހިމެނޭހެން 11ރަށެއް ބިޑަށް ހުޅުވާލުމަށް ފިނޭނެސްއަށް ހުށައެޅީ. ނަމަވެސް މައްސަލަތަކެއް ހުރެގެންކަމަށްބުނެ އަދިވެސް މިރަށްތަކުގެ މަސައްކަތް ބިޑަށް ހުޅުވައެއް ނުލެވެ. އިތުރު 11ރަށުގެ ބިޑް މިހާރުވަނީ ހުޅުވާލާފަ. އެހެންވީމަ ފެނާ ނަރުދަމާގެ ތެރެއިން މިވަގުތު އަތްނުލެވި މިއޮތީ މި 22 ރަށުގެ މަސައްކަތުގަ އެކަނި." މިނިސްޓަރ އަސްލަމް ވިދާޅުވިއެވެ.
މި ދަޢުރު ނިމުމުގެ ކުރިން ރާއްޖޭގެ ހުރިހާ ރަށެއްގައި ފެނާ ނަރުދަމާގެ ޚިދުމަތް ޤާއިމުކުރުމަކީ، ސަރުކާރުގެ ވަޢުދެކެވެ. އެގޮތުން ހަމައެކަނި ފެނާ ނަރުދަމާގެ މަސައްކަތަކަށް މިއަހަރުގެ ޕީއެސްއައިޕީ ބަޖެޓުގައިވެސް 1.2 ބިލިއަން ރުފިޔާ ކަނޑައަޅުއްވާފައިވެއެވެ. މިވަގުތުވެސް އެއްފަހަރާ ގިނަ ރަށްތަކެއްގައި ފެނާ ނަރުދަމާގެ ޢަމަލީ މަސައްކަތްތައް ފަށައިގެން ކުރިއަށްދާކަން ފާހަގަކޮށްލެވެއެވެ.