މިމަހުގެ 24 ވަނަ ދުވަހު އައްޑޫ ސިޓީއަށް އާދަޔާ ޚިލާފަށް ބޯކޮށް ވެހުނު ވާރޭގެ ސަބަބުން ލިބުނު ގެއްލުންތައް ސަރުކާރުގެ ސަމާލުކަމަށް ގެނައުމަށް ރައްޔިތުންގެ މަޖިލީހަށް ކުއްލި މައްސަލައެއް ހުށައަޅުއްވައިފިއެވެ.މި ކުއްލި މައްސަލަ ހުށައެޅުއްވީ އައްޑޫ މީދޫ ދާއިރާގެ މެމްބަރު ރޮޒައިނާ އާދަމްއެވެ. އޭނާ ހުށައެޅުއްވި ކުއްލި މައްސަލާގައި ވަނީ މިމަހުގެ ސައުވީސްވަނަ ދުވަހު އައްޑޫސިޓީއަށް އާދަޔާ ޚިލާފަށް ބޯކޮށް ވާރޭ ބެހުމުގެ ސަބަބުން އެސިޓީގެ ބައެއް ގޭގެއަށާއި މަގުތަކުގައި ފެންބޮޑުވެ، ބޮޑެތި ގެއްލުންތަކެއް ލިބިފައިވާކަމަށެވެ. އެގޮތުން ބައެއް ގޭގޭގެ ފަރުނީޗަރަށް ގެއްލުން ލިބި، ކައްކާ ކެވޭގޮތްވެސް ނެތްކަމަށާއި، ބައެއް ގޭގެއިން ކަރަންޓުގެ ޚިދުމަތްވެސް ކެނޑިފައިވާކަމަށް މި ކުއްލި މައްސަލާގައިވެއެވެ.މަޖިލީހުގެ ގަވާއިދުގެ މަތިން މި ކުއްލި މައްސަލައަށް ބަހުސް ކުރިއަށް ގެންދަން ފެނޭތޯ ރިޔާސަތުން ވޯޓަށް އެއްސެވުމުން ވަނީ 48 މެމްބަރުންގެ އިއްތިފާޤުން މި މައްސަލަ ކުރިއަށް ގެންދިއުމަށް ފާސްކުރައްވާފައެވެ.މި މައްސަލައަށް ބަހުސްކުރައްވަމުން ޕީޕީއެމް ޕާލިމަންޓްރީ ގްރޫޕްގެ ލީޑަރު އަޙްމަދު ނިހާން ޙުސައިން މަނިކު ވިދާޅުވީ،އައްޑޫއަށް ވެހުނު ވާރޭގެ ސަބަބުން ލިބުނު ގެއްލުން ރައީސުލްޖުމްހޫރިއްޔާ ވަރަށް ގަތުން ބައްލަވަމުން ގެންދަވާކަމަށާއި، ޑިފެންސް މިނިސްޓަރާއި އެހެނިހެން ވަޒީރުންނާއި އައްޑޫ ސަރަހައްދަށް ކަނޑައަޅުއްވާފައި ތިއްބެވި ކޮމާންޑަރުންވެސް އެކަންކަން ބައްލަވަމުން ގެންދަވާކަމަށެވެ.ގިނަ މެމްބަރުންވެސް ވަނީ ސަރުކާރުން އެކަން ވަރަށް ގާތުން ބައްލަވަމުން ގެންދަވާކަމަށް ވިދާޅުވެ ވާހަކަ ދައްކަވާފައެވެ.އައްޑޫގައި ފެންބޮޑުވެފައިވާ ސަރަޙައްދުތަކުގައި ފެން ހިންދުމާއި ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް ކުރިއަށްގެންދިޔުމަށް ސުޓިއަރިން ކޮމެޓީއެއް މިހާރު ވަނީ އެކުލަވާލައްވާފައެވެ.މަޖިލީހުގެ ޤަވާއިދު ބުނާގޮތުން ކުއްލި މައްސަލައަށް ބަޙުސްކުރުން ފިޔަވައި އިތުރުކަމެއް މަޖިލީހުގައި ކުރިއަށް ނުގެންދާނެއެވެ.އައްޑޫ ސިޓީއަށް އިއްޔެ ކުރި ވިއްސާރައަކީ މޫސުމާބެހޭ ގައުމީ އިދާރާއިން، މޫސުމާބެހޭ ރެކޯޑްތައް ބަލަހަޓަން ފެށިފަހުން ސައުވީސް ގަޑިއިރު ތެރޭގައި އެންމެގިނަ އަދަދަކަށް ވެހުނު ވާރޭކަމަށް ރިކޯޑް ކުރެވިފައިވާކަމަށް އެއިދާރާއިން ވަނީ ހާމަކުރައްވާފައެވެ.