ލާމަރުކަޒީ ނިޒާމު ކާމިޔާބުވާނީ ކައުންސިލްތަކާއި ސަރުކާރުން އެކުގައި ކުރާ މަސައްކަތުން: މިނިސްޓަރ އިމްރާން
ލާމަރުކަޒީ ނިޒާމުގެ ކާމިޔާބީ ގުޅިފައިވާނީ ކައުންސިލްތަކާއި ސަރުކާރުން ގުޅިގެން ކުރެވޭ މަސައްކަތުން ކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
ހޯމް މިނިސްޓަރ މިހެން ވިދާޅުވީ، އަލަށް ހުވާކުރި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެމްބަރުން މަޤާމަށް އަހުލުވެރިކުރުމަށް ހިންގާ އޮރިއެންޓޭޝަން ޕްރޮގްރާމް ފެށުމުގެގޮތުން ވަރޗުއަލްކޮށް ކުރިއަށްދިޔަ ރަސްމިއްޔާތުގައި ވާހަކަފުޅުދައްކަވަމުންނެވެ.
މިރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ހޯމް މިނިސްޓަރ އަދި ލޯކަލް ގަވަރމަންޓް އޮތޯރިޓީގެ ރައީސް އިމްރާން ޢަބްދުﷲ ވިދާޅުވީ، މި ސަރުކާރު ވެރިކަމަށް އައީ ލާމަރުކަޒީ ނިޒާމު ވަރަށް ބޮޑަށް ހަލާކުވެ، ނެތިދާން ކައިރިވެފައިވަނިކޮށް ކަމަށެވެ. އެހެންކަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވަރަށް ޚާއްސަ އިސްކަމެއްދެއްވައިގެން ލާމަރުކަޒީ ޤާނޫނަށް 8 ވަނަ އިސްލާޙު ގެނައުން ވެގެންދިޔައީ މުޅި ނިޒާމު ހަރުދަނާކޮށް ރައްޔިތުންނާއި ގާތުން ޚިދުމަތް ދިނުމަށް ކުރެއްވި ވަރަށް މުހިއްމުކަމެއްގެގޮތުގައި މިނިސްޓަރ ފާހަގަކުރެއްވިއެވެ.
މިނިސްޓަރ އިމްރާން ވިދާޅުވީ، ކައުންސިލްތަކުން ޤާނޫނުތަކާއި ޤަވާއިދުތަކަށް އަހުލުވެރިވެ، ރައްޔިތުންނާގާތުން މަސައްކަތްކޮށް، ސަރުކާރާގުޅިގެން ރައްޔިތުންނަށް ޚިދުމަތް ދިނުމަކީ ވަރަށް މުހިއްމުކަމެއްކަމަށެވެ. އަދި ލާމަރުކަޒީ ނިޒާމު ހަރުދަނާވެ ފުރިހަމަވުމަށްޓަކާ އެންމެން އެކުގައި ގުޅިގެން މަސައްކަތްކުރުން، ވަކިން ޚާއްސަކޮށް ސަރުކާރާއި ކައުންސިލްތައް އެކުގައި މަސައްކަތްކުރުމަކީ ވަރަށް ބޭނުންތެރިކަމެއްކަން ފާހަގަކުރައްވާ، މިނިސްޓަރ އިމްރާން ވަނީ މިކަމަށް ވަރަށް ބޮޑަށް ބާރުއަޅުއްވާފައެވެ.
"ރަށުގައި ހިމެނޭ ދައުލަތުގެ އެހެން މުއައްސަސާތަކާ ރަށުގެ އިސްވެރިންނާއި ޖަމިއްޔާ ޖަމާޢަތްތަކާ ކައުންސިލްތަކާ ގުޅިގެން މަސައްކަތް ކުރުމުން މެނުވީ މި ނިޒާމުން ރައްޔިތުންނަށް ފޯރުކޮށްދޭންޖެހޭ އެންމެ މަތިވެރި ޚިދުމަތްތަކާއި ފޮނި މީރުކަން ލިބިގެންނުދާނެކަން އެއީ ޤަބޫލުކުރަންޖެހޭ ހަޤީޤަތެއް. އެހެންކަމުން އަޅުގަނޑު އިލްތިމާސްކުރަން ބޭނުންވަނީ ކައުންސިލްތަކުގެ ހުރިހާ މެންބަރުންނާއި، ޑަބްލިއު.ޑީ.ސީގެ ހުރިހާ މެންބަރުން އެންމެން އެކުގައި ގުޅިގެން މަސައްކަތް ކުރުމުގެ އައު ވިސްނުމަކަށް އައުމަށް. ރަށުގައި ހިމެނޭ ދައުލަތުގެ މުއައްސަސާތަކާ ޖަމިއްޔާ ޖަމާޢަތްތަކާ އެކުގައި ގުޅިގެން މަސައްކަތް ކުރެވޭނެ ސުލްހަވެރި ރިވެތި މާހައުލެއް ޤާއިމުކުރުމަށް" މިނިސްޓަރ އިމްރާން ވިދާޅުވިއެވެ.
މިނިސްޓަރ އިމްރާން ވިދާޅުވީ، ސަރުކާރުގެ އުއްމީދަކީ އަދި ސަރުކާރުގެ ބޭނުމަކީ ލާމަރުކަޒީ ނިޒާމުގެ ސަބަބުން ރައްޔިތުންނާއި ގާތުން ރައްޔިތުންނާއި ކައިރިން ފަސޭހަކަމާއެކު ފުރިހަމަ ޚިދުމަތްތަކެއް ފޯރުކޮށްދިނުންކަމަށެވެ. އަދި ތަރައްޤީގެ މަސައްކަތްތަކުގައި ސަރުކާރާއި ކައުންސިލްތަކާއި އެކުގައި ރައްޔިތުންނަށް ޚިދުމަތްކޮށްދޭ ބަޔަކަށްވުންކަމަށާއި، ރައްޔިތުންގެ އުދާސްތަކާއި ރައްޔިތުންގެ އުއްމީދުތައް ކައިރިން ފެނި، އެނގިގެން ރައްޔިތުންނަށް ޚިދުމަތްދިނުމުގައި ސަރުކާރާއި ކައުންސިލްތައް ބައިވެރިވުންކަމުގައިވެސް މިނިސްޓަރ ވިދާޅުވިއެވެ.
"މިކަމަކީ ތިޔަބޭފުޅުންނަށް މިފަހަރު ކުރިމަތިވެފައިވާ ވަރަށް ބޮޑު އިމްތިހާނެއް. ކުރީ ފަހަރުތަކުގައި ކައުންސިލްތަކަށް މަދު ދުވަސްކޮޅެއްގެ ތެރޭގައި މަސައްކަތްކުރުމަށް ދަތިވެ އުނދަގޫވެގެންދިޔަ ފަދައިން މިފަހަރު އެކަން ތަކުރާރު ނުކުރުމަށް އަޅުގަނޑު އެންމެހާ ކައުންސިލަރުންގެ ކިބައިން އިލްތިމާސްކުރަން. އާދެ ސަރުކާރާއެކުގައި ގާތުން ގުޅިގެން މަސައްކަތްކުރުމުން މި ނިޒާމް ކާމިޔާބުކުރެވި އިތުރަށް ހަރުދަނާކުރެވި، ރައްޔިތުންނަށް ލިބިދޭންޖެހޭ ހުރިހާ ޚިދުމަތް ފޯރުކޮށްދިނުމުގައި އަޅުގަނޑުމެން އެންމެންގެ ބައިވެރިވުމަކީ ވަރަށްވެސް މުހިއްމުކަމެއް" މިނިސްޓަރ އިމްރާން ވިދާޅުވިއެވެ.
ރާއްޖޭގައި ކޯވިޑް-19ގެ ޙާލަތު އަދިވެސް ރަނގަޅުވެފައިނުވާތީ، މިދުވަސްވަރު ކައުންސިލްތަކުން ޚިދުމަތްތައް ދިނުމުގައި މި ބަލިމަޑުކަމުން އަރައިގަނެ، ރަށުގެ ތަރައްޤީއާއި ކުރިއެރުމާއި، އިޤްތިޞާދު ހަރުދަނާކޮށް ރަށްވެހި ތަރައްޤީއަށް މަގުފަހިކޮށްދޭގޮތަށް މަސައްކަތްތައް ބައްޓަންކުރެއްވުމަށްވެސް މިނިސްޓަރ އިމްރާން ވަނީ ކައުންސިލްތަކަށް ގޮވާލައްވާފައެވެ.
މިއަދުން ފެށިގެން މިމަހުގެ 27 އަށް އެލް.ޖީ.އޭއިން ކުރިއަށްގެންދާ މި އޮރިއެންޓޭޝަން ޕްރޮގްރާމަކީ އާ ދައުރަކަށް އިންތިޚާބުކުރެވުނު ކައުންސިލަރުންނާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ މެމްބަރުންނަށް އެފަރާތްތަކުގެ ދައުރާއި ޒިންމާ އަންގައިދިނުމާއި، އެ ޒިންމާތައް އަދާކުރުމަށް ބޭނުންވާ މަޢުލޫމާތު ފޯރުކޮށްދީ، ކައުންސިލްތަކުގެ ހިންގުން ހަރުދަނާކުރުމާއި، ސަރުކާރުގެ އެކިއެކި މުއައްސަސާތަކާއި ގުޅިގެން މަސައްކަތްކުރާނެގޮތުގެ މަޢުލޫމާތު ހިއްސާކުރުމަށް ކުރިއަށްގެންދާ ޕްރޮގްރާމެކެވެ.
އެގޮތުން ކައުންސިލްތައް ހިންގުމުގެ ޤާނޫނީ ބާރުވެރިކަން، ކައުންސިލަރުންގެ ޒިންމާތަކާއި މަސްއޫލިއްޔަތުތަކާ، ކައުންސިލްގެ އިދާރީ ހިންގުމާއި އިދާރީ މުވައްޒަފުންނާގުޅޭ މަޢުލޫމާތާއި، ޤާނޫނުތަކާ ޤަވާއިދުތަކާ އެއްގޮތަށް ކައުންސިލްގެ މާލީ ކަންކަން ބެލެހެއްޓުމާގުޅޭ މަޢުލޫމާތު މި ޕްރޮގްރާމްގެ ތެރެއިން ފޯރުކޮށްދެވޭނެއެވެ. އަދި ކައުންސިލަރުންގެ މަސައްކަތްތައް މިންކުރުމާއި، އަންހެނުންގެ ތަރައްޤީއަށް މަސައްކަތްކުރާ ކޮމެޓީތަކުގެ މަސައްކަތާއި، ރަށުގެ ތަރައްޤީއަށް ކަންކަން ރާވާނެގޮތާއި، ރައްޔިތުންގެ ބައިވެރިވުން ކަންކަމުގައި ހޯދާނެގޮތްތަކާއި، ހެޔޮވެރިކަން އަދި ލިޑަރޝިޕްފަދަ ބައިތަކަށްވެސް މި ޕްރޮގްރާމްގެ ތެރެއިން އަލިއަޅުވާލެވޭނެކަމަށް އެލް.ޖީ.އޭއިން ވިދާޅުވެއެވެ.