3 ރަށެއްގެ ބަނދަރާ ގުޅުންހުރި މަސައްކަތްތަކެއް ކުރުމަށް އެމް.ޓީ.ސީ.ސީއާ ޙަވާލުކޮށްފިއެވެ.
މިނިސްޓްރީ އޮފް ނެޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރގައި ބޭއްވި ޚާއްސަ ރަސްމިއްޔާތެއްގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއާއި ޙަވާލުކޮށްފައިވަނީ، ހއ.ބާރަށު ނެރު ފުންކުރުމާއި، ނ.މަނަދޫ ބަނދަރުގެ ނެރު ހެދުމުގެ އިތުރުން، ނ.ވެލިދޫ ދޯނި އެހެލާ ސަރަޙައްދު ހެދުމަށެވެ.
މި މަޝްރޫޢުތައް އެކުންފުންޏާއި ޙަވާލުކުރުމުގެ އެއްބަސްވުމުގައި ޕްލޭނިންގ މިނިސްޓްރީގެ ފަރާތުން ސޮއިކުރެއްވީ، ޕާރމަނަންޓް ސެކްރެޓަރީ ޒީނިޔާ އަޙްމަދު ޙަމީދެވެ. އެމް.ޓީ.ސީ.ސީގެ ފަރާތުން ސޮއިކުރެއްވީ އެކުންފުނީގެ ޗީފް އޮޕަރޭޓިންގ އޮފިސަރ ޝާހިދު ޙުސެއިން މޫސާއެވެ. މި 3 މަޝްރޫޢުގެ މަސައްކަތް ކުރުމަށް އެމް.ޓީ.ސީ.ސީއާ ޙަވާލުކޮށްފައިވަނީ ޑިޒައިން އެންޑް ބިލްޑް އުޞޫލުންނެވެ.
އެގޮތުން ހއ.ބާރަށު ނެރު ފުންކުރުމުގެ މަޝްރޫޢުގެ ދަށުން މެދު ދިޔައިން ފެށިގެން 8.0- މީޓަރަށް ހަމަވާވަރަށް 79،100 އަކަ މީޓަރުގެ ސަރަޙައްދެއްގެ ނެރު ފުންކުރުމާއި، މެދު ދިޔައިން ފެށިގެން 3.5- މީޓަރަށް ހަމަވާވަރަށް 8،600 އަކަ މީޓަރުގެ ސަަރަޙައްދެއް، ޖެޓީ ކައިރިން ފުންކުރުން ހިމެނެއެވެ. އަދި 4 ނެވިގޭޝަން ލައިޓް ހަރުކުރުމަށްވެސް ވަނީ ނިންމާފައެވެ. މި މަސައްކަތް ކުރުމަށް އެމް.ޓީ.ސީ.ސީއާއި ޙަވާލުކޮށްފައިވަނީ 120 ދުވަހުގެ ތެރޭގައި މަސައްކަތް އެއްކޮށް ނިންމާގޮތަށެވެ. އަދި މި މަޝްރޫޢަށް 12 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.
ނ. މަނަދޫ ބަނދަރުގެ ނެރު ހެދުމަށް ޕްލޭނިންގ މިނިސްޓްރީގެ ފަރާތުން އެމް.ޓީ.ސީ.ސީއާއި ޙަވާލުކޮށްފައިވަނީ 300 ދުވަހުގެ ތެރޭގައި މަސައްކަތް ފުރިހަމަކުރާގޮތަށެވެ.
މި މަޝްރޫޢުގެ ދަށުން މެދު ދިޔައިން ފެށިގެން 3.0- މީޓަރަށް ހަމަވާވަރަށް 13،216 އަކަ މީޓަރު ސަރަޙައްދެއްގެ ބަނދަރު ފުން ކުރުމާއި، މެދު ދިޔައިން ފެށިގެން 4.0- މީޓަރު ހަމާވަރަށް 15،822 އަކަ މީޓަރުގެ ސަރަޙައްދެއްގެ ބަނދަރަށް ވަންނަ ނެރު ފުން ކުރުމަށް ވަނީ ހަމަޖެހިފައެވެ. އަދި 290 މީޓަރުގެ ބޮޑު ހިލައިގެ ބޭރުތޮއްޓެއް ޖެހުމާއި، 2 ނެވިގޭޝަނަލް ލައިޓް ހަރުކޮށް، 20 މޫރިންގ ބޮއި ހަރުކުރުމަށްވެސް ވަނީ ނިންމާފައެވެ.
މީގެ އިތުރުން ކުދި އުޅަނދުފަހަރު ކައިކުރުމަށް ބޭރުތޮށީގެ އެތެރެފާރު ކައިރީގައި ކޮންކްރީޓް ޖެޓީއެއްވެސް މަނަދޫގައި އެޅުމަށް ހަމަޖެހިފައިވެއެވެ. މި މަޝްރޫޢަށް 29 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.
ނ. ވެލިދޫ ދޯނި އެހެލާ ސަރަޙައްދުގެ މަސައްކަތް ކުރުމަށް ޕްލޭނިންގ މިނިސްޓްރީން އެމް.ޓީ.ސީ.ސީއާއި ޙަވާލުކޮށްފައިވަނީ 280 ދުވަހުގެ ތެރޭގައި ނިންމާގޮތަށެވެ.
މި މަޝްރޫޢުގެ ދަށުން 254.56 އަކަމީޓަރުގެ ސަރަޙައްދެއްގައި ރިވެޓްމަންޓް ޖެހުމާއި، 17،768 އަކަމީޓަރުގެ ބިން ހިއްކުމަށް ވަނީ ހަމަޖެހިފައެވެ. އަދި ކުރިން އެރަށުގައި ހިއްކާފައިވާ ސަރަޙައްދުގެ ބިންގަނޑު ލެވެލްކުރުންވެސް މި މަޝްރޫޢުގެ ތެރޭގައި ހިމެނެއެވެ. މި މަޝްރޫޢަށް 18 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.