ރާއްޖޭގައި ޢުމްރާނީ ތަރައްޤީއާއި ގުޅުންހުރި އެންމެ ގިނަ މަޝްރޫޢުތައް މިވަގުތު ކުރިއަށްދާ އެއް ސަރަޙައްދަކީ އެންމެ ދެކުނުން އައްޑޫސިޓީއެވެ.
އައްޑޫސިޓީގެ ރަށްތަކުގައި 95 މަޝްރޫޢެއްގެ މަސައްކަތްތައް އެކި މަރުހަލާތަކުގައި މިހާރުވެސް ކުރިއަށްއެބަދެއެވެ. އޭގެ ތެރެއިން އައްޑޫސިޓީ މަރަދޫފޭދޫ، މަރަދޫ އަދި ފޭދޫގެ ނަރުދަމާ ނިޒާމު ޤާއިމުކުރުމުގެ މަސައްކަތަކީ ފާހަގަކޮށްލެވޭ މަސައްކަތެކެވެ. އެކަށީގެންވާ ނަރުދަމާ ނިޒާމެއް ޤާއިމުވެފައި ނެތުމަކީ މި 3 ރަށުގައި ދިރިއުޅޭ ރައްޔިތުންނަށްވެސް ކުރިމަތިވެފައިވާ ވަރަށް ބޮޑު ތަކުލީފެކެވެ.
މި މަޝްރޫޢު ކުރިއަށްގެންދާ އެމް.ޓީ.ސީ.ސީން މަޢުލޫމާތުދެއްވިގޮތުގައި މި 3 ރަށުގެ ނަރުދަމާ ނިޒާމު ޤާއިމުކުރުމުގެ މަޝްރޫޢުގެ ބޮޑުބައި ނިންމާ، މިދިޔަ ސެޕްޓެމްބަރ މަހުގެ 12 ވަނަ ދުވަހު ވަނީ ފެނަކަ ކޯރޕަރޭޝަނާއި ޙަވާލުކޮށްފައެވެ. އެގޮތުން މަރަދޫފޭދޫ އަދި މަރަދޫ ނަރުދަމާ ނިޒާމް ޤާއިމުކުރުމަށް ބޭނުންވާ ހުރިހާ މަސައްކަތެއްވަނީ އެއްކޮށް ނިމިފައެވެ. އަދި މިހާރު ކުރިއަށްދަނީ ފޭދޫގެ ސީއައުޓްފޯލުގެ ރެޓިފިކޭޝަން މަސައްކަތްކަމަށް އެމް.ޓީ.ސީ.ސީން ވިދާޅުވެއެވެ.
މަރަދޫފޭދޫ އަދި މަރަދޫގައި ނަރުދަމާ ނިޒާމް ޤާއިމުކުރުމުގެ މަސައްކަތް ނިންމާ ފެނަކަ ކޯރޕަރޭޝަނާއި ޙަވާލުކުރުމުގެ ކުރިން މި ދެ ރަށުގެ ޕަމްޕިންގ ސްޓޭޝަން، ޕެނަލް ބޯޑްސް، އަދި ޓްރާންސްފަރ ސްޓޭޝަންތައް އެމް.ޓީ.ސީ.ސީއާއިމ ފެނަކަ ކޯރޕަރޭޝަނާއި، އަދި ކޮންސަލްޓެންޓުންގެ ޓީމުން ބަލައި ފާސްކޮށްފައިވެއެވެ. އަދި މި ދެ ރަށުގައި 10،289 މީޓަރުގެ ހޮޅިވަޅުލައި، މަރަދޫގެ ޓްރާންސްފަރ ސްޓޭޝަންގައި 720 މީޓަރުގެ ސީއައުޓްފޯލެއް ޤާއިމުކޮށްފައިވެއެވެ.
މީގެ އިތުރުން އެމް.ޓީ.ސީ.ސީގެ ފަރާތުން ފެނަކަ ކޯރޕަރޭޝަންގެ މުވައްޒަފުންނަށް ނަރުދަމާ ނިޒާމް ބެލެހެއްޓުމަށް ބޭނުންވާ މަޢުލޫމާތު ފޯރުކޮށްދިނުމުގެ ގޮތުން ތަމްރީންކުރުމުގެ ސެޝަންތަކެއް ބާއްވާފައިވެއެވެ.
މިނިސްޓްރީ އޮފް އެންވަޔަރަމަންޓްގެ ފަރާތުން އެމް.ޓީ.ސީ.ސީއާއި ޙަވާލުކޮށްގެން ކުރިއަށްގެންދާ މި މަޝްރޫޢަކީ 124 މިލިއަނަށްވުރެ ގިނަ ރުފިޔާ ޚަރަދުކޮށްގެން ކުރިއަށްގެންދާ މަޝްރޫޢެކެވެ. އެމް.ޓީ.ސީ.ސީން ވިދާޅުވީ، މިއަހަރުގެ ޑިސެމްބަރ މަހުގެ ނިޔަލަށް މި މަޝްރޫޢު އެއްކޮށް ނިންމާލުމަށް ތާވަލުކޮށްފައިވާކަމަށެވެ.