އއ. ހިމަންދޫ ބަނދަރު ތަރައްޤީކުރުމުގެ މަޝްރޫޢު، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމް.ޓީ.ސީ.ސީން ނިންމާލައިފިއެވެ.
ދަޢުލަތުގެ ބަޖެޓުން 47.1 މިލިއަން ރުފިޔާ ޚަރަދުކޮށްގެން ހިމަންދޫ ބަނދަރު ތަރައްޤީކުރުމުގެ ޢަމަލީ މަސައްކަތް އެމް.ޓީ.ސީ.ސީން ފަށާފައިވަނީ މިދިޔަ އަހަރުގެ އޭޕްރީލް މަހުގެ ތެރޭގައެވެ.
މި މަޝްރޫޢުގެ ދަށުން 28 ހާސް ކިއުބިކް މީޓަރުގެ ސަރަޙައްދެއް ހިއްކާ، 372 މީޓަރުގެ އެއްގަމު ތޮށްޓަކާއި، 405 މީޓަރުގެ ބޭރު ތޮށްޓެއް ވަނީ ޤާއިމުކޮށްފައެވެ. އަދި 141 މީޓަރުގެ ރިވެޓްމަންޓް ޖަހާ، އެއްގަމު ތޮށްޓާއި ބޭރު ތޮށި ގުޅުވާލުމަށް ފާލަމެއް ހެދުމުގެ އިތުރުން، ބާޖުތަކަށް ފަސޭހައިން ބަނދަރާއި ގާތްކުރެވޭގޮތަށް ރޭމްޕެއްވެސް ޤާއިމުކޮށްފައިވެއެވެ.
މީގެ އިތުރުން، 3 މީޓަރު ފުޅާ ކޮންކްރީޓް ޖެޓީއެއް ތަރައްޤީކޮށް، ބަނދަރާއި އިންވެގެން 1750 މީޓަރު ދިގު ޕޭވްމަންޓް މަގު ތަރައްޤީކޮށް، މަގު ބައްތި ޖެހުމުގެ މަސައްކަތްވެސް އެމް.ޓީ.ސީ.ސީން ވަނީ ކޮށްފައެވެ.