އައްޑޫ ޓޫރިޒަމް ޒޯންތަކުގެ ބީޗް ހެދުމަށް ބޭނުންވާ އީއައޭ ހެދުމުގެ މަސައްކަތް ބަޔަކާއި ހަވާލުކޮށްފި

އައްޑޫގެ ޓޫރިޒަމް ޒޯން ތަކުގެ ބީޗް ހެދުމަށް ބޭނުންވާ އީއައިއޭ ހަދަން ބަޔަކާ ޙަވާލު ކުރަން ފަށައިފިއެވެ.

އައްޑޫސިޓީ ކައުންސިލް އިދާރާގައި ބޭއްވި ރަސްމިއްޔާތެއްގައި މިމަސައްކަތް ހަވާލުކޮށްފައިވަނީ އޮމްނި ސޮލިއުޝަންސް ލިމިޓެޑްއާއި އެވެ. މިމަޝްރޫއަށް ޖުމްލަ 922،200ރ. ޚަރަދުވާނެ ކަމަށް ސިޓީ ކައުންސިލުން ބުނެއެވެ. މިއެއްބަސްވުމުގެ ދަށުން އައްޑޫގެ ކަނޑެއޭޅޭ ސަރަހައްދުތަކުގައި ބީޗް ހެދުމަށް ބޭނުންވާ އީއައިއޭގެ އިތުރަށް، އޮޕްޝަންސް އެނަރލިސިސް އެއް ހަދާނެއެވެ. މީގެ އިތުރުން އާޓިފިޝަލް ބީޗް ތައް ޑިޒައިން ކުރުމުގެ މަސައްކަތް ވެސް އެފަރާތުން ކުރުމަށް ވަނީ ހަމަޖެހިފައެވެ.

އައްޑޫސިޓީ ކައުންސިލް އިދާރާގައި ސޮއި ކުރެވުނު މިއެއްބަސްވުމުގެ ދަށުން، ހިތަދޫ، ފޭދޫ، އަދި ހުޅުމީދޫގެ ޓޫރިޒަމް އަށް ކަނޑައެޅިފައިވާ ސަރަހައްދުތަކުގެ ބީޗް ހެދުމުގެ އިތުރުން، ހަނކެޑެ ސަރަހައްދުގައި 200 މީޓަރުގެ ބީޗެއް ހެދުންވެސް ހިމެނެއެވެ. މީގެ އިތުރުން، ފޭދޫ ސްވިމިންގް ޓްރެކް އަޅާ ސަރަހައްދު ފުން ކުރުމަށް ބޭނުންވާ އީއައިއޭ ހަދައި، އައްޑޫ އިން ވެލި ނަގާނެ ސަރަހައްދެއް ކަނޑައަޅައި އެސަރަހައްދުގެ ވެސް އީއައިއޭ ހެދޭނެ ކަމަށް އައްޑޫސިޓީ ކައުންސިލުން ބުނެއެވެ.

އައްޑޫސިޓީ ކައުންސިލުން މިހާރު ބީޗްތައް ހެދުމަށް އީއައިއޭ ހެދުމުގެ އެއްބަސްވުމުގައި ސޮއި ކޮށްފައިވާއިރު، އަވަށްތަކުގެ ޓޫރިޒަމް ޒޯންތަކަށް ކުރިމަތި ލުމުގެ ފުރުޞަތު މިދިޔަ އަހަރު ފަހު ކޮޅު ވަނީ ހުޅުވާފައެވެ. އައްޑޫސިޓީ ކައުންސިލުން މައުލޫމާތު ދޭ ގޮތުގައި ގެސްޓްހައުސްއަށް ބިން ދޫކުރުމަށް ކަނޑައަޅާ ސަރަހަދުގައި އާޓިފިޝަލް ބީޗަކާއެކު ސަޕޯޓް ފެސިލިޓީސް ތައް ޤާއިމު ކުރެވޭނެއެވެ.