މާފަރު އެއަރޕޯޓުގެ ރަންވޭ ބޮޑުކުރުމުގެ މަސައްކަތް ކުރިއަށް ނުގެންދިއުމަށް އީ.ޕީ.އޭއިން ލަފާދީފި

ނ.މާފަރު އިންޓަރނޭޝަނަލް އެއަރޕޯޓުގެ ރަންވޭ ބޮޑުކުރުމުގެ މަޝްރޫޢު ކުރިއަށް ނުގެންދިއުމަށް އެންވަޔަރަމަންޓަލް ޕްރޮޓެކްޝަން އެޖެންސީ، އީ.ޕީ.އޭއިން ލަފާދެއްވައިފިއެވެ.

އީ.ޕީ.އޭއިން މިގޮތަށް ލަފާދެއްވާފައިވަނީ މާފަރު އެއަރޕޯޓުގެ ރަންވޭ ބޮޑުކުރުމާ ގުޅޭގޮތުން އެއެޖެންސީ ހަދާފައިވާ ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓަށް ބެއްލެވުމަށްފަހުއެވެ.

މާފަރު އިންޓަރނޭޝަނަލް އެއަރޕޯޓުގެ ރަންވޭ ބޮޑުކުރުމަށް ހަދަންޖެހޭ އީ.އައި.އޭ ރިޕޯޓުގައި އެމަޝްރޫޢުގެ ސަބަބުން ރަށުގެ ތިމާވެށްޓާއި ޤުދުރަތީ ދިރުންތަކަށް ލިބިދާނެ ގެއްލުންތައް ވަރަށް ތަފްޞީލުކޮށް ބަޔާންކުރައްވާފައިވެއެވެ.

އެގޮތުން އެއަރޕޯޓު ފުޅާކުރުމަށް ރަށުތެރޭން 8.7 ހެކްޓަރުގެ ބިން ބޭނުންކުރަންޖެހޭއިރު، އެ ސަރަޙައްދު ބޭނުންކުރުމަށްޓަކާ 4.8 ހެކްޓަރުގެ ބިމުން ގަސްކަނޑާ ސާފުކުރަންޖެހޭކަމަށް މި ރިޕޯޓުގައި ބުނެފައިވެއެވެ. އަދި ރަށު ތެރެއިން އިތުރަށް ބޭނުންވާ ބިމުގެ ތެރޭގައި މީހުންނަށް ދޫކޮށްފައިވާ ގޯތި ހިމެނޭކަމަށާއި، އެ ސަރަޙައްދުގެ %45އަކީ ގަސްގިނަ ސަރަޙައްދެއްކަންވެސް މި ރިޕޯޓުގައިވަނީ ފާހަގަކުރައްވާފައެވެ. އެގޮތުން އެ ސަރަޙައްދުގައި އެކަނިވެސް 678 ރުއްގަސް ހުރިކަމަށް އީ.ޕީ.އޭއިން ހެދި ރިޕޯޓުގައި ވެއެވެ.

އަދި މާފަރަކީ ޢާއްމުކޮށް ވެލާ އަރާ ރަށެއްކަމަށާ، ރަންވޭ ފުޅާކުރުމަށްޓަކާ ހިއްކަން ރާވާފައިވާ ސަރަޙައްދުގައި މޫދުވިނަތަކުގެ ތެރޭގައި ވެލާ އުޅެމުންދާކަމަށްވެސް މި ރިޕޯޓުގައި ވެއެވެ.

މި މަޝްރޫޢުގެ ސަބަބުން 9000 ގަހަށް ނޭދެވޭ އަސަރުކުރާނެކަމަށް ލަފާކޮށްފައިވާއިރު، އޭގެ ތެރޭގައި 1100 ރުއް ހިމެނޭކަމަށް އީ.ޕީ.އޭއިން ވިދާޅުވެފައިވެއެވެ. އަދި މިހާރު މީހުންނަށް ދީފައިހުރި ބިން ރަށުގެ އުތުރު ފަރާތަށް ބަދަލުކޮށްފިނަމަ، އިތުރަށް ރުއްގަސް ނަގަންޖެހިދާނެކަމަށާ، މިމަޝްރޫޢުގެ ސަބަބުން ގަސްތަކުން ރަށުގެ ރައްޔިތުން ކުރަމުންދިޔަ ބޭނުން އެމީހުންނަށް ގެއްލިގެން ހިނގައިދާނެކަމަށްވެސް އީ.ޕީ.އޭއިން ވަނީ ވިދާޅުވިއެވެ.

މި މަޝްރޫޢާ ގުޅޭގޮތުން ރައްޔިތުންގެ ޚިޔާލު ހޯދުމަށް ރަށު ކައުންސިލާގުޅިގެން ބޭއްވި ބައްދަލުވުމުގައިވެސް ރައްޔިތުން އެންމެ ބޮޑަށް ފާހަގަކޮށްފައިވަނީ ބިން ގެއްލުމާއި ރުއްގަސް ކަނޑަންޖެހުމުގެ މައްސަލަކަމަށް އީ.ޕީ.އޭއިން ވަނީ ވިދާޅުވެފައެވެ. އަދި ރައްޔިތުންނަށް ދީފައިވާ ބިން އަލުން ނެގުމުންނާއި އޭގެ ބަދަލުގައި ދެވޭ އެއްޗަކާމެދު ހިތްހަމަނުޖެހި، ރައްޔިތުންގެ މެދުގައި ޚިޔާލު ތަފާތުވުންތަކެއް ކުރިމަތިވެދާނެކަމަށްވެސް އެ އެޖެންސީން ވިދާޅުވެއެވެ.

މަފަރު އެއަރޕޯޓާއެކު ރަށާއި އަތޮޅުގެ ރައްޔިތުންނަށް ވަޒީފާގެ ފުރުޞަތުތައް އިތުރުވެ، ފަސޭހައިން ދަތުރުފަތުރު ކުރެވޭނެ އިންތިޒާމް ހަމަޖެހުންކަމުގައިވިޔަސް، އެއަރޕޯޓުގެ އޮޕަރޭޝަންތަކުގެ ސަބަބުން އެސަރަޙައްދުގެ ވައި ތަޣައްޔަރުވުމާއި އަޑުގަދަވުންފަދަ މައްސަލަތައް ކުރިމަތިވާނެކަމަށް މި ރިޕޯޓުގައި އީ.ޕީ.އޭއިން ވަނީ ބުނެފައެވެ. އަދި ތިމާވެށްޓަށާއި މުޖުތަމައުއަށް ނޭދެވޭ އަސަރުތަކެއް ހުރުމުން، މި މަޝްރޫޢަކީ އިޤްތިޞާދީގޮތުން މިވަގުތަށް ކޮންމެހެން ކުރަންޖެހޭ މަސައްކަތެއްތޯ ޕްލޭނިންގ މިނިސްޓްރީން އެންވަޔަރަމަންޓް މިނިސްޓްރީން މުރާޖަޢާކުރުމަށްފަހު ކުރިއަށްގެންދިއުމަށް މި ރިޕޯޓުގައި އީ.ޕީ.އޭއިން ވަނީ ލަފާދީފައެވެ.

މާފަރު އެއަރޕޯޓުގެ ރަންވޭ ބޮޑުކުރުމުގެ މަޝްރޫޢު ކުރިއަށް ނުގެންދިއުމަށް އީ.ޕީ.އޭއިން ލަފާދީފައިވާއިރު، އެންމެ ބޮޑެތި މަތިންދާ ބޯޓު ޖެއްސޭ ފެންވަރަށް މާފަރު އެއަރޕޯޓު ތަރައްޤީކޮށްދެއްވާނެކަމަށް މިއަހަރުގެ މާރޗުމަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުވަނީ އިޢުލާންކޮށްދެއްވާފައެވެ. އަދި މިމަޝްރޫޢަށް ޔޫ.އޭ.އީން އެހީ ހަމަޖެހިފައިވާކަންވެސް ސަރުކާރުން ހާމަކުރައްވާފައިވެއެވެ.

3200 މީޓަރުގެ ދިގު ރަންވޭއަކާއެކު ތަރައްޤީކޮށްފައިވާ މާފަރު އިންޓަރނޭޝަނަލް އެއަރޕޯޓުގެ މަސައްކަތް ނިންމާ، ޝެޑިއުލް ދަތުރުތައް ފަށާފައިވަނީ މިމަހުގެ 1ވަނަ ދުވަހުއެވެ. މިއީ އާބޫދާބީ ފަންޑުން ހަދިޔާކުރި 60 މިލިއަން ޑޮލަރުގެ ހިލޭ އެހީގެ ދަށުން ކުރިއަށްގެންގޮސްފައިވާ މަޝްރޫޢެކެވެ.