ރާއްޖޭގެ ތަރައްޤީގެ ކާމިޔާބު ދަތުރުގައި މުހިންމު ޙިއްސާދާރަކަށްވުމުގައި ބައިނަލްއަޤްވާމީ ފަރާތްތަކުން ވާދަކުރުމަށް މިިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު ގޮވާލައްވައިފިއެވެ.
ފޮރިން މިނިސްޓަރ މިފަދައިން ގޮވާލައްވާފައިވަނީ މޯލްޑިވްސް ޕާޓްނަޝިޕް ފޯރަމްގައި ބައިވެރިވާ ބައިނަލްއަޤްވާމީ ފަރާތްތަކަށް މަރުހަބާދެއްނެވުމަށް ބޭއްވި ވެލްކަމް ޑިނަރގައި ވާހަކަފުޅުދައްކަވަމުންނެވެ.
މޯލްޑިވްސް ޕާޓްނަޝިޕް ފޯރަމްގައި ބައިވެރިވާ ބައިނަލްއަޤްވާމީ ފަރާތްތަކަށް މަރުޙަބާދެއްނެވުމަށް ޝެރެޓަން މޯލްޑިވްސް ފުލްމޫން ރިސޯޓް އެންޑް ސްޕާގައި ބޭއްވި ވެލްކަމް ޑިނަރގައި ވާހަކަފުޅުދައްކަވަމުން މިިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދުވަނީ މިދިޔަ ނޮވެމްބަރުމަހު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ސަރުކާރު ރާއްޖޭގެ ވެރިކަމާ ހަވާލުވީ ރާއްޖެއަށް ބޮޑެތި ކާމިޔާބީތަކެއް ހޯދައިދިނުމުގެ މަޤުސަދުގައިކަން ފާހަގަކުރައްވާފައެވެ. އެގޮތުން އުމްރަނީގޮތުންނާއި އިޤްތިޞާދީގޮތުން، އަދި އިންސާނީ ހައްޤުތަށް ޙިމާޔަތްކުރުން ފަދަ ދާއިރާތަކުން އުންމީދީ ގިނަ ޕްލޭންތަކެއް ސަރުކާރުން ގެންގުޅުއްވާކަމަށް މިނިސްޓަރ ޝާހިދު ވިދާޅުވިއެވެ.
މިމޭރުމުން ވާހަކަފުޅުދައްކަވަމުން މިނިސްޓަރ ޝާހިދުވަނީ، މޯލްޑިވްސް ޕާޓްނަޝިޕް ފޯރަމްގައި ބައިނަލްއަޤްވާމީ 130 ހަށްވުރެ ގިނަ ފަރާތްތަކުން ބައިވެރިވުމަކީ، ބައިނަލްއަޤްވަމީ މުޖުތަމަޢުން ރާއްޖެއާއެކު އޮތްކަންކަން ހާމަވާކަމެއްކަން ފާހަގަކުރައްވާފައެވެ. މިނިސްޓަރ ޝާހިދުވަނީ، މި ފުރުސަތުގައި ރާއްޖޭގެ ތަރައްޤީގެ ކާމިޔާބު ދަތުރުގައި މުހިންމު ހިއްސާދާރަކަށްވުމުގައި ބައިނަލްއަޤްވާމީ ފަރާތްތަކުން ވާދަކުރުމަށް ގޮވާލައްވާފައެވެ.
"މިސަރުކާރު ނޮވެމްބަރ މަހު ވެރިކަމާއި ހަވާލުވީ ރާއްޖެއަށް ބޮޑެތި ކާމިޔާބީތަކެއް ފޯރުކޮށްދޭން. އެގޮތުން ޢުމްރަނީގޮތުންނާއި އިޤްތިޞާދީގޮތުން އަދި އިންސާނީ ހައްޤުތަށް ޙިމާޔަތްކުރުންފަދަ ދާއިރާތަކުން ގިނަ އުންމީދީ ޕްލޭންތަކެއް އެބައޮތް. ރާއްޖޭގެ ތަރައްޤީގެ ކާމިޔާބު ދަތުރުގައި މުހިންމު ހިއްސާދާރަކަށްވުމުގައި މިއީ ރަނުގެ ފުރުސަތު. މިކަމުގައި ވާދަކުރުމަށް ދިވެހިރާއްޖެއިން ގޮވާލަން." މިނިސްޓަރ ޝާހިދު ވިދާޅުވިއެވެ.
މިޑިނަރގައި ވާހަކަފުޅުދައްކަވަމުން، މިނިސްޓަރ އޮފް ފިނޭންސް އިބްރާހީމް އަމީރު ވަނީ ރާއްޖޭގެ ތަރައްޤީގައި ބައިނަލްއަޤްވާމީ ފަރާތްތަކުން ރާއްޖެއާ ގުޅުން ބަދަހިކުރުމުގެ މުހިންމުކަމުގެ މައްޗަށް އަލިއަޅުއްވާލައްވާފައެވެ. އެގޮތުން 2 ދުވަހަށް ކުރިއަށްގެންދާ މި ފޯރަމްގެ ޒަރިއްޔާއިން މިގުޅުން ބަދަހިކުރެއްވުމަށް މިނިސްޓަރ ގޮވާލެއްވިއެވެ.
"ރާއްޖޭގެ ތަރައްޤީގައި ބައިނަލްއަޤްވާމީ ފަރާތްތަކުން ރާއްޖެއާއި ގުޅުން ބަދަހިކުރުން މުހިންމު. މި ފޯރަމްއަކީ މިކަމަށް އެންމެ ރަނގަޅު ފުރުސަތު" މިނިސްޓަރ އަމީރު ވިދާޅުވިއެވެ.
މޯލްޑިވްސް ޕާޓްނަރޝިޕް ފޯރަމް 2019ގައި ދުނިޔޭގެ 35 ޤައުމަކުން 130 އަށްވުރެ ގިނަ މަންދޫބުން ބައިވެރިވާނެއެވެ. މިފޯރަމުގައި ސަރުކާރުގެ ތަރައްޤީގެ އެޖެންޑާއާއި، ޤައުމީ ތަރައްޤީގެ ޕްލޭނާ ބެހޭގޮތުން ، ވަޒީރުން މަޢުލޫމާތު ދެއްވުމަށް ވަނީ ހަމަޖެހިފައެވެ. މިއަހަރުގެ ފޯރަމަށް ކަނޑައަޅާފައިވާ މައިގަނޑު ޝިޢާރަކީ "ދެމެހެއްޓެނިވި އަދި ފުދުންތެރި ރާއްޖެއެއް ބިނާކުރުމުގައި ބައިވެރިވުން" މި ޝިއާރެވެ.