މިއަހަރު ގދ. ތިނަދޫގައި ފުޓުބޯޅަ ކުޅޭ ބޮޑު ދަނޑެއް އަޅުއްވައިދެއްވާނެ ކަމަށް މިނިސްޓަރ އޮފް ޔޫތް އެންޑް ސްޕޯޓްސް، އަހުމަދު މަހުލޫފް ވިދާޅުވެއްޖެއެވެ.
މިނިސްޓަރ މިހެން ވިދާޅުވީ މިއަދު ތިނަދޫއަށް ވަޑައިގެން މިރޭ އެރަށުގައި ފެށި "ތިނަދޫ ކައުންސިލުގެ ފުޓްސަލް ޓޯނަމެންޓް 2019" ފައްޓަވައިދެއްވުމުގެ ގޮތުން ވާހަކަފުޅު ދައްކަވަމުންނެވެ. އެ މުބާރާތް ފެއްޓުމަށް ބޭއްވި ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން މިނިސްޓަރ ވިދާޅުވީ ކުޅިވަރުގެ ދާއިރާއިން ޒުވާނުން އަހުލުވެރިކުރުވުމުގެ ގޮތުން ބޮޑެތި ފުޓުބޯޅަ ދަނޑުތައް ތަރައްގީކުރުމަކީ މިސަރުކާރުގެ ވަރަށް ބޮޑު ވައުދެއް ކަމަށެވެ. އެގޮތުން މިއަހަރުގެ ތެރޭ ތިނަދޫގައި ފުޓުބޯޅަ ޓާފު ދަނޑެއް އަޅުއްވައިދެއްވާނެ ކަމަށެވެ.
"އަޅުގަނޑުމެންގެ ސަރުކާރުގެ ވަރަށް ބޮޑު ވައުދެއް ބޮޑެތި ފުޓުބޯޅަ ދަނޑުތައް ތަރައްގީ ކުރުމަކީ. އަޅުގަނޑު، އަޅުގަނޑުމެންނަށް ކުރެވުނު ހުރިހާ މަސައްކަތެއް ކުރާނަން އިރާދަކުރެއްވިއްޔާ މިއަހަރު ތެރޭގަ މިރަށުގަ ބޮޑު ފުޓުބޯޅަ ދަނޑެއް އަޅައިދޭން. ޓާފް ދަނޑެއް އިރާދަކުރެއްވިއްޔާ އަޅައިދޭނަން،" މިނިސްޓަރ ވިދާޅުވިއެވެ.
މިނިސްޓަރ މިހެން ވިދާޅުވި އިރު، މިހާރު ތިނަދޫގައި ތަރައްގީކުރެވައިފައިވަނީ ފުޓްސަލް ދެ ދަނޑާއި މެޓް އެއް ދަނޑެވެ. ފުޓުބޯޅަ ކުޅުމަށް ތިނަދޫގައި ޚާއްސަކުރެވިފައި އޮތީ އެންމެ ކުރީއްސުރެ އެރަށުގައި ފުޓުބޯޅަ ކުޅުމަށް ބޭނުން ކުރަމުން އައި ދަނޑެވެ. ނަމަވެސް އަޑިގުޑަންތައް ގިނަކަމުން ފުޓުބޯޅަ ކުޅުމަށް އެ ދަނޑު އެންމެ އެކަށީގެން ނުވާ ކަމަށް އެރަށު ކައުންސިލުން ބުނެއެވެ.
އެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ވިދާޅުވީ އެރަށުގައި ހުރި ޓާފް ދަނޑުތަކާއި ޒޯން 7 ސްޓޭޑިއަމްގެ ހާލަތު ރަނގަޅަށް ބައްލަވައިލައްވާފައިވާ ކަމަށާއި އެތަންތަނުގައި ރަނގަޅުކުރަން ހުރި ކަންކަން މިއަހަރު ތެރޭގައި ވީ ވަރަކުން މަސައްކަތް ކުރައްވާނެ ކަމަށެވެ.
މިނިސްޓަރ މަހުލޫފް ތިނަދޫއަށް ކުރައްވަމުންދާ ދަތުރުފުޅުގައި މިރޭ އެރަށު ކައުންސިލާވެސް ބައްދަލުކޮށްފައެވެ. އަދި މިއަދު ހަވީރު މިނިސްޓަރ ވަނީ އެރަށުގައި ހުންނަ ޒޯން 7 ސްޓޭޑިއަމާއި، ޔޫތް ސެންޓަރ އަދި އެމިނިސްޓްރީގެ ދަށުން ހިންގަމުން އަންނަ މަޝްރޫއުތަކުގެ ސައިޓުތަކަށް ޒިޔާރަތްކޮށް އެތަންތަނުގެ ފެންވަރާއި މަސައްކަތް ކުރިއަށްދާ ގޮތް ބައްލަވައިލައްވާފައެވެ.