ކުރިއަށް އޮތްތަނުގައި މާލޭގައި އެއްގަމު އުޅަނދުތައް ޕާރކްކުރެވޭނީ އެކަމަށް ޚާއްސަކޮށްފައިވާ ޕާރކިން ޒޯންތަކުގައި ފީއެއް ދައްކައިގެންކަމަށް ސިޓީ ކައުންސިލުން ވިދާޅުވެއްޖެއެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން ސިޓީ ކައުންސިލްގެ ޑެޕިއުޓީ މޭޔަރ ޝަމާއު ޝަރީފް ވިދާޅުވީ މިހާރުވެސް މާލޭގައި ސައިކަލްތަކަށް ޚާއްސަކޮށްގެން ޕާރކިން ޒޯންތަކެއް ތަރައްޤީކޮށްފައިވާކަމަށާއި އެތަންތަނުގައި ގާތްގަނޑަކަށް ހާހެއްހާ ސައިކަލް ޕާކް ކްރެވޭނެކަމަށެވެ. އަދި މުސްތަޤްބަލުގައި މިގޮތަށް ތަރައްޤީކޮށްފައިވާ ޕާރކިން ޒޯންތަކަކީ ފީ އެއް ދައްކައިގެން ޕާކް ކުރެވޭނެ ތަންތަނަށް ހެދުމުގެ މަސައްކަތް ކުރަމުންދާކަމަށާއި އެގޮތުން މިހާރު ކުރިއަށްދަނީ އެކަމަށް ބޭނުންވާ އުޞޫލުތައް އެކުލަވާލުމުގެ މަސައްކަތްކަމަށް އޭނާ ވިދާޅުވިއެވެ.
ޝަމާއު ވިދާޅުވީ މިމަސައްކަތުގެ ދަށުން ފިނޭންސް މިނިސްޓްރީ ކައިރީގައި ހަދާފައިވާ ޕާކިން ޒޯން ވެގެންދާނީ ފީދައްކައިގެން ޕާރކްކުރެވޭނެ ސަރަހައްދަކަށްކަމަށެވެ.
"ވެލާނާގެ ކަރީގައި ޕާރކިން ޒޯނެއް ޤާއިމްކޮށްފަ. އެމްއެމްއޭ ކުރިމަތީގައި، މާފަންނު ސަހަރާ ކަންމަތީގައި ޕާރކުރެވޭނެ އިންތިޒާމް ޤާއިމްކުރެވިއްޖެ. މިހާރުވެސް މާލެގައި އެކިތަންތަންތަނުގައި ހުރި ހުސްބިންތައް ހޯދަމުން މިއަންނަނީ. ވަރަށް ގިނަ ތަންތަނުގެ ޑިޒައިންތައްވެސް އެބަހުރި ކޮށްފަ. ފިނޭންސް މިނިސްޓްރީ ކައިރީގައި އޮތް ސަރަޙައްދުގައި އޮތް ޕާރކިން ޒޯން ވެގެންދާނީ ފީދައްކައިންގެ ޕާރކްކްރެވޭ ތަނަކަށް."ޝަމާއު ވިދާޅުވިއެވެ.
ވެހިކަލް ތޮށްޖެހުމަކީ މާލެއަށް ދިމާވެފައިވާ ބޮޑު މައްސަލައަށްވާއިރު މިކަން ހައްލުކުރުމަށް ކަމާގުޅޭ ފަރާތްތަކާއެކު މަސައްކަތް ކުރައްވަމުންދާކަމަށް ސިޓީ ކައުންސިލުން ވިދާޅުވެއެވެ. އަދި އެ ކައުންސިލްގެ އަމާޒަކީ މަގުތަކުގައި ޕާކް ކުރުމުގެ ބަދަލުގައި ޕާރކިން ޒޯންތައް ހަދާ އެތަނުގައި ޕާރކްކުރެވޭނެ އިންތިޒާމް ހަމަޖެއްސުންކަމަށްވެސް ކައުންސިލުން ވިދާޅުވެއެވެ.
ސިޓީ ކައުންސިލުން ގެންދަވަނީ ސައިކަލްތަކުގެ އިތުރަށް ޓެކްސީތަކަށްވެސް ޕާރކްކުރެވޭނެ އިންތިޒާމް ހަމަޖައްސަމުންނެވެ. މިގޮތުން ހުޅުމާލޭގައި ގާތްގަނޑަކަށް 300 ޓެކްސީ ޕާރކްކުރެވޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާކަމަށް ސިޓީ ކައުންސިލުން ބުނެއެވެ.
ޝަމާއު ވިދާޅުވީ ހުޅުމާލޭގައި ޓެކްސީތައް ޕާރކްކުރުމަށް ތަރައްޤީކުރާ ޕާރކިން ޒޯންގައިވެސް ޕާރކްކުރެވޭނީ ފީއެއް ދައްކައިގެންކަމަށެވެ. އަދި ފީތައް ކަނޑައެޅުމުގައި ބަލާނީ ރައްޔިތުންނަށް ތަކުލީފަކަށް ނުވާނޭ ގޮތަށް އަމަލުކުރުމަށްކަމަށް ޝަމާޢު ވިދާޅުވިއެވެ.
"އެތަނަކީ ޕާރކްކުރުމަށް ރައްކާތެރިތަނެއްގެ ގޮތުގައި ހެދުމުގެ ގޮތުން ސީސީޓީވީ ކެމެރާވެސް ހަރުކުރުމަށްހަމަޖެހިފައިވޭ. މިކަންތައްކުރުމަށް ފައިނޭންސް ހޯދުމަށް މަސައްކަތްކުރުމުން މިދަނީ" ޝަމާއު ވިދާޅުވިއެވެ.
ރާއްޖޭގެ އެންމެ އާބާދީ ބޮޑު މާލެ ސިޓީގެ ޕާރކިންގ މައްސަލައަކީ މާލޭގައި ދިރިއުޅޭ ރައްޔިތުންނަށް ދިމާވެފައިވާ ބޮޑު ދަތިކަމެކެވެ. ވެހިކަލްތައް ޕާރކުކުރުމުގައި ފީ ދައްކައިގެން ޕާކު ކުރެވޭނެ އިންތިޒާމް ހަމަޖެއްސުމުގެ މަސައްކަތް ސިޓީ ކައުންސިލުން ފަށާފައިވާއިރު މިކަމުގެ ސަބަބުން ޕާކް ކުރުމަށާއި ޓްރެފިކްގެ މައްސަލައަށް ހައްލެއް ލިބިގެންދާނެކަމަށް ސިޓީ ކައުންސިލުން ވިދާޅުވެއެވެ.