އަނިޔާގެ ސަބަބުން ފެރަން ޓޮރޭޒް ސްޕެއިން ޓީމުން ވަކިވެއްޖެ

ޔުއޭފާ ނޭޝަންސް ލީގުގައި ސްޕެއިން ޤައުމީ ޓީމަށް ކުޅެމުންދާ ފެރާން ޓޯރޭޒްއަށް އަނިޔާވެ އޭނާ އެޓީމުން ވަކިވެއްޖެއެވެ.

މަޢުލޫމާތުލިބޭގޮތުގައި ޓޯރޭޒްގެ ފައިގެ ކުޑަހުޅަށްވަނީ އަނިޔާވެފައެވެ. ސްޕެއިންގެ ފުޓުބޯލް ފެޑެރޭޝަނުން ހާމަކުރިގޮތުގައި ޓޯރޭޒަށް އަނިޔާވެ އޭނާ ޓީމާއި ދުރައްދިޔައިރު އެމަގާމު ފުރުމަށްޓަކައި ކާލޯސް އެސްޕީ ޓީމާއި ގުޅޭނެކަމަށެވެ. ފްރެންޗް ލީގު އާންގެ ޗެމްޕިއަން ޕެރިސް ސެއިންޓް ޖަރމެއިންއަށް ކުޅެމުންދާ ޓޯރޭޒް ސްޕެއިންއިން އެންމެ ފަހުން ބޭއްވި ފަރިތަ ކުރުންތަކުގައި ބައިވެރިވި ނަމަވެސް އޭނާގެ ކުޑަހުޅަށް ކޮންމެވެސް ވަރަކަށް ތަދުވާކަމުގެ އިޝާރާތެއް ވަނީ ކޮށްފައެވެ. އަދި އެހެން ކަމުން އޭނާގެ އަނިޔާ އިތުރަށް ބޮޑުވިޔަނުދީ ހިފެހެއްޓެމުގެ ފުރުސަތު ދިނުމަށްޓަކައި އޭނާ އަށް އަރާމު ކުރުމުގެ ފުރުސަތު ދިނީއެވެ.

ޓޮރޭޒް ނެތްތަން ފޫބެއްދުމަށް ސްޕެނިޝް ލަލީގާގެ ރެއާލް މެޑްރިޑަށް ކުޅޭ ޒުވާން ފޯވަޑް އެސްޕީ ޓީމަށް ނެގުމަށް ސްޕެއިންގެ ކޯޗު ލުއިސް ޑެ ލަ ފުއެންޓޭ ނިންމީ އޭނާ މިސީޒަންގައި ކުލަބްގައި ދައްކަމުންދާ މޮޅު ކުޅުން ފާހަގަ ކުރެވޭތީއެވެ. މިގޮތުން މިސީޒަންގައި އެސްޕީ ވަނީ ރެއާލްއަށް މުހިންމު 5 ލަނޑު ކާމިޔާބު ކޮށްދީފައެވެ. އަދި ސްޕެއިންގެ 21 އަހަރުން ދަށުގެ ޓީމުން ސެން މަރީނޯ އާއި މިދިޔަ ބުރާސްފަތި ދުވަހު ބައްދަލުކުރި މެޗުގައިވެސް އޭނާވަނީ 2 ލަނޑު ކާމިޔާބު ކޮށްފައެވެ.

ނޭޝަންސް ލީގުގައި ސްޕެއިން މިހާރު ކުޅުމަށް ހަމަޖެހިފައިވަނީ ދެ މެޗެވެ. އެއީ މިރޭ އަމިއްލަ ދަނޑުގައި ޗެކިއާ އާއި ދެކޮޅަށް ކުޅޭ މެޗާއި އޮކްޓޯބަރު 6 ވަނަ ދުވަހު ރަށުން ބޭރުގައި ކްރޮއޭޝިއާ އާއި ދެކޮޅަށް ކުޅޭ މެޗެވެ. ސްޕެއިންއިން ވަނީ މިހާތަނަށް ކުޅުނު ދެމެޗުވެސް ކާމިޔާބު ކޮށްފައެވެ. އެއީ ރަށުން ބޭރުގައި އިންގްލަންޑާއި ދެކޮޅަށް ކުޅުނު މެޗާއި އަމިއްލަ ދަނޑުގައި ކްރޮއޭޝިއާ އާއި ބައްދަލުކުރި މެޗެވެ. މިދެމެޗު ކާމިޔާބު ކޮށް ސްޕެއިން މިހާރު އުޅެނީ ލީގު އޭގެ ގްރޫޕް ތިނެއްގައި 6 ޕޮއިންޓާއެކު އެއްވަނައިގައެވެ. އަދި އިންގްލަންޑާއި ކްރޮއޭޝިއާއަށް 3 ޕޮއިންޓް ލިބިފައިވާއިރު ޗެކިއާ އުޅެނީ މެޗަކުން މޮޅުނުވެ ގްރޫޕްގެ އެންމެ ފުލުގައެވެ.