ޗައިނާ އޯޕަންގެ ފަހު 16 އިން ސަބަލެންކާ ޖާގަ ހޯދައިފި

ޗައިނާގެ ވެރިރަށް ބެއިޖިންގ ގައި މިހާރު ކުރިއަށްދާ ޗައިނާ އޯޕަން ޑަބްލިޔު.ޓީ.އޭ. ވަން ތައުޒަންޑް ޓެނިސް މުބާރާތުގެ ފަހު 16 އިން މިމުބާރާތުގައި ދެވަނައަށް ސީޑު ކުރެވިފައިވާ އަރީނާ ސަބަލެންކާ ޖާގަ ހޯދައިފިއެވެ.

މިމުބާރާތުގެ ފަހު 16 ކުޅުންތެރިންގެ ތެރެއިން ސަބަލެންކާ ޖާގަ ހޯދީ މެކްސިކޯގެ ރެނާާޓާ ޒަރަޒުއާ އާއި ބައްދަލުކުރި މެޗު ފަސޭހަ ކަމާއެކު ސީދާ ދެސެޓުން ކާމިޔާބު ކޮށްގެންނެވެ. އެއީ ހައެއް އެކެއް އަދި ހައެއް ތިނަކުންނެވެ. މިމުބާރާތުގެ ފަހު 16 ކުޅުންތެރިންގެ ބުރުގައި ސަބަލެންކާ ވާދަކުރާނީ ޗެކިއާގެ ނިކޮލާ ބާޓުންކޮވާ އާއެވެ.

މިއީ ޔޫއެސް އޯޕަންގެ ފައިނަލްގައި ދުނިޔޭގެ އެއްވަނަ ކުޅުންތެރިޔާގެ މަގާމަށް މިހާރު އަރާފައިވާ އެލޭނާ ރިބާކިނާ އާއި ބައްދަލުކޮށް ބަލިވިފަހުން ކުޅުނު ފުރަތަމަ މެޗެވެ. އަދި މިމުބާރާތުގައި ސަބަލެންކާ މަސައްކަތް ކުރަމުންދަނީ މިއަހަރުގެ ސަންޝައިން ޑަބަލްގެ ގޮތުގައި ފާހަގަ ކުރެވިފައިވާ އިންޑިއަން ވެލްސް އާއި މައާމީ އޯޕަން ޖެހިޖެހިގެން މާރޗް މަހު ކާމިޔާބު ކުރި ފަހުން ފުރަތަމަ މުބާރާތް ކާމިޔާބު ކުރެވޭތޯއެވެ.

މިއަހަރަކީ ސަބަލަންކާއަށް ފަހަކަށް އައިސް ކުރިމަތިލާން ޖެހުނު އެންމެ ނާކާމިޔާބު ސީޒަންގެ ގޮތުގައި ފާހަގަ ވެގެންދާނެއެވެ. މިގޮތުން މިއަހަރު ގްރޭން ސްލޭމް ދެ މުބާރާތުގެ ފައިނަލްގައި ކުޅެ ބަލިވެފައިވުމުން މިއީ 2022 ވަނަ އަހަރަށް ފަހު ގްރޭން ސްލޭމް މުބާރާތެއް ކާމިޔާބު ނުކުރެވި އޭނާ ނިންމާލާ ފުރަތަމަ އަހަރަށް ވެގެންދާނެއެވެ.

މިމުބާރާތުގައި ކުޅުނު އެހެން ބައެއް މެޗުތަކަށް ބަލާލާއިރު ހަތަރު ވަނައަށް ސީޑު ކުރެވިފައިވާ ރަޝިއާގެ މީރާ އަންޑްރީވާ އާއި ޗައިނާގެ ވައިލްޑްކާޑް އެންޓްރީއެއް ކަމަށްވާ ޔުއެ ޔުއާން އާއި ބައްދަލުކުރި މެޗު ފަހަތުން އަރާ ދެސެޓު އެއް ސެޓުން ކާމިޔާބު ކޮށްފާވަނީ އަންޑްރީވާއެވެ. އެއީ ފުރަތަމަ ސެޓު ގިނަ ބަޔަކަށް ހައިރާން ކަން ގެނުވުމަށްފަހު ތިނެއް ހަޔަކުން ޔުއާން ކާމިޔާބު ކޮށްފައިވަނިކޮށް ޖެހިގެން އައި ދެ ސެޓު ހައެއް ސުމެއް އަދި ހައެއް ސުމަކުން ކާމިޔާބު ކޮށްގެނެވެ. ފަހު 16 ކުޅުންތެރިންގެ ބުރުގައި އަންޑްރީވާ ބައްދަލުކުރާނީ އުޒްބަކިސްތާންގެ ޕޮލީނާ ކުޑަމެޓޯވާ އާއެވެ. މީގެއިތުރުން ހަތްވަނައަށް ސީޑު ކުރެވިފައިވާ ޗެކިއާގެ ކެރޮލީނާ މުޗޯވާ އާއި އިނގިރޭސިވިލާތުގެ ކެޓީ ބޯލްޓަރ ބައްދަލުކުރި މެޗު ސީދާ ދެސެޓުން ކާމިޔާބު ކޮށްފައިވަނީ މުޗޯވާއެވެ. އެއީ ހަތެއް ހައެއް އަދި ހައެއްއެކަކުންނެވެ. މިމުބާރާތުގެ ކުއާޓަރ ފައިނަލުން ޖާގައެއް ހޯދުމަށް ކުޅޭ މެޗުގައި އޭނާ ބައްދަލުކުރާނީ ރަޝީއާގެ ލިއުޑްމިލާ ސަމްސޮނޯވާ އާއެވެ.