އެން.ބީ.އޭ އާއި ޔޫރޯ ލީގު ގުޅިގެން މަސައްކަތް ކުރުމާމެދު މަޝްވަރާ ކުރަނީ

އެން.ބީ.އޭ. އާއި ޔޫރޯ ލީގު ގުޅިގެން ޔޫރަޕްގައި ބާސްކެޓްބޯޅަ އާ މުބާރާތެއް މިއަންނަ އަހަރު ތައާރަފް ކުރުމާއި މެދު ދެފަރާތުގެ މެދުގައި މަޝްވަރާ ކުރަން ފަށައިފިއެވެ.

ދުނިޔޭގައި އެންމެ މަޤްބޫލް ބާސްކެޓް ބޯޅަ ލީގުގެ ގޮތުގައި ފާހަގަ ކުރެވިފައިވާ އެން.ބީ.އޭ. އިން ވަނީ މިއަންނަ އަހަރު އެން.ބީ.އޭ. ޔޫރަޕްގެ ފަރާތުން އާ ލީގެއް ޔޫރަޕްގެ ކްލަބްތަކަށް ތައާރަފް ކުރަން ނިންމާފައެވެ. އަދި މިގޮތުން އެން.ބީ.އޭ. އިން މިވަނީ ޔޫރަޕްގައި މިހާރު އެންމެ ބޮޑުކޮށް ކުރިއަށްގެންދާ ޔޫރޯ ލީގާއެކު ގުޅިގެން މިމުބާރާތް ކުރިއަށް ގެންދިއުމަށް ޝައުގުވެރިކަން ފާޅުކޮށް ޕްރޮޕޯސަލް އެއް ހުށަހަޅައިފައެވެ.

މަޢުލޫމާތުލިބޭގޮތުގައި އެމެރިކާގެ ނޭޝަނަލް ބޯސްކެޓްބޯލް އެސޯސިއޭޝަންގެ މިހުށަހެޅުމާއި މެދު މަޝްވަރާ ކުރުމަށްޓަކައި ޔޫރޯލީގުގެ ހިއްސާ ދާރުން އިޓަލީވިލާތުގެ ލޭކް ކޯމޯގައި މިއަންނަ ހޯމަ ދުވަހު ބައްދަލުކުރާނެއެވެ. އަދި އެން.ބީ.އޭ. ގެ ހުށަހެޅުން ގަބޫލު ކުރަން ޔޫރޯ ލީގުން އެއްބަސްވެއްޖެނަމަ އެލީގުގެ ހިންގުމާއި، މުބާރާތް ކުޅޭ ގޮތާއި، މާލީ ކަންކަމަށް ގިނަ ބަދަލުތަކެއް އަންނާނެއެވެ.

އަދި އެއްބަސްވުމަކަށް ނާދެވިއްޖެނަމަ މިއަންނަ އަހަރު ޔޫރަޕްގައި ވާދަވެރި ދެލީގު ފެންނާނެއެވެ. އެން.ބީ.އޭ. އިން ނިންމާފައިވަނީ މިއަންނަ އަހަރު 16 ޓީމުގެ މައްޗަށް އެކުލެވޭ ލީގެއް ޔޫރަޕްގައި ފެށުމަށެވެ. މީގެތެރޭގައި 10 ނުވަތަ 12 ޓީމު ވާނީ ދާއިމީ ޓީމު ތަކަށެވެ. އަދި ބާކީ އޮންނަ 6 ނުވަތަ 4 ޓީމު ވާނީ ކޮލިފައިން ކުޅެގެން މުބާރާތުން ޖާގަހޯދާ ޓީމު ތަކަށެވެ. އަދި އެން.ބީ.އޭއިން ވަނީ ޔޫރޯ ލީގާއެކު އެއްބަސްވުމަކަށް ނާދެވުނު ނަމަވެސް މިއަންނަ އަހަރު ލީގު ފެށުމަށް ނިންމާފައެވެ.

ޔޫރޯ ލީގުން ބުނީ ދެފަރާތުން އައު ލީގު ފެށުމަށް ކުރަންޖެހޭ ކަންކަން އޮޅުން ފިލުވުމަށް ދެ ފަރާތުންވެސް މަޝްވަރާ ކުރަމުންދާކަށެވެ. މިގޮތުން މިލީގަށް ޓީމުތައް ހޮވުމުގައި އެފަރާތުން ތިން ކެޓަގަރީއެއް ގެންގުޅޭނެކަމަށްވެއެވެ. މިގޮތުން ފުރަތަމަ ކެޓޭގަރީއަކަށް ވާނީ މިހާރުވެސް ޔޫރަޕުގައި ބާސްކެޓްބޯޅައަށް ފާހަގަ ކޮށްލެވޭ ޓީމުތަކެވެ. އަދި ދެވަނަ ކެޓެގަރީއަކީ އަލަށް އައު އިންވެސްޓަރުންނާއެކު ފްރެންޗައިޒް ހަދަން ބޭނުންވާ ޓީމުތަކެވެ. އަދި ތިންވަނަ ބައިގައި ހިމެނެނީ ޔޫރަޕްގައި މިހާރު ފާހަގަ ކޮށްލެވޭ ފުޓްބޯޅަ ޓީމްތައް ހިމެނޭ ކްލަބް ތަކެވެ. އަދި އެން.ބީ.އޭ. ޔޫރަޕްގެ ޝެޑިއުލް ބިނާވާނީ ޑޮމެސްޓިކް ލީގު ތަކާއި ޤައުމީ ޓީމުތަކުގެ މެޗުތަކަށްވެސް ކުޅުންތެރިންނަށް ވަގުތު ދެވޭނެގޮތަށް އެކަންކަމަށް ބަލައިގެންނެވެ.

ޔޫރޯ ލީގުގެ މެޗުތަށް ބެލުމަށް ގިނަ ބަޔަކު ވަދެ ސަޕޯޓަރުން ގިނަކަމަށް ފާހަގަ ކުރެވިފާވީނަމަވެސް އެލީގުގައި ދާއިމީ ޓީމުތަކުގެ މައްސަލަ ދިމާވެއެވެ. އެން.ބީ.އޭ. އިންވަނީ ދާއިމީ ޓީމުތައް ނަގާނެ 12 ސިޓީއެއް ކަނޑައަޅައިފައެވެ. މި 12 ސިޓީ އަކީ ލަންޑަން، ޕެރިސް، ރޯމް، މިލާން، ބަރލިން، މިޔުނިކް، އިސްތަންބޫލް، މެޑްރިޑް، ބާސެލޯނާ، މެންޗެސްޓަރ އަދި ލިއޯންއެވެ.

މަޢުލޫމާތުލިބޭގޮތުގައި ޔޫރޯ ލީގުންވެސް އަންނަނީ އެލީގު އިތުރަށް ފުޅާކުރުމަށް ތައްޔާރުވަމުންނެވެ. މިގޮތުން މިހާރު ކުޅޭ 20 ޓީމުގެ އަދަދު 24 އަށް މިއަންނަ ސީޒަނުން ފެށިގެން އިތުރު ކުރެވޭނެއެވެ. މިހާރު ހިމެނޭ ދާއިމީ 13 ޓީމުގެ ތެރެއަށް ދާއިމީ 8 ޓީމެއް އިތުރު ވެގެންދާނެއެވެ. އަދި މިކަމަށް އެދި 14 ޓީމަކުން ބިޑް ކޮށްފައިވާ ކަމަށް މަޢުލޫމާތުލިބެއެވެ. އަދި މިޓީމުތަކާއެކު ފްރެންޗައިޒް ފީގެ ގޮތުގައި 800 މިލިއަން ޔޫރޯ ލިބިގެންދާނެއެވެ.

އެން.ބީ.އޭ. ޔޫރަޕްއިން ޔޫރޯ ލީގުގައި މިހާރު ދާއިމީކޮށް ތިބި 13 ޓީމަށް ޖާގަ ލިބޭނެ ކަމުގެ ޔަގިން ކަމެއް އެފަރާތަކުން ނުދެއެވެ. އަދި އެން.ބީ.އޭ. ޔޫރަޕުން ފްރެންޗައިޒް ތަކަށް ފުރުސަތު ދީ އެންޓްރީ ފީ ކަނޑަ އަޅާނީ ކޭސް ބައި ކޭސްގެ އުސޫލުންނެވެ. އަދި މީޑިއާ ރިޕޯޓްތައް ބުނާގޮތުގައި އެން.ބީ.އޭ. ޔޫރަޕަށްވަނީ 500 މިލިއަނާއި އެއް ބިލިއަން ޑޮލަރާއި ދެމެދުގެ އަދަދުގެ ބިޑް ލިބިފައެވެ.