"މިއަހަރު ނިމޭއިރު ކުންފުނިތަކުގެ މުވައްޒަފުންގެ ޢަދަދު ހުންނާނީ ބޭނުންވާ ވަރަށް"

މިއަހަރު ނިމޭއިރު ކުންފުނިތަކުގެ މުވައްޒަފުންގެ ޢަދަދު ހުންނާނީ ކުންފުނިތަކަށް ބޭނުންވާ ވަރަށްކަމަށާއި ކުންފުނިތަކުގެ ހިންގުމުގެ ނިޒާމު ވަރުގަދަވާނެކަމަށް ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވެއްޖެއެވެ. ރައީސް ވިދާޅުވީ ކުންފުނިތަކަށް ބޭނުން ނުވާވަރަށް މުވައްޒަފުން ނަގާފައިވަނީ ސިޔާސީ މަންފާއެއް ހާސިލުކުރުމުގެ ބޭނުމުގައިކަމަށެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ވިދާޅުވީ، އެމަނިކުފާނު ވެރިކަމަށް ވަޑައިގެންނެވިއިރު ކުންފުނިތަކުން މުވައްޒަފުން ވަކިނުކުރާނެކަމަށް ވިދާޅުވިކަމަށެވެ. އަދި އެގޮތަށް 2 އަހަރު ތެރޭގައި މީހުން ވަކިކޮށް ފިޔަވަޅުތަކެއް އަޅާފައިނުވާނެކަމަށެވެ. އެހެންނަމަވެސް ސަރުކާރުގެ ބައެއް ކުންފުނިތަކަށް މީހުން ނަގާފައިވަނީ ކުންފުނިތަކަށް ބޭނުންވާ ވަރަށް ވުރެ އެތައް ގުނައެއް އިތުރުކޮށްކަމަށްވާއިރު، މިފަދަ ގިނަ މުވައްޒަފުންނަކީ މަސައްކަތެއްނެތި ހަމައެކަނި އެފަރާތްތަކަށް މުސާރަ ޖަމާވަމުންދާ މުވައްޒަފުންކަމަށެވެ. ހިންގުމުގެ ނިޒާމު ހަރުދަނާކުރުމަށް އެމަނިކުފާނު ވެވަޑައިގެންނެވި ވަޢުދުފުޅު ފުއްދެވުމަށްޓަކައި ކުންފުނިތަކުގައި އެއްވެސް މަސައްކަތެއް ނެތި ތިބި މުވައްޒަފުން ވަކިކުރަންޖެހޭނެކަމަށް ޤަބޫލުކުރައްވާކަމަށް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ކުންފުނިތަކުން މުވައްޒަފުން ވަކިކުރާއިރުވެސް އެމީހުންގެ އަޚުލާޤީ މައްސަލަތަކަށް ބަލާނެކަމަށެވެ. އެގޮތުން ހާޒިރީއާއި މަސައްކަތްކުރާ މިންވަރު ވަޒަންކުރެވޭނެކަން ފާހަގަކުރައްވާ ވިދާޅުވީ ވަކިކޮށްލާ ގިނަ މުވައްޒަފުންނަށްވެސް އިތުރު ގޮތްތައް ހޯއްދަވައިދެއްވާނެކަމަށެވެ.

"ފެނަކައަށް ވަރަށް ގިނަ މީހުން ވައްދާފައި. ފެނަކައަކީ ރަށްރަށުގެ މިކަހަލަ ކަންކަން ކުރަން އޮތް ކުންފުނި. އެހެންނަމަވެސް އެއްވެސް މަސައްކަތެއް ނުކޮށް، ގޭގައި ތިބި އެތައްބަޔަކު ތިބި. އަޅުގަނޑު ދެންނެވިން ވަޒީފާއިން ވަކި ނުކުރާނަމޭ. އެގޮތަށް އެކަން ދިޔައީ. އެހެންނަމަވެސް ކުންފުނި އޮތިީ އެކިކަހަލަ މައްސަލަތަކުގެ ތެރޭގައިކަން އެނގޭ އޮޑިޓަރ ޖެނެރަލްގެ ރިޕޯޓުންވެސް، އެހެންވީމަ ކުންފުނި ރަނގަޅު ކުރަންޖެހޭ. ކުންފުނީގެ ޚަރަދު ކުޑަކޮށް ހިންގުން ރަނގަޅު ކުރަންޖެހޭ. ޕާފޯމެންސަށް ބަލާ ކުންފުނީގެ މުވައްޒަފުން ކުންފުންޏަށް އެންމެ ރަނގަޅުވާނެ ގޮތަށް މަދުކުރަން." ރައީސް ވިދާޅުވިއެވެ.

ރައީސުލްޖުމްހޫރިއްޔާ ވިދާޅުވީ ކުންފުނިތަކުގެ ހިންގުން ހަރުދަނާކުރުމަށް އަޅުއްވަމުންގެންދަވާ ފިޔަވަޅުތަކުގެ ތެރެއިން މިއަހަރު ނިމޭއިރު ކުންފުނިތަކުގައި މުވައްޒަފުން ތިބޭނީ އެކުންފުންޏަކަށް ބޭނުންވާ މިންވަރަށްކަމަށެވެ. ކުންފުނިތަކުން ވަކިކުރާ މުވައްޒަފުންނަށް ރިޑަންޑެންސީގެ ތެރެއިން އެކި ޕެކޭޖުތަކުން ލުއިތައް ދިނުމާއި، ލުއިލޯނުތައް ނަގައިގެން އެފަރާތްތަކަށް އަމިއްލަ މަސައްކަތެއް ފެށޭނެ މަގު ހޯއްދަވައިދެއްވާނެކަމަށް ރައީސުލްޖުމްހޫރިއްޔާ ވިދާޅުވިއެވެ.

ޕީސީބީގެ ރައީސް މަޖިލީހުގެ ކޮމިޓީގައި ހިއްސާކުރައްވާފައިވާގޮތުން 18000 އަށްވުރެ ގިނަ މުވައްޒަފުންވަނީ މިދިޔަ ސަރުކާރުގެ ދުވަސްވަރު ކުންފުނިތަކަށް ވައްދާފައެވެ. ބައެއް ކުންފުނިތަކުގައި ތިބި މުވައްޒަފުންގެ މަޢުލޫމާތާއި، ވަޒީފާއަށް ވެއްދިކަމުގެ ލިޔެކިޔުންތައް ނެތްކަމުގެ ކަންބޮޑުވުން އޮތްއިރު، ކުންފުނީގެ މާލީ ޙާލަތު ދަށަށްގޮސްފައިވާކަން ފާހަގަކުރެވެއެވެ.