އައިލާ މަޝްރޫޢަކީ ފަތުރުވެރިކަމުގެ މުޅިން އައު ބާބެއްގެ ފެށުން: ވަޒީރު ސަޢީދު

އައިލާ މަޝްރޫޢަކީ ރާއްޖޭގެ ފަތުރުވެރިކަމުގެ މުޅިން އައު ބާބެއް ހުޅުވައިދޭނެ ފަދަ މަޝްރޫއެއް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ވަޒީރު މިހެން ވިދާޅުވީ، އެސްއީޒެޑްގެ ދަށުން ރާއްޖޭގައި ތަރައްޤީކުރާ އެންމެ ފުރަތަމަ ސަސްޓެއިނަބަލް ޓައުންޝިޕް ޕްރޮޖެކްޓުގެ ބިންގާ އެޅުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، އައިލާ މަޝްރޫޢަކީ ހަމައެކަނި ތަރައްޤީގެ މަޝްރޫޢެއް ނޫން ކަމަށާއި، މިއީ ރާއްޖޭގެ އިޤްތިޞާދީ ކުރިއެރުމާއި ފަތުރުވެރިކަމާ މެދު އަލުން ވިސްނާލަން ލިބުނު ފުރުޞަތެއް ކަމަށެވެ. އަދި ރާއްޖޭގެ ފަތުރުވެރިކަމަށް މުޅިން އައު ބާބެއް ހުޅުވައިދޭނެ މަޝްރޫއެއް ކަމަށް ވަޒީރު ފާހަގަކުރެއްވިއެވެ.

ވަޒީރު ވިދާޅުވީ، ދުނިޔޭގެ ފަތުރުވެރިކަމުގެ ބާޒާރުގައި ވާދަވެރިކަން ބޮޑުވެ، ފަތުރުވެރިންގެ އާދަތަކަށް ބޮޑެތި ބަދަލުތަކެއް އަންނަމުންދާ މި ދަނޑިވަޅުގައި އުފެއްދުންތެރި ވިސްނުންތަކަކީ އިޚްތިޔާރެއް ނޫން ކަމަށާއި، އެއީ އިސްތިރާޖީ ގޮތުން ކުރަންޖެހޭ ކަމެއް ކަމެކެވެ. އަދި ރާއްޖޭގެ ޤުދުރަތީ ރީތިކަމާއި، އެކަހެރިކަމަކީ އެހެން ތަނަކުން ނުލިބޭނެ ފަދަ ވަސީލަތްތަކެއް ކަމަށްވާއިރު އައިލާ މަޝްރޫއު ފަދަ އިސްތިރާޖީ ވިސްނުންތަކުން ރާއްޖޭގެ ފަތުރުވެރިކަމުގެ ދާއިރާ ސިންދަފާތު ކުރަންޖެހޭ ކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ، ރާއްޖޭގެ މަޝްހޫރު ރިސޯޓް ފަތުރުވެރިކަމުގެ ބިންގަލުގެ މައްޗަށް ބިނާކޮށް، ބާޒާރުގެ ޑިމާންޑާ އެއްގޮތަށް ފަތުރުވެރިކަމުގެ ސިނާއަތް އިތުރަށް ފުޅާކުރަމުން މި ސަރުކާރުން މަސައްކަތް ކުރަމުންދާ ކަމަށެވެ. މިގޮތުން "އައިލާ" ފަދަ މަޝްރޫއުތަކުގެ ސަބަބުން ފަތުރުވެރިންނަށް ލިބޭ ތަޖުރިބާ އިތުރަށް މުއްސަނދިވެގެންދާނެ ކަމަށް ވަޒީރު ފާހަގަކުރެއްވިއެވެ.

"އައިލާ ފަދަ މަޝްރޫޢުތަކުގެ ސަބަބުން ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި އިންވެސްޓް ކުރުމަށް އެންމެ އެކަށީގެންވާ ތަނެއްގެ ގޮތުގައި ދުނިޔެއަށް ބަލައިގަންނާނެ. މި މަޝްރޫޢުގެ ސަބަބުން ލައިފްސްޓައިލް، ތަޢުލީމު، ވެލްނަސް އަދި ޞިއްޙީ ދާއިރާއިން ފަތުރުވެރިންނަށް ލިބޭ ތަޖުރިބާ އިތުރަށް ފުރިހަމަވެގެންދާނެ. މިއީ ރާއްޖެއަކީ ހަމައެކަނި ޗުއްޓީ ހޭދަކޮށްލަން އަންނަ މަންޒިލެއްގެ ބަދަލުގައި، ދިރިއުޅުމަށާއި، އިންވެސްޓް ކުރުމަށާއި، ދިގުމުއްދަތުގެ އަގުހުރި މަސައްކަތްތަކެއް ބިނާކުރެވޭނެ ތަނެއްގެ ގޮތުގައި ބަލައިގަތުމަށް ލިބޭ އަގުހުރި ފުރުސަތެއް." އިޤްތިޞާދީ ވަޒީރު މުޙައްމަދު ސަޢީދު ވިދާޅުވިއެވެ.

އިޤްތިޞާދީ ނަޒަރަކުން ބަލާއިރު، މި މަޝްރޫޢުގެ ސަބަބުން ޢިމާރާތްކުރުމުގެ ދާއިރާ، ރީޓެއިލް، ތަޢުލީމު، ޞިއްޙީ ޚިދުމަތް އަދި ލޮޖިސްޓިކްސް ފަދަ އަމިއްލަ ދާއިރާތަކަށް ބޮޑު ކުރިއެރުމެއް ލިބޭނެ ކަމަށް ވަޒީރު ވިދާޅުވިއެވެ. އަދި މީގެ ސަބަބުން ވަޒީފާގެ ފުރުޞަތުތައް އުފެދި، ޓެކްނޮލޮޖީގެ ދާއިރާއަށް ބޮޑު ކުރިއެރުމެއް ލިބި، ރާއްޖޭގެ އުފެއްދުންތެރިކަމަށް ބޮޑު މަންފާއެއް ކުރާނެ ކަމަށް ވަޒީރު ފާހަގަކުރެއްވިއެވެ.

ކްރިސްޓަލް ހޯލްޑިންގްސްގެ ފަރާތުން ރާއްޖޭގައި ތަރައްޤީކުރާ ފުރަތަމަ ދެމެހެއްޓެނިވި ޓައުންޝިޕް ތަރައްޤީކުރާނީ ނ. އަތޮޅުގައެވެ. މި މަޝްރޫޢު ނިންމާލުމަށް އަމާޒު ހިފާފައިވަނީ 2028 ވަނަ އަހަރުގެ ނިޔަލަށެވެ. 790 މިލިޔަން އެމެރިކާ ޑޮލަރު ނުވަތަ 12.2 ބިލިޔަން ރުފިޔާ އިންވެސްޓްކޮށްގެން ނ. އަތޮޅުގައި ތަރައްޤީކުރާ ޓައުންޝިޕް ވާނީ ޒަމާނުގެ ވަޞީލަތްތަކާއި ސިފަތަކާއެކު އިންޑިއާ ކަނޑުގެ އިތުރަށް ދުނިޔޭގެ ފެންވަރުގައިވެސް ފާހަގަކުރެވޭ ތަފާތު މަޝްރޫޢަކަށް ސަރުކާރުން ވިދާޅުވެއެވެ.