ޤައުމީ ތަރައްޤީގެ ޕްލޭނަށް ޚިޔާލު ހޯދުމުގެ ދަތުރުތައް ފަށަނީ

ޤައުމީ ތަރައްޤީގެ ޕްލޭނަށް ޚިޔާލު ހޯދުމަށް އަތޮޅުތަކަށް ކުރާ ދަތުރުުތައް ސެޕްޓެމްބަރު މެދުތެރޭ ފަށާނެކަމަށް، އެ މަސައްކަތް ކުރިއަށްގެންދާ ކޮންސަލްޓްންޓް، ނެކްސިއާ މޯލްޑިވްސްއިން ބުނެފިއެވެ.

ޤައުމީ ތަރައްޤީގެ ޕްލޭނަކީ ސަރުކާރުން އެކުލަވާލާ 20 އަހަރު ދުވަހުގެ ސްޓްރެޓިޖިކް ޕްލޭނެކެވެ. މި ޕްލޭން އެކުލަވާލުމުގެ މަސައްކަތް، ކޮންސަލްޓޭޝަން ފާމެއްކަމަށްވާ ނެކްސިއާ މޯލްޑިވްސްއާ ހަވާލުކުރީ އޮގަސްޓްމަހުގެ ފުރަތަމަ ހަފްތާގައެވެ.

ޕީއެސްއެމްއަށް ދެއްވި އިންޓަވިއުއެއްގައި ނެކްސިއާ މޯލްޑިވްސްގެ މެނޭޖިން ޑިރެކްޓަރ ޙާމިދް ޞާދިޤް ވިދާޅުވީ، ޕްލޭން އެކުލަވާލުމުގެ ފުރަތަމަ މަރުހަލާގެ މަސައްކަތް ނިމިފަވާކަމަށެވެ. މި މަރުހަލާގައި ހިމެނެނީ މަޢުލޫމާތު އެއްކުރުމާއި ދިރާސާގެ މަސައްކަތްތައް ކުރިއަށްގެންދާނެ ގޮތްތައް ކަނޑައަޅާ، ސްޓިއަރިން ކޮމިޓީގެ ލަފަޔާއެކު އެކަންކަން ފައިނަލްކުރުމެވެ. މިހާރު ކުރިއަށްދަނީ ދެވަނަ މަރުހަލާގެ މަސައްކަތްތަކެވެ.

"ދެވަނަ މަރުހަލާފައި ކުރިއަށްގެންދަނީ ކީ ސްޓޭކްހޯލްޑަރ ކޮންސަލްޓޭޝަންސް. މި ބައްދަލުވުންތައް މިދިޔަ ހަފްތާގައި ފެށީ. އޭގެތެރޭގައި މި ހިމެނެނީ، ދައުލަތުގެ އިދާރާތަކާ ސަރުކާރު އޮފީސްތަކާއި ސިޔާސީ ޕާޓީ، މަދަނީ ޖަމްޢިއްޔާތައް އަދި ބޭރުގެ ޖަމްޢިއްޔާތަކުގެ ޚިޔާލާ މަޝްވަރާ ހޯދުން." ނެކްސިއާގެ މެނޭޖިން ޑިރެކްޓަރ ޙާމިދު ޞާދިޤް ވިދާޅުވިއެވެ.

ދެން ކުރިއަށްދާނީ އަތޮޅުތަކަށް ދަތުރުކޮށް، އެ ރަށްރަށުގެ މުއައްސަސާތަކާއި ރައްޔިތުންނާ ބައްދަލުކޮށް ޚިޔާލާ މަޝްވަރާ ހޯދާ، މަޢުލޫމާތު އެއްކުރުމުގެ މަސައްކަތްތަކެވެ. ޙާމިދް ޞާދިޤް ވިދާޅުވީ އަތޮޅުތަކަށް ސެޕްޓެމްބަރު މަހު ދެވަނަ ހަފްތާގައި ދަތުރުތައް ފަށާނެކަމަށެވެ.

"ރައްޔިތުންނާއި މުއައްސަސާތަކާއި ޖަމްޢިއްޔާތައް ހިމެނޭހެން އަޅުގަނޑުމެން ބައްދަލުވުންތައް ބާއްވާނަން. ރާއްޖޭގެ ދެކުނުން ދަތުރު ފަށާނީ. އޮކްޓޯބަރުގެ ނިޔަލަށް ހުރިހާ ރަށްތަކުގެ ރައްޔިތުންނާ ބައްދަލުކުރުން އުއްމީދަކީ. މީގައި ބަލާނީ، ރަށްތަކުގެ ތަރައްޤީއަށް ރައްޔިތުންގެ އުއްމީދަކީ އަދި ތަޞައްވުރަކީ ކޮބާތޯ." ނެކްސިއާ މޯލްޑިވެސްގެ މެނޭޖިން ޑިރެކްޓަރ ޙާމިދް ވިދާޅުވިއެވެ.

ޙިއްސާދާރުންނާ ރައްޔިތުންނާއެކު ބާއްވާ ބައްދަލުވުންތަކުގެ އިތުރުން، އޮންލައިންކޮށް ޚިޔާލު ހުށައެޅޭނެ ޕްލެޓްފޯމެއް ޤާއިމުކުރާނެކަމަށްވެސް ނެކްސިއާ މޯލްޑިވެސްއިން ބުނެއެވެ.

20 އަހަރުގެ ޤައުމީ ތަރައްޤީގެ ޕްލޭނަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަރަށް މުހިންމު ތަޞައްވުރެކެވެ. މިއީ ދެމެހެއްޓެނިވި ތަރައްޤީއަށް ރިއާޔަތްކޮށް ޤައުމުގެ ބަދަލުވަމުންދާ އިގްތިޞާދީ، އިޖުތިމާޢީ، ތިމާވެށި އަދި ޢުމްރާނީ ބޭނުންތަކަށް އަމާޒުކޮށް، ޤައުމީ ފެންވަރުގައި އެންމެ އިސްކަންދޭ ދާއިރާތަކުގެ ދުރުރާސްތާގެ ޕްލޭނެކެވެ. ޕްލޭންގެ މަސައްކަތް ސަރުކާރުގެ ފަރާތުން ބަލަހައްޓަވަނީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިންނެވެ.

މި ޕްލޭންވެގެންދާނީ ރާއްޖޭގެ ކޮންމެ ރަށެއްގައި ދިރިއުޅޭ ރައްޔިތުންނާއި، އެކި ދާއިރާތަކުގެ ޚިޔާލާއި ހިއްސާއާއެކު ރާއްޖޭގެ ކުރިމަގުގެ ތަޞައްވުރު އެކުލަވާލުމަށްޓަކާ ހަދާ ޕްލޭނަކަށެވެ. އަދި މިއީ ޤާނޫނީ ބާރުވެރިކަން ލިބޭގޮތަށް ތައްޔާރުކާ ޕްލޭނެއްކަމަށް ސަރުކާރުން ވަނީ ވިދާޅުވެފައެވެ.

ޤައުމީ ތަރައްޤީގެ ޕްލޭން އެކުލަވާލުމަށް ހަވާލުކޮށްފައިވާ ނެކްސިއާ މޯލްޑިވްސްއަކީ ރާއްޖޭގައި ކޮންސަލްޓެންސީގެ ދާއިރާއިން 18 އަހަރަށްވުރެ ގިނަ އަހަރުގެ މަސައްކަތުގެ ތަޖުރިބާއާއެކު، ސަރުކާރުގެ ސިޔާސަތުތައް އެކުލަވާލުމާއި، މުއައްސަސާތަކުގެ ހިންގުން ހަރުދަނާކޮށްދިނުމާއި، އިސްތިރާޖީ ރޭވުންތެރިކަމުގެ ދާއިރާއިން އެކި ފެންވަރުގެ ގިނަ މަސައްކަތްތަކެއް ކުރަމުންދާ ކުންފުންޏެކެވެ.