އެކިފަހަރުމަތިން މުއްދަތު އިތުރުކޮށްގެންވެސް "ދަ ގާޑަންސް" ނިންމާފައިނުވާތީ އެއްބަސްވުން ބާޠިލުކުރަނީ

ދީފައިވާ މުއްދަތުގެ ތެރޭގައި "ދަ ގާޑަންސް" ޕްރޮޖެކްޓް ޖާހު އިންވެސްޓްމަންޓްއިން ނުނިންމުމުން އެއްބަސްވުން ބާޠިލުކުރުމަށް ޤާނޫނީ ނޯޓިސް އެ ކުންފުންޏަށް ފޮނުވައިފިއެވެ.

ޖާހު އިންވެސްޓްމަންޓް ޕްރައިވެޓް ލިމިޓެޑުގެ ފަރާތުން ހުޅުމާލޭގައި 2017 ވަނަ އަހަރު ތަރައްގީކުރަން ފެށި "ދަ ގާޑަންސް" ޕްރޮޖެކްޓް ނިންމުމަށްޓަކައި އެކި ފަހަރު މަތިން މުއްދަތު އިތުރުކޮށްފައިވާކަމަށް އެޗްޑީސީން ވިދާޅުވިއެވެ.

ނަމަވެސް މިއަދާ ހަމައަށް އައިރުވެސް ޖާހު އިންވެސްޓްމަންޓް ޕްރައިވެޓް ލިމިޓެޑުގެ ފަރާތުން އެ ޕްރޮޖެކްޓް ނިންމާފައި ނުވުމުގެ ސަބަބުން، އެޗްޑީސީއާއި އެ ކުންފުންޏާ ދެމެދު ސޮއިކޮށްފައިވާ އެއްބަސްވުން ބާޠިލުކުރުމުގެ އެންމެ ފަހު މަރުހަލާގެ ދަށުން ޤަނޫނީ ނޯޓިސް ދިނުމަށް އެޗްޑީސީގެ ބޯޑު ވަނީ ނިންމާފައެވެ. އަދި އެ ނޯޓިސް މިއަދު ފޮނުވާފައިވާކަމަށް އެޗްޑީސީން ވިދާޅުވިއެވެ.

އެޗްޑީސީން ވިދާޅުވީ އެނޯޓިސްގައި ބަޔާންކުރާ މުއްދަތު ކަމަށްވާ 45 ދުވަހުގެ ތެރޭގައި އެ ޕްރޮޖެކްޓްގެ ނުނިމި ހުރި މަސައްކަތްތައް ނުނިންމާ ހާލަތުގައި، އެއްބަސްވުން ބާޠިލުކޮށް އެ ޕްރޮޖެކްޓް ޖާހު އިންވެސްޓްމަންޓް ޕްރައިވެޓް ލިމިޓެޑުގެ އަތުން ނެގުމަށް ކުންފުނީގެ ބޯޑުން ނިންމާފައިވާކަމަށެވެ. އެ ފިޔަވަޅު އެޅުމަށް ނިންމާފައިވަނީ ޖާހު އިންވެސްޓްމަންޓް ޕްރައިވެޓް ލިމިޓެޑަށް އެޕާޓްމަންޓް ގަތުމަށް ފައިސާ ދައްކާފައިވާ ފަރާތްތަކަށް، ވީ އެންމެ އަވަސް މުއްދަތެއްގައި، އެޕާޓްމަންޓްތައް ޙަވާލުކުރެވޭނެ މަގު ފަހި ކުރުމުގެ ބޭނުމުގައިކަމަށް އެޗްޑީސީން ވިދާޅުވިއެވެ.

މި ލަގްޒަރީ ހައުސިން ޕްރޮޖެކްޓްގައި 83 އެޕަރޓްމަންޓް ހިމެނެއެވެ. އެގޮތުން މި ޕްރޮޖެކްޓްގައި ހިމެނެނީ 2 ކޮޓަރިއާއި 3 ކޮޓަރީގެ އެޕަރޓްމަންޓްތަކެވެ.