ދަނގެތީގެ ނަރުދަމާ ނިޒާމުގެ ޚިދުމަތް ރައީސް ފަށްޓަވައިދެއްވައިފި

އަރިއަތޮޅު ދެކުނުބުރީ ދަނގެތީގައި ޤާއިމްކުރި ނަރުދަމާގެ ނިޒާމުގެ މަސައްކަތް ނިންމާ ޚިދުމަތް ފަށައިފިއެވެ. އެރަށުގެ ނަރުދަމާ ނިޒާމުގެ ޚިދުމަތް ފަށްޓަވާދެއްވީ އެރަށުގައި ބޭއްވި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ.

އދ. ދަނގެތީގައި ޤާއިމުކޮށްފައިވާ ނަރުދަމާ ނިޒާމަކީ އެގްޒިމް ބޭންކް އޮފް އިންޑިއާގެ ލައިން އޮފް ކްރެޑިޓްގެ ދަށުން 34 ރަށެއްގައި ފެނާއި ނަރުދަމާގެ ނިޒާމް ޤާއިމުކުރުމުގެ މަޝްރޫޢުގެ ތެރެއިން، ޢިމާރާތްކުރުމާއި ބިނާރާބެހޭ ވުޒާރާއިން ކަލްޕަތުރު ޕްރޮޖެކްޓްސް އިންޓަރނޭޝަނަލް ލިމިޓެޑާއި ޙަވާލުކޮށްގެން ނިންމާފައިވާ މަޝްރޫޢުއެކެވެ.

ދަނގެއްޗަކީ ލޯކަލް ޓޫރިޒަމް ކުރިއަރާފައިވާ ރަށެކެވެ. 1140 މީހުންގެ އާބާދީއެއްއޮތް ދަނގެތީގެ ރައްޔިތުންނަށް ދިމާވެފައިއޮތް އެންމެ ބޮޑު އެއް ދައްޗަކީވެސް ރައްކާތެރި ނަރުދަމާ ނިޒާމެއް ނެތުމެވެ. ނަމަވެސް އަލަށް ޤާއިމްކުރެވުނު ނަރުދަމާ ނިޒާމާއެކު ރަށުގެ ރައްޔިތުންނަށް މިވަނީ ބޮޑު ލުޔެއް ލިބިފައެވެ. އަދި ރަށުގެ އިޤްތިޞާދީ ހަރަކާތްތައް ހިންގުމަށްވެސް ލިބުނު ބޮޑު ކުރިއެރުމެއްގެ ގޮތުގައި ކައުންސިލުން ފާހަގަކުރައްވައެވެ.

ދަނގެތީގައި މިވަގުތުވެސް 18 ގެސްޓްހައުސް އަންނަނީ ހިންގަމުންނެވެ. އެއީ 280 ޓޫރިސްޓު އެނދާއެކުއެވެ.

ވުމާއެކު ދަނގެތީގައި ޤާއިމްކުރި ރައްކާތެރި ނަރުދަމާ ނިޒާމާއެކު ރަށުގައި އިޤްތިޞާދީ ހަރަކާތްތައް ފުޅާކޮށް، ރައްޔިތުންނަށްވެސް ބޮޑު ލުޔެއް ލިބިގެންދާނެއެވެ. ޚާއްޞަކޮށް ގޭގޭގައި ޖަންކުޝަން ހަދައިގެން ބޭނުންކުރަމުން އައި ނަރުދަމާގެ ނިޒާމުގެ ބަދަލުގައި ރައްކާތެރި ނިޒާމެއް ދަނގެއްޗަށް މިވަނީ ކަށަވަރުވެގެންގޮސްފައެވެ.