މަޝްރޫޢުތަކަށް ބޭނުންވާ ފައިސާ ފަހިކޮށްދޭނެ ޑިވެލޮޕްމަންޓް ބޭންކު ރައީސް އިފްތިތާޙުކޮށްދެއްވައިފި

ތަރައްޤީގެ މަޝްރޫއުތަކަށް ބޭނުންވާ ފައިސާ ފަހިކޮށްދޭނެ "ޑިވެލޮޕްމަންޓް ބޭންކް އޮފް މޯލްޑިވްސް" ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙުކޮށްދެއްވައިފިއެވެ.

ރާއްޖޭގައި ފުރަތަމަ ފަހަރަށް އިންވެސްޓްމަންޓް ބޭންކެއް ޤާއިމުކުރެއްވުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ރިޔާސީ ވަޢުދުފުޅެކެވެ. މި ބޭންކް މެދުވެރިކޮށް ކުޑަ އިންޓްރެސްޓް ރޭޓެއްގައި ތަރައްޤީގެ މުހިންމު މަޝްރޫއުތަކަށާއި އަމިއްލަ ބޮޑެތި އިންވެސްޓްމަންޓްތަކަށް ލޯނު ލިބޭނެ މަގު ތަނަވަސްކުރެއްވުމަކީ ސަރުކާރުގެ އަމާޒެކެވެ.

މޯލްޑިވްސް ޑިވެލޮޕްމަންޓް ބޭންކް ލިމިޓެޑްގެ ނަމުގައި މުޅިން އަލަށް ދިވެހިރާއްޖޭގައި އިންވެސްޓްމެންޓް ބޭންކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުފެއްދެވީ މިއަހަރުގެ މެއިމަހުގެ 16 ވަނަ ދުވަހުއެވެ.

ބޭންކުގެ ބޯޑަށް ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން 3 މެންބަރުން ވަނީ އޮގަސްޓުމަހުގެ 21 ވަނަ ދުވަހު އައްޔަންކޮށްފައެވެ. އަދި ދުނިޔޭގެ މާލީ ދެ ތަޖުރިބާކާރުންކަމަށްވާ އަރޫނީ ގޫނަތިލަކަ ބޭންކުގެ ޗެއަރޕަރސަންކަމަށް އަދި ނޮއެލް ގްރެގަރ ޕެޓަރސަން-ޖޯންސް ސީއީއޯކަމަށް އައްޔަންކޮށްފައިވަނީ އޮގަސްޓުމަހުގެ 26 ވަނަ ދުވަހުއެވެ.

އިޤުތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެފައިވަނީ ދިވެހިރާއްޖެއާ ބައިނަލްއަޤްވާމީ މާލީ އިދާރާތަކާއި އިންވެސްޓަރުންނާއި ގުޅިގެން ތަރައްޤީގެ މަޝްރޫއުތަކަށް ބޭނުންވާ ފައިސާ ރާއްޖެއަށް ފަހިކުރުމުގެ ބައިވެރިއަކަށް މޯލްޑިވްސް ޑިވެލޮޕްމެންޓް ބޭންކުވާނެ ކަމަށެވެ.

ވަޒީރު ސަޢީދު ވަނީ ޑިވެލޮޕްމަންޓް ބޭންކުން ފައިސާ ދޫކުރާނީ ހަމައެކަނި ދަރަނީގެ ގޮތުގައި ނޫންކަމަށާއި ޑިވެލޮޕްމަންޓް ބޭންކުން މާލީ އެހީއާއި ފަންނީ އެހީ ފޯރުކޮށްދިނުމުގެ އިތުރު ގޮތްތައް ބޭންކުން ތަޢާރަފްކުރާނެކަމަށްވެސް ވިދާޅުވެފައެވެ. މިގޮތުން އިކުއިޓީ ފައިނޭންސް، ފަންޑުތައް ސިންޑިކޭޝަން އަދި ރިސްކް އިންޝިއުރެންސް ހިމެނޭކަން ވަޒީރު ފާހަގަކުރައްވާފައިވެއެވެ.

ދިވެހިރާއްޖޭގެ ޑިވެލޮޕްމަންޓް ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީ.އެސް.އައި.ޕީ މަޝްރޫޢުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ޙައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުމުގެ ޝައުޤުވެރިކަން އިތުރުކުރުމުގެ ބޭނުމުގައި އުފެއްދެވި ބޭންކެއްކަމަށް ސަރުކާރުން ވިދާޅުވެއެވެ.