ރަސްމާލެ މަޝްރޫޢުގެ "އޭރިއާ އެފް" ހިއްކުމުގެ މަސައްކަތް ފަށައިފި

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އުއްމީދީ މަޝްރޫޢުކަމަށްވާ "ރަސްމާލެ" މަޝްރޫޢު ހިއްކުމުގެ މަސައްކަތް އަލުން ފަށައިފިއެވެ.

ހައުސިންގ ޑިވެލޮޕްމަންޓް ކޯޕަރޭޝަން، އެޗްޑީސީން ވިދާޅުވީ، އެކި މަރުޙަލާތަކަށް ބަހާލައިގެން ހިއްކަމުންދާ މި މަޝްރޫޢުގައި މިހާރު ފަށައިގެން ކުރިއަށްދަނީ "އޭރިއާ އެފް" ހިއްކުމުގެ މަސައްކަތްކަމަށެވެ. މި މަޝްރޫޢުގެ ދަށުން "އޭރިއާ ޖޭ"ގައި ހިމެނޭ 29 ހެކްޓަރުގެ ބިން ހިއްކާ މިހާރުވަނީ ނިންމާލާފައެވެ.

ރަސްމާލެ މަޝްރޫޢުގެ ބިން ހިއްކުމުގެ މަސައްކަތް ހުއްޓިފައިވީނަމަވެސް އިތުރު އެހެން މަސައްކަތްތައް ކުރިއަށްދާކަން ސަރުކާރުންވަނީ ކުރިން ހާމަކުރައްވާފައެވެ.

މިގޮތުން ބިން ހިއްކުމުގެ މަސައްކަތް މަޑު ޖެހުނީ އެކަމަށް ބޭނުންވާ ވެލި ލިބުމުގައި ހުރި ދަތިތަކެއްގެ ސަބަބުންކަމަށް އޭރު ސަރުކާރުންވަނީ ވިދާޅުވެފައެވެ. އެހެންނަމަވެސް މިދިޔަ ސެޕްޓެމްބަރު މަހުގެ ފަހުކޮޅު އީޕީއޭއިންވަނީ މި މަޝްރޫޢު ހިއްކުމަށް ދެ ސަރަޙައްދަކުން ވެލި ނެގުމުގެ ހުއްދަދީފައެވެ.

The reclamation of Rasmalé Area F has resumed today. #BuildingBeyondHorizons #WithHDC pic.twitter.com/e6X13hxccN

— Housing Development Corporation (@hdcmaldives) November 10, 2024

މިގޮތުން 6 މަސް ދުވަހަށް ހުއްދަ ދީފައިވަނީ މާފުއްޓާ ކައިރިން ހުޅަނގަށް އޮތް ދެ ސަރަޙައްދުން ވެލި ނެގުމަށެވެ. އެ ދެ ސަރަޙައްދުގެ އިތުރުން އިތާފުށި ރިސޯޓު ކައިރިން ސަރަޙައްދެއްވެސް ވަނީ ވެލި ނެގުމަށް ހުއްދަ ދޫކޮށްފައެވެ. އީޕީއޭއިން ހުއްދަ ދީފައިވަނީ 562 ހެކްޓަރުގެ ބިން ހިއްކުމަށް ބޭނުންވާ ވެލި ނެގުމަށްކަމަށް އީޕީއޭއިންވަނީ ވިދާޅުވެފައެވެ.

12 ސަރަޙައްދަކަށް ބަހާލައިގެން ކުރިއަށްގެންދާ މި މަޝްރޫޢު ބިން ހިއްކުމުގެ މަސައްކަތް ކުރަމުންދަނީ ދެ ކުންފުންޏަކާއި ޙަވާލުކޮށްގެންނެވެ. އަދި އިތުރު ކުންފުންޏަކާއެކު އެއްބަސްވުން އެކުލަވާލުމުގެ މަސައްކަތްދަނީ ކުރަމުންނެވެ. މި 12 ސަރަޙައްދުގެ ތެރެއިން މިހާތަނަށް ބިން ހިއްކުމުގެ މަސައްކަތް ނިމިފައިވަނީ ސައިޓު "ޖޭ" ގައި ހިމެނޭ 29 ހެކްޓަރުގެ ބިމެވެ.

We are pleased to announce that we have resumed the reclamation work for Rasmalé Area F, marking another step forward in our community’s growth and development. #BuildingBeyondHorizons #WithHDC pic.twitter.com/AHuFvOgr9k

— Housing Development Corporation (@hdcmaldives) November 10, 2024

ރަސްމާލެ މަޝްރޫޢުގެ ޢަމަލީ މަސައްކަތް ފެށީ މިދިޔަ އަހަރުގެ ޑިސެމްބަރު މަހުގެ 18 ވަނަ ދުވަހުއެވެ. އޭރު މަސައްކަތް ކުރަމުންއައީ 10 މަހުން ބިން ހިއްކުމުގެ މަސައްކަތް ނިންމުމަށެވެ. ނަމަވެސް ދިމާވި އެކި މައްސަލަތަކެއްގެ ސަބަބުން، ބައެއް ބަދަލުތައް ޕްރޮޖެކްޓަށް ގެންނަމުންދާކަމަށް ސަރުކާރުން މީގެކުރިން ވަނީ ހާމަކުރައްވާފައިވެއެވެ.

މި މަޝްރޫޢުގައި 1153 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. ރަސްމާލެއަކީ 65000 ގެދޮރު ޔަޤީންވާގޮތަށް ތަރައްޤީކުރަން ނިންމާފައިވާ ޒަމާނީ ސިޓީއެކެވެ. އަދި ރަސްމާލެ ތަރައްޤީކުރަނީ ތިމާވެއްޓާ ރައްޓެހި "އިކޯ ސިޓީ"އެއްގެ ގޮތުގައިކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.