ސަރުކާރު ބަދަލުވިފަހުން ކުނި އުފުލާ 99 ވެހިކަލް ފޯރުކޮށްދީފި
-
ބިއްލޫރި ތެޅުމަށް ބޭނުންކުރާ 57 އާލާތް ފޯރުކޮށްދީފައިވޭ
-
ކުނި އުފުލުމަށް ބޭނުންކުރާ 201 ހޭންޑް ޓްރަކް ފޯރުކޮށްދީފައިވޭ
މިހާތަނަށް ކުނި އުފުލާ 99 ވެހިކަލް ރަށްރަށަށް ފޯރުކޮށްދެވިފައިވާކަމަށް މުސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން ވިދާޅުވެއްޖެއެވެ.
މޫސުމީ ބަދަލުތަކާއި ތިމާވެށްޓާއި ހަކަތައާބެހޭ ވުޒާރާއިން ވިދާޅުވީ 75 އަށްވުރެ ގިނަ ރަށަށް ކުނި މެނޭޖުކުރަން ބޭނުންވާ 99 ވެހިކަލް މިސަރުކާރު ވެރިކަމާ ހަވާލުވިފަހުން ފޯރުކޮށްދެވިފައިވާ ކަމަށެވެ. އަދި އެކި ރަށްރަށަށް ބިއްލޫރި ތެޅުމަށް ބޭނުންކުރާ 57 އާލާތާއި ކުނި ބޮނޑިކޮށް ކުޑަކުރުމަށް ބޭނުންކުރާ 72 އާލާތް ފޯރުކޮށްދެވިފައިވާކަމަށްވެސް ވިދާޅުވިއެވެ. އަދި ކުނި އުފުލުމަށް ބޭނުންކުރާ އެކި ބާވަތްތަކުގެ 201 ހޭންޑް ޓްރަކް ވަނީ ފޯރުކޮށްދީފައެވެ.
މީގެ އިތުރުން ކުނިން ގަސް ކާނާ އުފެއްދުމަށް ބޭނުންކުރާ މެކޭނިކަލް ކޮމްޕޯސްޓަރު މިހާތަނަށް 4 ރަށެއްގައި ޤާއިމްކޮށްފައިވާކަމަށް ހަކަތައާބެހޭ ވުޒާރާއިން ވިދާޅުވިއެވެ. އަދި އިތުރު 6 ރަށެއްގައި މި ނިޒާމު ޤާއިމްކުރުމުގެ މަސައްކަތްކުރަމުންދާކަމަށްވެސް ވިދާޅުވިއެވެ.
ހަމައެއާއެކު ކުނި މެނޭޖުކުރުމާ ބެހޭގޮތުން ދިވެހިން ތަމްރީންކުރުމުގެ މަސައްކަތްވެސް ހަކަތައާބެހޭ ވުޒާރާއިން ވަނީ ފަށްޓަވާފައެވެ. މިގޮތުން 7 ރަށަކުން 14 މީހަކު މި ދާއިރާއިން ތަމްރީންވުމަށް އިންޑިއާގެ ނިއު ދިއްލީއަށް ދަތުރުކުރުމަށް ހަމަޖެހިފައިވާކަމަށް ހަކަތައާބެހޭ ވުޒާރާއިން ވިދާޅުވިއެވެ.
ކުނި މެނޭޖުކުރާނެ ވަޞީލަތް ނެތުމާއި ކުނި މެނޭޖުކުރަން ދަތިވުމަކީ ރާއްޖޭގެ ގިނަ ރަށްތަކަކަށް ދިމާވެފައިވާ ބޮޑު މައްސަލައެކެވެ. މި މައްސަލަ ޙައްލުކުރުމަށް ސަރުކާރުން ދަނީ ގިނަ މަސައްކަތްތަކެއް ކުރައްވަމުންނެވެ. އެގޮތުން ކުނި މެނޭޖުކުރާ ސަރަހައްދީ ސެންޓަރުތަކެއް އެޅުމުގެ މަސައްކަތްވެސް ހަކަތައާބެހޭ ވުޒާރާއިން ދަނީ ކުރަމުންނެވެ. މިގޮތުން އެވުޒާރާގެ އަމާޒަކީ ރާއްޖޭގެ 3 ސަރަހައްދެއްގައި ސަރަހައްދީ ކުނި މުނޭޖުކުރާ ސެންޓަރުތައް ތަރައްޤީކުރުމެވެ.