މިއަހަރުގެ ތެރޭގައި މަދުވެގެން 4 ރަށުގެ މަގުހެދުމުގެ މަސައްކަތް ނިމޭނެ: އާރްޑީސީ

މިއަހަރުގެ ތެރޭގައި މަދުވެގެން 4 ރަށެއްގެ މަގު ހެދުމުގެ މަސައްކަތް ނިންމާލެވޭނެކަމަށް ރޯޑް ޑިވެލޮޕްމަންޓް ކޯޕަރޭޝަންގެ މެނޭޖިންގ ޑިރެކްޓަރ ބްރިގޭޑިއާ ޖެނެރަލް ރިޓަޔަރޑް ޢަލީ ޒުހައިރު ވިދާޅުވެއްޖެއެވެ.

މީގެ ތެރޭގައި ހިމެނެނީ ނިމިދިޔަ ދައުރުގެ ތެރޭގައި އާރްޑީސީއާއި ޙަވާލުކޮށްފައިވާ މަޝްރޫޢުތައްކަން ފާހަގަކޮށްލެވެއެވެ.

ރޯޑް ޑިވެލޮޕްމަންޓް ކޯޕަރޭޝަނަކީ ރާއްޖޭގެ އެކި ހިސާބުތަކުގައި މަގު ހެދުމުގެ މަސައްކަތް ކުރަމުންދާ ކުންފުންޏެކެވެ. ސަރުކާރު ބަދަލުވެގެންދިޔައިރު އާރްޑީސީއާ ޙަވާލުކޮށްފައިވާ 27 މަޝްރޫޢު އޮތްކަން އެކުންފުނީގެ އައު މެނޭޖްމަންޓުން ފާހަގަކުރައްވައެވެ.

ޕީއެސްއެމް ނިއުސްއަށް މަޢުލޫމާތުދެއްވަމުން އާރް.ޑީ.ސީގެ މެނޭޖިންގ ޑިރެކްޓަރ ބްރިގޭޑިއާ ޖެނެރަލް ރިޓަޔަރޑް ޢަލީ ޒުހައިރު ވިދާޅުވީ، އެ ކޯޕަރޭޝަނާ ޙަވާލުކޮށްފައިވާ މަޝްރޫޢުތަކުގެ ތެރެއިން 17 މަޝްރޫޢެއްގެ މަސައްކަތް ކުރިއަށް ނުގެންގޮސް 7 ވަރަކަށް މަސްދުވަހު މަޑުޖައްސާލާފައިވާކަމަށެވެ.

އެހެންނަމަވެސް މިހާރު މިހުރިހާ ރަށްރަށެއްގެ މަސައްކަތްވެސް ފެށިގެން އެކި މަރުޙަލާތަކުގައި ކުރިއަށްދާކަން މެނޭޖިންގ ޑިރެކްޓަރ ވަނީ ފާހަގަކުރައްވާފައެވެ. އަދި މީގެތެރެއިން ބައެއް ރަށްރަށުގެ މަސައްކަތް މިއަހަރުގެ ތެރޭގައި ނިންމާލެވޭވަރުވާނެކަމަށް އެމްޑީ ޒުހައިރުވަނީ ވިދާޅުވެފައެވެ.

އާރްޑީސީގެ އެމްޑީ ވިދާޅުވީ މިހާރު ކުރިއަށްދާ މަޝްރޫޢުތަކުގެ ތެރެއިން ތިނަދޫ ސިޓީއާއި ށ. މިލަންދޫގެ މަގުހެދުމުގެ މަޝްރޫޢުގެ މަސައްކަތް ގާތްގަނޑަކަށް ނިމުމަކާ ގާތަށް ގޮސްފައިވާކަމަށެވެ.

މީގެއިތުރުން ރ. ހުޅުދުއްފާރާއި އދ. މާމިގިލީ މަގުގައި ތާރުއެޅުމުގެ މަސައްކަތް މިހާރު ކުރިއަށްދާކަމަށާއި، މިއަހަރުގެ ތެރޭގައި އެދެރަށުގެ މަސައްކަތްވެސް ނިމޭނެކަމަށް އެމްޑީވަނީ ވިދާޅުވެފައެވެ. އަދި ނ. ވެލިދޫއާއި ގދ. ގައްދޫގެ މަސައްކަތްވެސް ކުރިއަށްދާކަން ފާހަގަކުރައްވާ އެދެރަށުގެ މަސައްކަތްވެސް މިއަހަރުގެ ތެރޭގައި ނިންމުމަށް މަސައްކަތްކުރަމުންދާކަމަށް ވިދާޅުވިއެވެ.

އާރްޑީސީގެ މެނޭޖިންގ ޑިރެކްޓަރ ވިދާޅުވީ، ކުރިން ޙަވާލުވެފައިވާ މަޝްރޫޢުތަކުގެ ތެރެއިން އެކި ސަބަބުތަކާހުރެ މަޑުޖައްސާލާފައިވާ 10 ރަށެއްގެ މަސައްކަތްވެސް މިހާރު ފަށާފައިވާކަމަށެވެ. އެހެންކަމުން ކުރިން އާރްޑީސީއާ ޙަވާލުކޮށްފައިވާ މަޝްރޫޢުތަކުގެ ތެރެއިން 27 ރަށެއްގެ މަގު ހެދުމުގެ މަސައްކަތް މިހާރު އެކި މަރުހަލާތަކުގައި ކުރިއަށްދާކަން އެކޯޕަރޭޝަނުން ފާހަގަކުރެއެވެ.

އާރްޑީސީގެ ގިނަ މައްސަލަތަކެއް ފެންމަތިވެފައިވާއިރު، ހޯމަ ދުވަހު އެކޯޕަރޭޝަން ވަނީ ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސެސް ކޮމިޓީއަށްވަނީ ހާޒިރުކޮށްފައެވެ. މިކޮމިޓީގައި އައު މެނޭޖްމަންޓް ހަވާލުވީއިރު މާލީގޮތުން ކޯޕަރޭޝަންގެ ޙާލަތު އޮތްގޮތާއި، މަޝްރޫޢުތައް ހުއްޓިފައި ހުރިކަމާއި، ކޯޕަރޭޝަންގެ ޕްރޮކިއުމަންޓްގެ ގިނަ މައްސަލަތައްވެސް ހިއްސާކޮށްފައިވެއެވެ. އެކޮމިޓީގައި ކޯޕަރޭޝަންގެ އެތެރޭގެ އޮޑިޓެއް ހެދުމުގެ މަސައްކަތްވެސް ކުރަމުންދާކަން އާރްޑީސީއިން ވަނީ ހާމަކުރައްވާފައެވެ.