މެދުރާސްތާ ބަޖެޓު އެކުލަވައިލުމުގެ މަސައްކަތް ފަށައިފި

2025 އިިން 2027 ވަނަ އަހަރަށް ލަފާކުރާ މެދުރާސްތާ ބަޖެޓު އެކުލަވައިލުމުގެ މަސައްކަތްތައް ފިނޭންސް މިނިސްޓްރީން ފަށްޓަވައިފިއެވެ.

ދައުލަތުގެ އަހަރީ ބަޖެޓު ތައްޔާރުކޮށް، ބަޖެޓު އެކުލަވާލެވޭ މާލީ އަހަރު ފެށުމުގެ 2 މަސް ދުވަސް ކުރިން ރައްޔިތުންގެ މަޖިލީހަށް ހުށަހަޅަންޖެހެއެވެ. އަންނަ އަހަރަށް ލަފާކުރާ ދައުލަތުގެ ބަޖެޓު އެކުލަވާލުމާއި ގުޅޭ މަސައްކަތްތަކާއި ގުޅޭގޮތުން މާލީ ވުޒާރާއިން ވަނީ ސަރކިއުލަރއެއް ނެރެފައެވެ.

މާލީ ވަޒީރު މުހައްމަދު ޝަފީޤު ސޮއިކުރައްވާ ނެރުނު ސަރކިއުލަރގައި ވަނީ ބަޖެޓު އެކުލަވާލުމުގެ ފުރަތަމަ މަރުހަލާގެ ދަށުން ކުރިއަށް އޮތް 3 އަހަރަށް ލަފާކުރާ މެދުރާސްތާ ބަޖެޓުގެ އައު ހަރަކާތްތަކާއި މަޝްރޫޢުތައް، ނިއު ޕޮލިސީ އިނިޝިއޭޓިވްސް އެކުލަވާލުމުގެ މަސައްކަތްތައް އެ ވުޒާރާއިން މިހާރު ފަށާފައިވާ ކަމަށެވެ.

މާލީ ވުޒާރާއިން ވިދާޅުވީ 2025 އިން 2027 އަށް ލަފާކުރާ މެދުރާސްތާގެ ބަޖެޓަކީ ސަރުކާރުގެ ސިޔާސަތުތައް ތަންފީޒުކުރުމަށްޓަކައި، ސަރުކާރުން އެކުލަވާލި މެނިފެސްޓޯގެ މައްޗަށް ބިނާކޮށް ތައްޔާރުކުރެވޭ ޕްރޮގްރާމް ބަޖެޓެއްކަމަށެވެ.

ބަޖެޓު އެކުލަވާލުމުގެ ފުރަތަމަ މަރުހަލާގެ ދަށުން، ދައުލަތުގެ އޮފީސްތަކުން ނިއު ޕޮލިސީ އިނީޝިއޭޓިވްސްގެ ގޮތުގައި ޕްރޮޕޯސަލްސް ހުށަހެޅުމަށްވަނީ ހުޅުވާލާފައެވެ. އަދި މި ޕްރޮޕޯސަލްތަކަކީ މެދެރާސްތާގައި ހިންގުމަށް ރާވާފައިވާ ހަރަކާތްތަކާއި މަޝްރޫޢުތަކަށް ވާން ޖެހެއެވެ.

މާލީ ވުޒާރާއިން ވިދާޅުވީ، ނިއު ޕޮލިސީ އިނިޝިއޭޓިވްސްގެ ގޮތުގައި ދައުލަތުގެ އޮފީސްތަކުން ހުށަހަޅާނީ ބަޖެޓުގައި ހިމެނުމަށް ބޭނުންވާ އައު ކަންތައްތަކާއި ބަޖެޓުން އިތުރަށް ޖާގަ ބޭނުންވާތީ ހުށަހަޅާ ކަންތައްތަކަށް ކަމަށެވެ.

ދައުލަތުގެ އޮފީސްތަކުން ހުށަހަޅާ އައު ކަންތައްތަކަކީ ސަރުކާރުގެ ސިޔާސަތުތައް ތަންފީޒުކުރުމަށްޓަކައި، ސަރުކާރުން އެކުލަވާލި މެނިފެސްޓޯގައި ހިމެނޭ މަޤުސަދުތައް ހާސިލްވާނެގޮތަށް އެކުލަވާލާފައިވާ ކަންތައްތައްކަމުގައި ވާންޖެހެއެވެ.

ނިއު ޕޮލިސީ އިނިޝިއޭޓިވްގެ ގޮތުގައި އޮފީސްތަކުން ހުށަހަޅާ ހަރަކާތް ނުވަތަ މަޝްރޫޢުގެ ސަބަބުން މިންތީގެ ހަމަހަމަކަމާއި މުޖުތަމައުގެ ނާޒުކު ފަރާތްތަކަށް ކުރާނެ އަސަރު އަދި ދެމެހެއްޓެނިވި ތަރައްޤީގެ ލަނޑުދަނޑިތަކާއި ހުރި ގުޅުން ބަޔާންކުރަންޖެހެއެވެ.

މާލީ ވުޒާރާއިން ވިދާޅުވީ، ނިއު ޕޮލިސީ އިނިޝިއޭޓިވްސްގެ ގޮތުގައި ހުށަހަޅާ ކަންތައްތަކަކީ އެ ސިޔާސަތެއް ތަންފީޒުވުމުން ބަޖެޓުން ކުރެވޭ ހޭދައާ އެއްހަމަ ނަތީޖާއެއް ނެރެވޭ، އަދި ކަނޑައަޅައިފައިވާ ލަނޑުދަނޑިތައް ހާސިލްކުރެވޭނެ ކަންތައްތަކުގެ އިތުރުން، ތިމާވެށި ރައްކާތެރިކުރުމަށާއި، ހިމާޔަތްކުރުމަށް އަދި މޫސުމަށް އަންނަ ބަދަލުތައް ކުޑަކުރެވޭނެ ކަންތައްތަކެއްކަމުގައި ވާން ޖެހޭނެ ކަމަށެވެ.

2025 އިން 2027 އަށް ލަފާކުރާ މެދުރާސްތާގެ ބަޖެޓުގެ ނިއު ޕޮލިސީ އިނިޝިއޭޓިވްސް ހުށަހަޅަންޖެހެނީ، މާލީ ވުޒާރާގެ ބަނޑޭރި ޕޯޓަލްގެ ބަޖެޓު ޕްރިޕެރޭޝަން މޮޑިއުލް ބޭނުންކޮށްގެންނެވެ.

މިގޮތުން ނިއު ޕޮލިސީ އިނީޝިއޭޓިވްސް ހުށަހެޅުމަށް ދައުލަތުގެ އޮފީސްތަކަށް ކަނޑައަޅާފައިވާ ސީލިންގތައްވެސް މާލީ ވުޒާރާއިންވަނީ އާއްމުކޮށްފައެވެ.

މާލީ ވުޒާރާއިން ވަނީ ސަރުކާރުގެ ލަނޑުދަނޑިތައް ހާސިލުކުރުމަށް 2025 އިން 2027 އަށް ލަފާކުރާ މެދުރާސްތާ ބަޖެޓުގެ ނިއު ޕޮލިސީ އިނީޝިއޭޓިވްސް އަދި އާމްދަނީ އިތުރުކުރުމަށް ކުރެވިދާނެ ކަންކަން ޖުލައިމަހުގެ 4 ވަނަ ދުވަހުގެ ކުރިން ހުށަހެޅުމަށް އަންގާފައެވެ.

މާލީ ވުޒާރާއިން ވިދާޅުވީ، ރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނުގައި ބަޔާންކޮށްފައިވާ ލޯކަލް ކައުންސިލްތައް މި ސަރކިއުލަރއަށް އަމަލުކުރުމުން އިސްތިސްނާވާނެ ކަމަށެވެ.